ສະຫະລັດ ກ່າວວ່າ ຕົນຍັງຫວັງວ່າ ຈະສຳເລັດເສັດສິ້ນ ການເຈລະຈາກ່ຽວກັບຂໍ້ຕົກລົງການຄ້າຂະໜາດໃຫຍ່ກັບສະຫະພາບຢູໂຣບພາຍໃນທ້າຍປີ 2016 ນີ້ ເຖິງແມ່ນປະທານາທິບໍດີຝຣັ່ງທ່ານ Francois Hollande ໄດ້ກ່າວໃນວັນອັງຄານວານນີ້ວ່າການເຈລະ ຈາໄດ້ ຕົກຢູ່ໃນສະພາບບໍ່ໄປບໍ່ມາກໍຕາມ.
ທຳນຽບຂາວກ່າວວ່າ ປະທານາທິບໍດີບາຣັກ ໂອບາມາ ຈະສົ່ງທ່ານ Michael Froman ຫົວໜ້າການຄ້າຂອງສະຫະລັດໄປຍັງຢູໂຣບໃນເດືອນກັນຍານີ້ເພື່ອຟື້ນຟູການເຈລະຈາ ທີ່ແນໃສ່ເພື່ອສ້າງຕັ້ງ ເຂດການຄ້າເສລີທີ່ໃຫຍ່ທີ່ສຸດຂອງໂລກ. ສະຫະລັດ ເວລານີ້ຕາມລຳພັງແລ້ວ ເປັນປະເທດທີ່ມີເສດຖະກິດໃຫຍ່ທີ່ສຸດໃນໂລກ ແຕ່ຖ້າເມື່ອໄລ່ຮວມກັນ ສະ ຫະພາບຢູໂຣບ ຊຶ່ງມີສະມາຊິກ 28 ປະເທດແມ່ນມີເສດຖະກິດໃຫຍ່ກວ່າສະຫະລັດອີກ.
ທ່ານ Josh Earnest ໂຄສົກຂອງທຳນຽບຂາວ ກ່າວວ່າ “ທ່າທີຂອງພວກເຮົາ ກ່ຽວກັບເລື້ອງນີ້ ບໍ່ມີຫຍັງປ່ຽນແປງ. ພວກເຮົາຈະສືບຕໍ່ເຮັດວຽກໄປສູ່ເປົ້າໝາຍໃນການສຳເລັດເສັດສິ້ນການເຈລະຈາທັງໝົດ ກ່ອນທ້າຍປີນີ້” ບໍ່ເທົ່າໃດອາທິດ ກ່ອນທີ່ປະທານາທິບໍດີ ໂອບາມາຈະພົ້ນຈາກຕຳແໜ່ງໃນເດືອນມັງກອນ.”
ທ່ານ Hollande ກ່າວວ່າ ຝຣັ່ງມັກຢາກເບິ່ງເລື້ອງຕ່າງໆແບບໜ້າຕໍ່ໜ້າ. ການຫາລືເຫຼົ່າ ນີ້ຈະບໍ່ສາມາດບັນລຸຂໍ້ຕົກລົງພາຍໃນທ້າຍປີນີ້. ການເຈລະຈາໄດ້ຕົກຢູ່ໃນສະພາບບໍ່ໄປ ບໍ່ມາ ທ່າທີຕ່າງໆບໍ່ໄດ້ຮັບການເຄົາລົບ ຄວາມບໍ່ກ້ຳເກິ່ງແມ່ນເຫັນໄດ້ແຈ້ງ.”
ຫົວໜ້າການຄ້າຂອງຝຣັ່ງ ທ່ານ Matthias Fekl ໄດ້ກ່າວຫາວໍຊິງຕັນວ່າ ສະເໜີແຕ່ພຽງ “ສິ່ງເລັກໆນ້ອຍໆ” ຢູ່ໃນການເຈລະຈາ. ທ່ານກ່າວວ່າ ໃນເດືອນໜ້ານີ້ປາຣີຈະຮ້ອງຂໍໃຫ້ກຳມາທິການຢູໂຣບ ຊຶ່ງເປັນຄະນະບໍລິຫານຂອງສະຫະພາບຢູໂຣບ ຢຸດເຊົາການເຈລະ ຈາກັບສະຫະລັດ.
ໃນມື້ວັນອາທິດທີ່ຜ່ານມານີ້ ລັດຖະມົນຕີເສດຖະກິດເຢຍຣະມັນ ທ່ານ Sigma Grabiel ກ່າວວ່າ ການເຈລະຈາ ຄວາມຈິງແລ້ວ ໄດ້ປະສົບກັບຄວາມລົ້ມແຫຼວ ເຖິງແມ່ນວ່າບໍ່ມີຜູ້ໃດຍອມຮັບກ່ຽວກັບເລື້ອງນີ້.
ແຕ່ແນວໃດກໍຕາມ ກຳມາທິການກ່າວໃນວັນຈັນຜ່ານມານີ້ວ່າ ໃນຂະນະທີ່ການເຈລະຈາໃນປັດຈຸບັນນີ້ພວມກ້າວເຂົ້າສູ່ຂັ້ນຕອນທີ່ສຳຄັນແລ້ວກໍຕາມ ແຕ່ຕົນກໍ ຍັງຕ້ອງການຢາກຈະເສັດສິ້ນການເຈລະຈາພາຍໃນທ້າຍປີນີ້ິ້.
