ຢູເຄຣນ ໄດ້ປະກາດວັນສໍາລັບໄວ້ອາໄລໃນວັນອັງຄານມື້ນີ້, ແລະ ສະພາ ຄວາມໝັ້ນຄົງສະຫະປະຊາຊາດ ມີກຳນົດຈັດກອງປະຊຸມສຸກເສີນ ລຸນຫຼັງການ ໂຈມຕີດ້ວຍລູກສອນໄຟຂອງ ຣັດເຊຍ ທີ່ສົ່ງຜົນເຮັດໃຫ້ມີຜູ້ເສຍຊີວິດຢ່າງໜ້ອຍ 37 ຄົນ ແລະບາດເຈັບອີກຫຼາຍກວ່າ 170 ຄົນ.
ໃນບັນດາເປົ້າໝາຍທີ່ຖືກໂຈມຕີໃສ່ຫຼາຍໂຕເມືອງນັ້ນ ແມ່ນໂຮງໝໍເດັກໃນນະຄອນຫຼວງກີຢິບ, ເຊິ່ງເປັນສ່ວນນຶ່ງຂອງການໂຈມຕີໃນຊ່ວງກາງເວັນ ທີ່ເຈົ້າຄອງນະຄອນ ທ່ານ ວິຕາລີ ຄລິຈໂຄ (Vitali Klitschko) ໄດ້ອະທິບາຍ ອອກມາວ່າ ເປັນນຶ່ງໃນການໂຈມຕີທີ່ໃຫຍ່ທີ່ສຸດຂອງສົງຄາມ.
ປະທານາທິບໍດີຢູເຄຣນ ທ່ານ ໂວໂລດີເມຍ ເຊເລັນສກີ ກ່າວໃນຕອນແລງວັນຈັນວານນີ້ວ່າ “ພວກກໍ່ການຮ້າຍ ຣັດເຊຍ ຕ້ອງຮັບຜິດຊອບຕໍ່ເຫດການໃນຄັ້ງນີ້, ມີແຕ່ສະແດງຄວາມກັງວົນແມ່ນບໍ່ສາມາດຢຸດການກໍ່ການຮ້າຍໄດ້. ຄວາມ ໂສກເສົ້າ ບໍ່ແມ່ນອາວຸດ. ພວກເຮົາຈໍາເປັນຕ້ອງຍິງລູກສອນໄຟຂອງ ຣັດເຊຍ ຕົກ. ເຮືອບິນລົບຂອງຣັດເຊຍ ຕ້ອງຖືກທໍາລາຍໃນຖານຂອງພວກມັນ. ທຸກໆ ບາດກ້າວທີ່ເຂັ້ມແຂງ ຕ້ອງຖືກນໍາມາໃຊ້ເພື່ອລຶບລ້າງການຂາດດຸນດ້ານຄວາມ ໝັ້ນຄົງ.”
ພ້ອມດ້ວຍບັນດາຜູ້ນໍາຂອງອົງການ NATO ທີ່ກໍາລັງເປີດກອງປະຊຸມສຸດຍອດ ຢູ່ນະຄອນຫຼວງວໍຊິງຕັນໃນວັນອັງຄານມື້ນີ້, ທ່ານ ເຊເລັນສກີ ຍັງກ່າວອີກວ່າ ໂລກມີຄວາມສາມາດທີ່ຈະສະໜອງສິ່ງຕ່າງໆທີ່ ຢູເຄຣນ ຕ້ອງການ ໃຫ້ແກ່ ຢູເຄຣນ ໄດ້, ແລະການຕັດສິນໃຈດັ່ງກ່າວນັ້ນ ແມ່ນ “ຈໍາເປັນຕ້ອງໄວທີ່ສຸດ ເທົ່າທີ່ຈະໄວໄດ້.”
In photos: Russia's attack on Kyiv children's hospital
Tuesday attacks
ປະທານາທິບໍດີສະຫະລັດ ທ່ານ ໂຈ ໄບເດັນ ຮ້ອງການໂຈມຕີດ້ວຍລູກສອນໄຟຂອງຣັດເຊຍວ່າ “ເປັນການເຕືອນໃຈທີ່ເປັນຕາຢ້ານທີ່ສຸດ ກ່ຽວກັບຄວາມໂຫດຮ້າຍຂອງ ຣັດເຊຍ,” ແລະໃຫ້ຄຳໝັ້ນສັນຍາວ່າ ຈະ “ບໍ່ສັ່ນຄອນ” ການສະໜັບສະໜູນຂອງ ສະຫະລັດ ຕໍ່ ຢູເຄຣນ ໄດ້.
ທ່ານ ໄບເດັນ ກ່າວຢູ່ຖະແຫຼງການສະບັບນຶ່ງໃນຕອນແລງວັນຈັນວານນີ້ວ່າ “ການຮວມເຂົ້າກັນຂອງບັນດາພັນທະມິດພວກເຮົາ, ພວກເຮົາຈະປະກາດມາດຕະການໃໝ່ ສໍາລັບເສີມຂະຫຍາຍກຳລັງປ້ອງກັນອາກາດຂອງ ຢູເຄຣນ ເພື່ອຊ່ວຍປົກປ້ອງບັນດາເມືອງ ແລະ ພົນລະເຮືອນທັງຫຼາຍຂອງພວກເຂົາເຈົ້າ ຈາກການບຸກໂຈມຕີຂອງ ຣັດເຊຍ. ສະຫະລັດ ຈະຢືນຄຽງຂ້າງກັບປະຊາຊົນ ຢູເຄຣນ.”
ຟໍຣັມສະແດງຄວາມຄິດເຫັນ