ຂ້າຫລວງໃຫຍ່ສິດທິມະນຸດ ຂອງອົງການສະຫະປະຊາຊາດ ທ່ານໂວກເກີ ເທິກ ກ່າວວ່າ ສິດທິມະນຸດໃນທົ່ວໂລກ ແມ່ນຢູ່ໃນສະພາວະອັນຕະລາຍ ເນື່ອງຈາກປະເທດຕ່າງໆ ບໍ່ເຄົາລົບສິດທິ ແລະ ເສລີພາບຂັ້ນພື້ນຖານຂອງທຸກຄົນ ຕາມທີ່ໄດ້ກຳນົດໄວ້ໃນຄຳປະກາດສາກົນກ່ຽວກັບສິດທິມະນຸດ.
ຂ້າຫລວງໃຫຍ່ສິດທິມະນຸດຂອງອົງການສະຫະປະຊາຊາດ ເຊິ່ງກ່າວໃນວັນຈັນນີ້ ໃນພິທີເປີດກອງປະຊຸມໄລຍະ 4 ອາທິດ ຂອງສະພາສິດທິມະນຸດຂອງສະຫະປະຊາຊາດ ກ່າວຕໍ່ຄະນະສະພາທີ່ເຕັມໄປດ້ວຍຜູ້ເຂົ້າຮ່ວມ ວ່າສິດທິມະນຸດ ຊຶ່ງເປັນພື້ນຖານສຳຄັນຂອງອົງການສະຫະປະຊາຊາດ ໃນເວລານີ້ “ຢູ່ໃນຈຸດຫັນປ່ຽນທີ່ສຳຄັນ” ຍ້ອນສິ່ງທີ່ທ່ານໄດ້ກ່າວນັ້ນ ແມ່ນຜົນປະໂຫຍດທີ່ຮັບໃຊ້ຕົນເອງຂອງລັດຖະບານທີ່ກົດຂີ່, ເຊິ່ງໃນທັດສະນະຂອງທ່ານແມ່ນມັນກຳລັງມີຄວາມສຳຄັນ ເໜືອກວ່າການຮ່ວມມືສາກົນ ເພື່ອຊຸກຍູ້ສິດທິມະນຸດ.
ໃນການທົບທວນຄືນ ກ່ຽວກັບສະຖານະການສິດທິມະນຸດທົ່ວໂລກຂອງຫຼາຍສິບປະເທດ, ທ່ານເທິກ ໄດ້ເນັ້ນເຖິງຄວາມໂຫດຮ້າຍ ແລະອາດຊະຍາກໍາຫຼາຍຢ່າງ ທີ່ເກີດຂຶ້ນໃນທຸກພາກພື້ນຂອງໂລກ.
ໃນບົດລາຍງານທີ່ມີພຽງແຕ່ 2 – 3 ລັດຖະບານເທົ່ານັ້ນ ທີ່ບໍ່ໄດ້ຖືກກ່າວເຖິງ, ທ່ານໄດ້ຕິຕຽນຢ່າງໜັກຕໍ່ສະຖິຕິດ້ານສິດທິມະນຸດ ຂອງຮອນດູຣາສ (Honduras), ໂດຍສະແດງຄວາມກັງວົນ ກ່ຽວກັບຄວາມຂັດແຍ້ງກ່ຽວກັບ ທີ່ດິນ ແລະ "ການໂຈມຕີຕໍ່ສິດທິມະນຸດ ແລະນັກອະນຸລັກສິ່ງແວດລ້ອມ." ທ່ານໄດ້ກ່າວປະນາມອຳນາດການປົກຄອງ ຂອງນິກາຣາກົວ (Nicaraguan) ໃນການບ່ອນທຳລາຍສິດທິມະນຸດຂອງປະຊາຊົນຂອງພວກເຂົາ “ດ້ວຍການປາບປາມສັງຄົມພົນລະເຮືອນ ຢ່າງຮຸນແຮງ ແລະການຫຼຸດພື້ນທີ່ຂອງພົນລະເມືອງລົງຢ່າງຫຼວງຫຼາຍ.”