ອົງການສະຫະປະຊາຊາດ ກ່າວວ່າ ຕົນກຳລັງສະແຫວງຫາທຶນ 50 ລ້ານ 5 ແສນ
ໂດລາ ຈາກປະຊາຄົມນານາຊາດ ເພື່ອສະໜອງການບັນເທົາທຸກ ໃຫ້ແກ່ ຊາວອິນໂດ-
ເນເຊຍ 191,000 ຄົນ ທີ່ໄດ້ຮັບຜົນກະທົບ ຍ້ອນແຜ່ນດິນໄຫວ ແລະຟອງຍັກສຸນາມິ
ຢູ່ໃນພາກກາງຂອງເກາະສຸລາເວສີ ເມື່ອສັບປະດາແລ້ວນີ້.
ອົງການດັ່ງກ່າວໄດ້ປະກາດແຜນການຂອງຕົນ ໃນວັນສຸກວານນີ້ ໂດຍກ່າວວ່າ ຕົນໄດ້
ຕັ້ງໂຄງການປຶກສາຂຶ້ນມາ ຮ່ວມກັບຄູ່ຮ່ວມງານ ຢູ່ໃນລັດຖະບານຂອງ ອິນໂດເນເຊຍ.
ໂຄງການດັ່ງກາວແມ່ນເວົ້າເຖິງການສະໜັບສະໜູນທີ່ຕ້ອງການ ຈາກປະຊາຄົມນານາ
ຊາດ ສຳລັບໄລຍະ 3 ເດືອນຂ້າງໜ້າ.
ຈຳນວນຂອງຜູ້ເສຍຊີວິດ ຈາກເຫດການແຜ່ນດິນໄຫວ ແລະ ຟອງຍັກຊູນາມິ ເມື່ອວັນ
ທີ 28 ກັນຍາ ຢູ່ທີ່ເກາະສຸລາເວສີທາງພາກກາງຂອງປະເທດ ໄດ້ກາຍ ຈຳນວນ 1,600
ເປັນ 1,649 ຄົນ ແລະປະມານ 2,500 ຄົນ ມີລາຍງານວ່າ ໄດ້ຮັບບາດເຈັບສາຫັດ.
ອົງການສະຫະປະຊາຊາດ ໄດ້ກ່າວໃນຖະແຫລງການ ວ່າ 113 ຄົນຍັງຄົງຫາຍສາບສູນ.
ປະມານ 70,000 ຄົນໄດ້ຖືກຍົກຍ້າຍອອກ ຈາກພື້ນທີ່.
ທ່ານນາງ ອານິຕາ ນີໂຣດີ ຜູ້ປະສານງານຂອງອົງການສະຫະປະຊາຊາດປະ ຈຳອິນໂດ-
ເນເຊຍ ໄດ້ກ່າວວ່າ ຜົນກະທົບຈາກໄພພິບັດ ຢ່າງຄົບຖ້ວນ ແລະ ຄວາມຕ້ອງການ ໃນ
ການຟື້ນຟູ ແມ່ນເປັນທີ່ຈະແຈ້ງແລ້ວນະບັດນີ້ ຫຼັງຈາກນຶ່ງ ສັບປະດາໄດ້ຜ່ານໄປ. ທ່ານ
ນາງໄດ້ກ່າວຕື່ມວ່າ ແຜນການດັ່ງກ່າວ ບໍ່ພຽງແຕ່ ປະກອບດ້ວຍ ການບັນເທົາທຸກ ໃນ
ທັນທີ ເທົ່ານັ້ນ ແຕ່ຍັງມີການສະໜັບສະໜູນ ທາງດ້ານການວາງແຜນ ຈັດແຈງສິ່ງຂອງ
ທີ່ຕ້ອງການ ເພື່ອນຳສົ່ງການຊ່ອຍເຫຼືອ ໄປໃຫ້ພວກຄົນຜູ້ທີ່ຕ້ອງການ.
ນອກນັ້ນແລ້ວ ໃນວັນສຸກວານນີ້ ຮອງປະທານາທິບໍດີຂອງອິນໂດເນເຊຍ ທ່ານ ຈູສັຟ
ຄາລລາ ໄດ້ເດີນທາງໄປຢ້ຽມຢາມເມືອງປາລູ ຊຶ່ງໄດ້ຖືກກະທົບຢ່າງໜັກ ໂດຍຟອງຍັກ
ຊູນາມິ.
ຄາດກັນວ່າ ທ່ານ ຄາລລາ ຈະເດີນທາງໄປຢ້ຽມຢາມພວກຜູ້ເຄາະຮ້າຍ ທີ່ໄດ້ຮັບການ
ປິ່ນປົວ ຢູ່ທີ່ໂຮງໝໍໃນທ້ອງຖິ່ນ ແລ້ວເຂົ້າຮ່ວມໃນພິທີສູດມົນພາວະນາ ແລະ ສັງເກດ
ການເບິ່ງການແຈກຍາຍເຄື່ອງບັນເທົາທຸກໄພພິບັດ ຢູ່ທີ່ທ່າເຮືອ ໃນທ້ອງຖິ່ນນຳດ້ວຍ.
ທ່ານໄດ້ກ່າວສັ້ນໆ ຢູ່ທີ່ກອງປະຊຸມຖະແຫລງຂ່າວ ເຊິ່ງທ່ານໄດ້ໃຫ້ກຳລັງໃຈ ຕໍ່ປະຊາ
ຊົນທຸກຄົນ ທີ່ໃຫ້ຮ່ວມມືກັບລັດຖະບານ ແລະ ບັນດາເຈົ້າໜ້າທີ່ທ້ອງຖິ່ນ ເພື່ອບູລະນະ
ສ້າງສາເມືອງດັ່ງກ່າວຄືນໃໝ່.
ໃນຕອນເຊົ້າວັນສຸກວານນີ້ ທີ່ເມືອງປາລູ ພວກຜູ້ລອດຊີວິດ ໄດ້ພາກັນ ເຕົ້າໂຮມກັນ
ເພື່ອຈັດພິທີສູດມົນພາວະນາຕາມປະເພນີ ທຸກໆສັບປະດາ.
