ອົງການສະຫະປະຊາຊາດ ກຳກັບນຳເລື້ອງໂຣກ AIDS ຫຼື UNAIDS ເຕືອນວ່າ ຄວາມ ກ້າວໜ້າຂອງການຫຼຸດຜ່ອນຂອງການຕິດເຊື້ອໂຣກ HIV
ໃໝ່ ໃນໝູ່ພວກຜູ້ໃຫຍ່ແມ່ນໄດ້ຕົກຢູ່ໃນສະພາບບໍ່ໄປບໍ່ມາ ແລະໃນບາງຂົງເຂດຂອງໂລກ ການຕິດເຊື້ອໂຣກດັ່ງກ່າວ ແມ່ນມີເພີ້ມຂຶ້ນຊໍ້າ. Lisa Schlein ນັກຂ່າວ VOA ເວົ້າວ່າ ລາຍງານນີ້ ນຳອອກເຜີຍແຜ່ ໃນນະຄອນ Geneva ກ່ອນໜ້າກອງປະຊຸມນາໆຊາດ ກ່ຽວກັບໂຣກ AIDS ຈະມີຂຶ້ນໃນສັບປະດາໜ້າ ທີ່ເມືອງ Durban ອາຟຣິກາໃຕ້ ຊຶ່ງພຸດທະສອນ ຈະນຳເອົາລາຍລະອຽດມາສະເໜີທ່ານ ໃນອັນດັບຕໍ່ໄປ.
ອົງການສະຫະປະຊາຊາດ ກຳກັບນຳເລື້ອງໂຣກ AIDS ຫຼື UNAIDS ເອີ້ນແນວໂນ້ມໃໝ່ຂອງການຕິດ ເຊື້ອໂຣກ HIV ວ່າເປັນໜ້າຕົກໃຈ. ໄດ້ມີການສັງເກດຢູ່ໃນທົ່ວໂລກວ່າ ການຕິດເຊື້ອໂຣກດັ່ງກ່າວ ໃນກຸ່ມຜູ້ໃຫຍ່ ແລະພວກເດັກນ້ອຍ ໄດ້ຫຼຸດລົງ ປະມານ 40 ເປີເຊັນ ນັບຕັ້ງແຕ່ໄດ້ມີຈຳນວນສູງສຸດ 3 ລ້ານ ຄົນ ໃນປີ 1997 ເປັນຕົ້ນມາ.
ອົງການດັ່ງກ່າວເວົ້າວ່າ ຄວາມກ້າວໜ້າໃນການຢຸດຢັ້ງກໍລະນີໃໝ່ໃນກຸ່ມພວກເດັກນ້ອຍ ແມ່ນໄດ້ດຳເນີນມີຕໍ່ມາ ດ້ວຍການຫຼຸດລົງຫຼາຍກວ່າ 70 ເປີເຊັນ ນັບຕັ້ງແຕ່ປີ 2001 ເປັນ ຕົ້ນມາ ແຕ່ ອົງການ UNAIDS ພົບເຫັນວ່າ ການຫຼຸດລົງໃນກໍລະນີໃໝ່ ໃນກຸ່ມພວກຜູ້ໃຫຍ່ ໄດ້ຢຸດຊະງັກຢູ່ ນັບຕັ້ງແຕ່ປີ 2010 ແລະຍັງຄົງເປັນຢູ່ຢ່າງສະໝ່ຳສະເໝີ ປະມານ 1 ລ້ານ 9 ແສນ ກໍລະນີ ເປັນເວລາ 5 ປີມາ.
ຜູ້ອຳນວຍການຂອງ ອົງການ UNAIDS ທ່ານ Michel Sidibe ກ່າວວ່າ ໂລກຂອງເຮົາ ຕ້ອງໄດ້ຟ້າວຟັ່ງ ທຳຄວາມພະຍາຍາມປ້ອງກັນໂຣກດັ່ງກ່າວ.
ທ່ານ Sidibe ກ່າວວ່າ “ພວກເຮົາມີໂອກາດຢູ່ 5 ປີ. ຖ້າພວກເຮົາພາດໂອກາດ 5 ປີ ຂ້າງໜ້ານີ້ ໂຣກດັ່ງກ່າວກໍຈະຢ້ອນກັບຄືນມາລະບາດອີກ. ໂຣກດັ່ງກ່າວ ຈະມີຄວາມ ຕ້ານທານ ແລະພວກເຮົາກໍຈະບໍ່ສາມາດຄວບຄຸມການລະບາດຂອງມັນໄດ້ ແລະພວກເຮົາຈະຕ້ອງໃຫ້ແນ່ໃຈວ່າ ຈະຄວມຄຸມມັນໄດ້ ພາຍໃນປີ 2030.”
ລາຍງານດັ່ງກ່າວພົບວ່າ ໃນຢູໂຣບຕາເວັນອອກ ແລະເອເຊຍກາງ ໄດ້ມີການຕິດແປດເຊື້ອໂຣກ HIV ໃໝ່ເພີ້ມຂຶ້ນ 57 ເປີເຊັນ ໃນແຕ່ລະປີ ລະຫວ່າງ 2010 ແລະ 2015. ລາຍງານນີ້ກ່າວວ່າ ໂຣກລະບາດດັ່ງກ່າວ ສ່ວນໃຫຍ່ແມ່ນຈະຢູ່ກັບກຸ່ມທີ່ສັກຢາເສບຕິດ. ລາຍງານນີ້ ເວົ້າວ່າ ຫຼາຍກວ່າ 80 ເປີເຊັນ ຂອງການຕິດເຊື້ອ ໂຣກ HIV ໃໝ່ ໃນປີ 2015 ແມ່ນຢູ່ໃນຣັດເຊຍ.
ທ່ານ Karl Dehne ຫົວໜ້າປ້ອງກັນຂອງອົງການ UNAIDS ບອກ VOA ວ່າ ໃນຂະນະທີ່ຈຳນວນດັ່ງກ່າວນີ້ ແມ່ນສູງຫຼາຍ ກໍລະນີໃໝ່ໆແມ່ນມີຢູ່ໃນເຂດໃຕ້ທະເລຊາຍຊາຮາຣາ ໃນ ອາຟຣິກາ.
ທ່ານ Dehne ກ່າວວ່າ “ປະມານເຄິ່ງນຶ່ງຂອງກໍລະນີທີ່ຕິດໂຣກດັ່ງກ່າວ ແມ່ນຢູ່ ສະເພາະໃນພາກຕາເວັນອອກ ແລະພາກໃຕ້ຂອງ ອາຟຣິກາເທົ່ານັ້ນ. ສະນັ້ນ ຈຶ່ງວ່າ ເຖິງແມ່ນມັນຈະມີຈຳນວນຫຼຸດນ້ອຍລົງກໍຕາມ ກໍບໍ່ໄດ້ໝາຍຄວາມວ່າ ພວກເຮົາໄດ້ຊະນະສົງຄາມແລ້ວ. ພວກເຮົາຈຳເປັນຕ້ອງໄດ້ເຮັດຫຼາຍອີກຢູ່ຫັ້ນ ດັ່ງນັ້ນ ເຖິງແມ່ນວ່າ ຢູ່ໃນພາກຕາເວັນອອກຂອງຢູໂຣບ ໂຣກລະບາດນີ້ຈະມີເພີ້ມຂຶ້ນ ມັນກໍບໍ່ໄດ້ໝາຍຄວາມວ່າ ພວກເຮົາຈະພໍໃຈໃນສະພາບການຂອງພາກຕາເວັນອອກ ແລະພາກໃຕ້ຂອງອາຟຣິກາ.”
ລາຍງານນີ້ກ່າວວ່າ ໃນໝູ່ພວກເດັກສາວ ຂອງຂົງເຂດໃຕ້ທະເລຊາຍຊາຮາຣາ ໃນອາ ຟຣິກາ ແມ່ນມີຄວາມສ່ຽງສູງໂດຍສະເພາະ ຕໍ່ໂຣກ HIV-AIDS ປະມານ 75 ເປີເຊັນ ຂອງກໍລະນີໃໝ່ ໃນໝູ່ພວກສາວໄວລຸ້ນ 10 ຫາ 19 ປີ.
ລາຍງານນີ້ເວົ້າວ່າ ກຸ່ມທີ່ຫຼໍ່ແຫຼມອື່ນໆ ກໍແມ່ນມີຮວມທັງ ພວກຜູ້ຊາຍກະເທີຍ ແລະພວກຜູ້ຊາຍອື່ນໆ ທີ່ຮ່ວມເພດກັບພວກຜູ້ຊາຍດ້ວຍກັນ ພວກບໍລິການທາງເພດແລະພວກລູກຄ້າຂອງເຂົາເຈົ້າ ພວກແປງເພດ ພວກສັກຢາເສບຕິດ ແລະພວກນັກໂທດ.
ອ່ານຂ່າວນີ້ເປັນພາສາອັງກິດເພີ່ມຕື່ມ
