ກອງທະຫານມຽນມາ ໄດ້ປະຕິບັດຕາມແຜນການປຸກລະດົມ ເພື່ອສັງຫານໝູ່ ແລະກໍ່ການຮ້າຍ ຕໍ່ຊາວມຸສລິມໂຣຮິງຢາ, ອີງຕາມກະຊວງການຕ່າງປະເທດສະຫະລັດກ່າວໄວ້ ແຕ່ກໍບໍ່ເຖິງຂັ້ນກັບທີ່ຈະເອີ້ນວ່າເປັນການຂ້າລ້າງເຊື້ອຊາດເຜົ່າພັນ ຫຼືການກໍ່ອາຊະຍາກຳຕ້ານມະນຸດຊາດ.
“ຄວາມຮຸນແຮງຫວ່າງມໍ່ໆມານີ້ໃນລັດຣາໄຄນ໌ທາງພາກເໜືອຂອງປະເທດ ແມ່ນຮ້າຍແຮງ, ຂະໜາດໃຫຍ່ ກວ້າງຂວາງ ແລະ ເບິ່ງຄືວ່າ ຕັ້ງໃຈທີ່ຈະທຳການກໍ່ການຮ້າຍ ໃສ່ພົນລະເມືອງ ແລະຂັບໄລ່ຊາວໂຣຮິງຢາທີ່ອາໄສຢູ່ທີ່ນັ້ນ” ນັ້ນຄືລາຍງານສະບັບໃໝ່ ຂອງຫ້ອງການສືບລັບແລະຄົ້ນຄ້ວາ ທີ່ໄດ້ກ່າວໄວ້.
ພວກສືບສວນ ໄດ້ໂອ້ລົມກັບ ພວກຜູ້ຊາຍແລະພວກແມ່ຍິງຊາວໂຣຮິງຢາ ຈຳນວນ
1 ພັນຄົນ ທີ່ຫລົບໜີໄປຍັງປະເທດບັງກາແດັສ.
ພວກເຂົາເຈົາກ່າວວ່າ ພວກທະຫານຊາວມຽນມາ ຍິງແລະສັງຫານພວກທາລົກ ແລະພວກເດັກນ້ອຍ ແລະພວກຜູ້ຊາຍທີ່ບໍ່ຕິດອາວຸດ ນຳເອົາພວກຊາກສົບຖິ້ມລົງໄປໃນຂຸມຮວມກັນ. ພວກເຄາະຮ້າຍບາງຄົນ ແມ່ນຖືກຈູດໄຟເຜົາທັງເປັນ.
ພວກແມ່ຍິງ ໄດ້ລາຍງານວ່າ ພວກຕົນ ໄດ້ຖືກຂົ່ມຂືນຊຳເລົາເປັນໝູ່ຈາກພວກທະຫານ.
ໃນການສືບສວນກ່ອນໜ້ານີ້ ການສືບສວນສອບສວນຂອງອົງການສະຫະປະຊາຊາດ ໄດ້ກ່າວວ່າ ການເອົາບາດກ້າວຂອງກອງທັບມຽນມາ ແມ່ນໄດ້ກະທຳໄປ “ເພື່ອຈຸດປະສົງໃນການຂ້າລ້າງເຜົ່າພັນ” ແລະຮຽກຮ້ອງໃຫ້ນຳຜູ້ບັນຊາການສູງສຸດ ມາລົງໂທດ.
ລາຍງານດັ່ງກ່າວນີ້ ມີຂຶ້ນບໍ່ເທົ່າໃດຊົ່ວໂມງ ຫຼັງຈາກສະຫະລັດ ໄດ້ປະກາດທີ່ຈະໃຫ້ເງິນ 185 ລ້ານໂດລາ ໃນການຊ່ອຍເຫຼືອ ຊາວໂຣຮິງຢາ. ເງິນສ່ວນໃຫຍ່ນີ້ ຈະສົ່ງໄປສູນອົບພະຍົບ ໃນບັງກາແດັສ ທີ່ຮັບເອົາພວກອົບພະຍົບພວກນີ້, ຊຶ່ງພວກຜູ້ຄົນສ່ວນໃຫຍ່ເວົ້າວ່າ ພວກເຂົາເຈົ້າ ບໍ່ເຊື່ອວ່າ ຈະສາມາດກັບຄືນເມືອບ້ານຂອງພວກເຂົາເຈົ້າ ແລະຢູ່ໄດ້ຢ່າງປອດໄພ.
ມີຊາວໂຣຮິງຢາ ຫຼາຍກວ່າ 700 ພັນຄົນ ທີ່ເປັນຊົນກຸ່ມນ້ອຍ ໄດ້ພາກັນຫລົບໜີເອົາຕົວລອດ ຕອນທີ່ພວກທະຫານເລີ້ມທຳກັນປະຫັດປະຫານພວກເຂົາເຈົ້າ
ຫຼັງຈາກທີ່ກຸ່ມຫົວຮຸນແຮງຊາວໂຣຮິງຢາ ທຳການໂຈມຕີຄ້າຍຕຳຫຼວດມຽນມາ ໃນປີກາຍນີ້.
ຊາວໂຣຮິງຢາ ແມ່ນໄດ້ຈົ່ມວ່າ ມາດົນນານແລ້ວ ພວກຕົນໄດ້ຖືກປະຫັດປະຫານໃນມຽນມາ ຊຶ່ງຮວມທັງການບໍ່ໃຫ້ສັນຊາດນຳ.