ອົງການຂ້າຫລວງໃຫຍ່ຮັບຜິດຊອບ ເລື້ອງອົບພະຍົບຂອງ
ສະຫະປະຊາຊາດຫລື UNHCR ເວົ້າວ່າ ອົບພະຍົບຈຳ
ນວນ 15,000ຄົນ ທີ່ໄດ້ລົບໜີໄປຢູ່ໄທ ໃນຕົ້ນອາທິດນີ້
ໄດ້ຂ້າມກັບຄືນໄປມຽນມາແລ້ວ.
ແຕ່ອົງການດັ່ງກ່າວກໍໄດ້ສະແດງຄວາມເປັນຫ່ວງວ່າ ມີ
ຫລາຍຄົນອາດກັບຄືນໄປໄວໂພດ ໂດຍທີ່ສະພາບການ
ຍັງບໍ່ປອດໄພສຳລັບເຂົາເຈົ້າເທື່ອ.
ທ່ານ Adrian Edwards ໂຄສົກຂອງອົງການ UNHCR
ເວົ້າວ່າລາຍງານຈາກສະໜາມໃນວັນສຸກມື້ວານນີ້ສະແດງ
ໃຫ້ເຫັນວ່າ ບາງເຂດແມ່ນປອດໄພແລ້ວ ແຕ່ບາງເຂດຍັງເປັນອັນຕະລາຍຢູ່. ທ່ານກ່າວວ່າ
ລາຍງານໄດ້ເວົ້າວ່າ ການສູ້ຮົບກັນໄດ້ເກີດຂຶ້ນຄືນອີກ ໃນວັນພະຫັດ ແລະ ວັນສຸກ ຢູ່ທີ່
ບ້ານ Maekata ແລະ Halokani ແລະທ່ານກ່າວວ່າອາດມີການປະທະກັນເກີດຂຶ້ນອີກ
ກໍເປັນໄດ້.
ທ່ານ Edwards ເວົ້າວ່າ ການສູ້ລົບກັນຄັ້ງໃໝ່ໄດ້ເກີດຂຶ້ນຫຼັງຈາກ ທະຫານໄທໃຫ້ສັນ
ຍານວ່າ ມີຄວາມປອດໄພແລ້ວສຳລັບພວກອົບພະຍົບທີ່ຈະກັບຄືນປະເທດ. ທ່ານເວົ້າວ່າ
ເນື່ອງຈາກສະຖານະການຍັງ ບໍ່ທັນເປັນທີ່ຈະແຈ້ງ ແລະມີການສ່ຽງຕໍ່ຄວາມປອດໄພຢູ່ນັ້ນ
ອົງການ UNHCR ຈຶ່ງຮ້ອງຂໍໃຫ້ລັດຖະບານໄທ ໃຫ້ເວລາເພີ່ມຕື່ມແກ່ພວກອົບພະຍົບ
ເພື່ອຕັດສິນໃຈວ່າ ເຂົາເຈົ້າມີຄວາມຮູ້ສຶກວ່າປອດໄພທີ່ຈະກັບຄືນປະເທດຫຼືບໍ່.
