ສປຊ ຂໍຮ້ອງໃຫ້ ການເລືອກຕັ້ງຢູ່ໄທ ເປັນທີ່ໜ້າເຊື່ອຖື

ເລຂາທິການໃຫຍ່ຂອງອົງການສະຫະປະຊາຊາດ ທ່ານ Ban Ki-moon ຮຽກຮ້ອງໃຫ້ທຸກ ພັກການເມືອງທີ່ເຂົ້າຮ່ວມການເລືອກຕັ້ງຢູ່ປະເທດໄທໃນມື້ວັນອາທິດຈະມານີ້ໃຫ້ທຳໂຕເປັນ ທີ່ໜ້າເຊື່ອຖືແລະມີຄວາມເປັນທຳ ແລະໃຫ້ຮັບເອົາແລະໃຫ້ເຄົາລົບຕໍ່ການຕັດສິນໃຈຂອງປະ
ຊາຊົນ ຕາມທີ່ໄດ້ສະແດງອອກໃນການປ່ອນບັດນັ້ນ.

ໃນຖະແຫຼງການສະບັບນຶ່ງທີ່ນຳອອກເຜີຍແຜ່ໃນມື້ວັນພຸດວານນີ້ທ່ານ Ban ເວົ້າວ່າ ທ່ານ
ພວມຕິດຕາມເບິ່ງການເລືອກຕັ້ງໃນໄທຢ່າງໃກ້ຊິດແລະກໍຫວັງວ່າຄົງຈະບໍ່ມີຄວາມຮຸນແຮງ
ເກີດຂຶ້ນໃນການເລືອກຕັ້ງຄັ້ງນີ້. ທ່ານກ່າວວ່າ ການເລືອກຕັ້ງທີ່ຍຸຕິທຳ ແລະໜ້າເຊື່ອຖືຈະ
ມີສ່ວນເຮັດໃຫ້ການປົກຄອງແບບປະຊາທິປະໄຕຢູ່ໃນປະເທດໄທມີຄວາມເຂັ້ມແຂງຕື່ມຂຶ້ນ.

ທ່ານ Ban ບໍ່ໄດ້ເວົ້າເຖິງຄວາມວິຕົກກັງວົນໃດນຶ່ງ ຢ່າງເປັນການສະເພາະ ກ່ຽວກັບການ
ເລືອກຕັ້ງ ໃນມື້ວັນອາທິດຈະມາ ຊຶ່ງເປັນການເລືອກຕັ້ງເທື່ອທຳອິດ ນັບແຕ່ຄວາມເຄັ່ງຕຶງ
ທາງດ້ານການເມືອງ ໄດ້ລະເບີດຂຶ້ນກາຍເປັນຄວາມຮຸນແຮງທີ່ເຮັດໃຫ້ມີຜູ້ເສຍຊີວິດຫຼາຍ
ກວ່າ 90 ຄົນໃນປີກາຍ. ແຕ່ພວກນັກສັງເກດການກ່ຽວກັບການເລືອກຕັ້ງຂອງນາໆຊາດ
ແລະສື່ມວນຊົນຂອງໄທເອງຕ່າງກໍກ່າວວ່າ ການຊື້ຄະແນນສຽງ ແມ່ນຖືເປັນຂອງທຳມະດາ
ໃນການເລືອກຕັ້ງຂອງໄທ.

ຄະນະກຳມາທິການເລືອກຕັ້ງຂອງໄທ ພວມທຳການສືບສວນ ເບິ່ງການຮ້ອງຮຽນຫຼາຍສິບ
ກໍລະນີກ່ຽວກັບການຊື້ສຽງ ຂະນະທີ່ໜັງສືພິມ The Nation ຂອງໄທລາຍງານວ່າລາຄາ
ສຳລັບຊື້ຄະແນນສຽງໆນຶ່ງ ຢູ່ໃນເຂດບາງກອກເວລານີ້ ແມ່ນ ຢຸູ່ໃນລະຫວ່າງ 16 ຫາ 65
ໂດລາ.