ສະຫະລັດ ໄດ້ຮຽກຮ້ອງໃຫ້ປະເທດ ອີທິໂອເປຍ ປ່ອຍຕົວນັກຂ່າວ ທັງໝົດທີ່ຖືກຈັບກຸມໂດຍລັດຖະບານ ແລະ ຢຸດການໃຊ້ກົດໝາຍ ຕໍ່ຕ້ານການກໍ່ການ ຮ້າຍທີ່ ເປັນບັນຫາຂອງຕົນ ເພື່ອປິດປາກປິດສຽງພວກຄັດຄ້ານ.
ໂຄສົກສະພາຄວາມໝັ້ນຄົງແຫ່ງຊາດທ່ານ Ned Price ໄດ້ກ່າວ ໃນວັນພຸດວານ ນີ້ວ່າ ສະຫະລັດ ແມ່ນ “ເປັນຫ່ວງຢ່າງເລິກເຊິ່ງ ໃນການຈັບກຸມນັກຂ່າວຄົນ ອື່ນໆໃນ ອີທິໂອເປຍ ເມື່ອບໍ່ດົນມາ ນີ້.” ທ່ານໄດ້ຮຽກຮ້ອງວ່າ “ລັດຖະບານ ອີທິໂອເປຍ ຈົ່ງປ່ອຍຕົວ ບັນດານັກຂ່າວ ແລະ ຄົນອື່ນໆທັງໝົດ ທີ່ໄດ້ຊົມໃຊ້ສິດທິໃນການ ສະແດງອອກຄວາມ ຄິດຄວາມເຫັນຂອງພວກເຂົາເຈົ້າ.”
ໃນເດືອນຕຸລາທີ່ຜ່ານມາ, ວໍຊິງຕັນ ໄດ້ສະແດງຄວາມຍິນດີ ກັບການປ່ອຍຕົວ ນັກຂຽນຂ່າວອິນເຕີແນັດຫຼື Blogger ແລະ ນັກຂ່າວຫຼາຍຄົນແຕ່ໃນວັນພຸດ ວານນີ້ ທຳນຽບຂາວໄດ້ເຕືອນ ອີທິໂອເປຍ ຕໍ່ການຈັບກຸມຄັ້ງໃໝ່ນີ້.
ທ່ານ Price ໄດ້ກ່າວວ່າ ວໍຊິງຕັນ “ໄດ້ຊົມເຊີຍ ອີທິໂອເປຍ ໂດຍຕະຫຼອດມາ ໃນການເປັນ ແບບຢ່າງທີ່ດີ ແລະ ເປັນກະບອກສຽງສຳລັບການພັດທະນາໃນ ທະວີບ ອາຟຣິກາ.” ແຕ່ ທ່ານໄດ້ເຕືອນ Addis Ababa ວ່າ “ການໄດ້ມາດັ່ງ ກ່າວນັ້ນຕ້ອງອີງໃສ່ຮາກຖານຂອງ ວິທີການປົກຄອງແບບປະຊາທິປະໄຕ ແລະ ເຄົາລົບນັບຖືສິດທິມະນຸດຖ້າພວກເຂົາເຈົ້າ ຢາກຈະມີຄວາມໝັ້ນຄົງ.”
ທ່ານ Price ບໍ່ໄດ້ກ່າວຊື່ຂອງບັນດານັກຂ່າວທີ່ ສະຫະລັດ ໄດ້ມີຄວາມເປັນຫ່ວງ, ແຕ່ທ່ານໄດ້ ກ່າວຖ່າມກາງການທີ່ມີການໃຊ້ກຳລັງປາມປາມ ຢ່າງຮຸນແຮງ ຕໍ່ພວກທີ່ບໍ່ເຫັນດ້ວຍ.
ໃນວັນເສົາທີ່ຜ່ານມາ, ກຸ່ມປົກປ້ອງສິດທິມະນຸດ Human Rights Watch ໄດ້ ລາຍງານວ່າ ກອງກຳລັງຮັກສາຄວາມປອດໄພ ອີທິໂອເປຍ ໄດ້ສັງຫານຜູ້ປະທ້ວງ ຢ່າງໜ້ອຍ 75 ຄົນດ້ວຍ ການຍິງປືນໃສ່ ໃນລະຫວ່າງການປະທ້ວງຕໍ່ຕ້ານ ລັດຖະ ບານຢູ່ໃນຂົງເຂດ ທີ່ແກ່ຍາວມາເປັນ ເວລາຫຼາຍສັບປະດາ.
