ລິ້ງ ສຳຫລັບເຂົ້າຫາ

ຜູ້ນຳ 20 ເສດຖະກິດທີ່ສຳຄັນຂອງໂລກ ປຶກສາຫາລືກັນ


ບັນດາຜູ້ນຳ 20 ປະເທດທີ່​ເປັນເສດຖະກິດທີ່ສຳຄັນໆຂອງໂລກ ໄດ້ພົບປະກັນເມື່ອທ້າຍອາທິດຜ່ານມານີ້ ທີ່ນະຄອນ Toronto ປະເທດການາດາ ເພື່ອປຶກສາຫາລືກັນຊອກຫາວິທີສືບຕໍ່ປະສານການ​ເຄື່ອນ​ໄຫວ ປະຕິບັດ​ການ​ຕ່າງໆທີ່ໄດ້ດຳເນີນ​ໄປ​ໃນປີຜ່ານມາ ເພື່ອແກ້ໄຂວິກິດການການເງິນ ຂອງໂລກ ແລະສະພາ ວະເສດຖະກິດຕົກຕ່ຳລົງ ທີ່​ເປັນ​ຜົນ​ສືບ​ເນື່ອງ​ມາ​ຈາກ​ວິ​ກິດ​ການດັ່ງກ່າວນັ້ນ. ຍ້ອນການປະຕິບັດການເຫລົ່ານັ້ນ ເສດຖະ ກິດໂລກຈຶ່ງກຳລັງເຕີບໃຫຍ່ຂະຫຍາຍຕົວຂື້ນມາອີກ ແລະການເຈລະຈາກັນທີ່​ໄດ້​ມີ​ຂຶ້ນ​ ​ ແມ່ນໄດ້ສະໜອງໂອກາດ​ສຳລັບ​ເຮັດ​ໃຫ້ຂອງການຟື້ນຕົວ ຄືນຂອງເສດຖະ ກິດມີຄວາມໝັ້ນຄົງ​ແລະຍືນຍົງ ຖາວອນ.

ການປະຕິບັດການທີ່ມີການປະສານງານກັນນັ້ນແມ່ນສຳຄັນທີ່​ສຸດເພາະ ວ່າສະພາວະເສດຖະກິດຕົກຕ່ຳ ຄັ້ງນີ້ແມ່ນ​ເປັນຄັ້ງທີ່ຮ້າຍແຮງທີ່ສຸດ ນັບ​ຕັ້ງ​ແຕ່​ຊຸມປີ 1930 ​ເປັນຕົ້ນມາ. ສະພາວະເສດຖກິດຕົກຕ່ຳດັ່ງ ກ່າວແມ່ນເລີ່ມຕົ້ນມາຈາກວິກິດການການເງິນ ທີ່​ເກີດ​ຂຶ້ນຍ້ອນ​ວ່າໜີ້ສິນທີ່ບໍ່ດີ ບໍ່​ມີ​ການ​ຊຳລະ​ຄືນ ແລະ ການລົງທຶນຕ່າງໆທີ່ມີຄວາມສ່ຽງສູງ ​ໄດ້ເປັນເຫດ​ເຮັດໃຫ້ທະນາຄານຈຳນວນຫລາຍ ຕ້ອງລົ້ມຈົມ ແລະສິນ ເຊື່ອເຫືອດແຫ້ງໄປ. ເຫດການນີ້ໄດ້ສົ່ງ​ຜົນ​ໃຫ້ທຸລະກິດຕ່າງໆຂາດເຂີນ​ເງິນທີ່ຈຳເປັນເພື່ອໃຊ້ເປັນທຶນໃນ ການບໍລິຫານກິດຈະການຂອງພວກເຂົາເຈົ້າ ແລະ​ເປັນ​ທຶນ​ສຳລັບແຜນການເສີມຂະຫຍາຍກິດຈະການ​ນັ້ນ. ຫລາຍໆບໍລິສັດໄດ້ຕັດໜ້າວຽກລົງ ປະຊາຊົນພາກັນຕັດ​ການໃຊ້ຈ່າຍລົງ ແລະການຕົກຕ່ຳລົງ​ໃນຄວາມ ຮຽກຮ້ອງຕ້ອງການສິນຄ້າທີ່​ຕິດຕາມ​ມານັ້ນ ກໍ​ໄດ້ຍັງຜົນໃຫ້ມີການສູນເສຍໜ້າວຽກເພີ່ມຫລາຍຂື້ນ ນອກ ນີ້ແລ້ວ ການຄ້າລະຫວ່າງປະ​ເທດກໍຕົກຕ່ຳລົງ ຊຶ່ງ​ໄດ້ສ້າງຄວາມເດືອດຮ້ອນໂດຍສະ​ເພາະ ໃຫ້ແກ່ພວກ ປະເທດກຳລັງພັທະນາທີ່ຜະລິດ ​ແລະ​ກາງ​ຕໍ່​ນຳ​ການ​ສົ່ງ​ອອກວັດຖຸດິບ ໃນຂົງເຂດຕ່າງໆເຊັ່ນອາຟຣິກາ ແລະອາເມລິກາລາຕິນ ເປັນຕົ້ນ.

ໃນການປະຕິບັດງານຮ່ວມກັນນັ້ນ ສະຫະລັດແລະປະເທດພາຄີຂອງຕົນ ​ໃນກຸ່ມ G20 ໄດ້ເພີ່ມການໃຊ້ ຈ່າຍ​ໃນໂຄງການຕ່າງໆຂອງລັດຖະບານຂຶ້ນ ​ເພື່ອກະຕຸກຊຸກຍູ້ເສດຖະກິດຂອງພວກຕົນ ​ແລະໄດ້ໃຫ້ເງິນ ແກ່ກອງທຶນສາກົນເພີ່ມຂື້ນເພື່ອຊ່ວຍເຫລືອປະເທດອື່ນໆ ​ໄດ້ທຳການ ປະຕິຮູບທີ່ສຳຄັນ ໃນລະບົບ ທະນາຄານຂອງພວກເຂົາເຈົ້າ ເພື່ອແກ້ໄຂບັນຫາຕ່າງໆ ທີ່​ໄດ້​ນຳ​ໄປ​ສູ່​ການລະລາຍ​ດ້ານການເງິນຂອງ​ໂລກແລະ ພວກ​ເຂົາ​ເຈົ້າ​ໄດ້ຕ້ານ ຢັນການດຳ​ເນີນ​ມາດຕາ​ການ​ຕ່າງໆທີ່​ເປັນການຄຸ້ມຄອງເສດຖະກິດຫລື​ສິນຄ້າພາຍໃນປະເທດຂອງ​ຕົນ ທີ່ອາດສາມາດສ້າງ​ຄວາມ​ເສຍ​ຫາຍ​ໃຫ້ ບັນດາພາຄີການຄ້າຂອງພວກ ເຂົາເຈົ້ານັ້ນ. ບັດນີ້ອົງການກອງທຶນສາກົນ ຫລື ໄອແອມແອຟ ປະເມີນວ່າການ ເຕີບໂຕຂອງເສດຖະ ກິດໂລກ ແມ່ນຈະເກີນ 4 ເປີເຊັນໃນປີນີ້ ​ແລະ ບາງທີອາດຈະມີການ​ຂະຫຍາຍ​ໂຕໃນ​ອັດຕາເທົ່າທຽມກັນ ໃນປີ 2011.

ຢ່າງໃດກໍຕາມ ຄວາມເປັນຫ່ວງກໍ​ຍັງ​ມີເພິ່ມຂຶ້ນ​ນັບ​ມື້ ກ່ຽວກັບການ​ສືບ​ຕໍ່ໃຊ້ຈ່າຍ​ເງິນຂອງລັດຖະບານ ເພຶ່ອ ຊ່ວຍກະຕຸກຊຸກຍູ້ການເຕີບໂຕຂອງ ເສດຖະກິດນັ້ນ. ຄວາມຢ້ານກົວໃນສິ່ງນີ້ກໍຄືວ່າການ​ກະທຳ​ເຊ່ນນີ້ ອາດສາມາດກໍ່​ໃຫ້​ເກີດ​ການ​ຂາດ​ເຂີນດ້ານການເງິນທີ່ຮ້າຍແຮງໄດ້ໃນອະນາຄົດ. ເຖິງ​ແມ່ນການຟື້ນຕົວຄືນ ຂອງເສດຖະກິດ​ໄດ້​ມີ​ຂຶ້ນ​ແທ້​ກໍ​ຈິງແຕ່ມັນກໍ ຍັງຢູ່ໃນລະດັບພໍ​ປານ​ກາງແລະບໍ່ສະໝ່ຳສະເໝີ. ​ໃນ​ການ ກ້າວໄປຂ້າງໜ້ານັ້ນ ບັນດາ​ຜູ້ນຳ​ໂລກແມ່ນຈະຕ້ອງ​ໃຫ້ວາງບູລິມະສິດໃຫ້ແກ່ການປ້ອງກັນ ແລະການສ້າງ ຄວາມເຂັ້ມແຂງແກ່ການຟື້ນຕົວຄືນຂອງເສດຖະກິດກ່ອນ​ອື່ນ​ໝົດ. ປະເທດທັງຫລາຍກໍຈະຕ້ອງສືບຕໍ່ ປະຕິບັດງານຮ່ວມກັນ ເພື່ອສະໜັບສະໜູນການເຕີບ​ໂຕຂອງເສດຖະກິດທີ່ແຂງແຮງແລະຍືນຍົງ ພ້ອມ ກັບໃຫ້ຄວາມເອົາໃຈໃສ່ເປັນພິເສດ​ໃສ່​ການຮັບປະກັນໃຫ້​ມີຄວາມໝັ້ນໝາຍທີ່ໜ້າເຊື່ອຖື​ໄດ້ຕໍ່​ການກູ້​ເອົາລະ​ບົບການເງິນແບບຍືນຍົງຖາວອນກັບ​ຄືນ​ມາ ເມື່ອໃດສະພາບການດ້ານເສດຖະກິດຫາກດີຂື້ນ.

XS
SM
MD
LG