ສະຫະລັດ ແລະ ບັນດາ 11 ປະເທດພັນທະມິດ, ໃນວັນພຸດວານນີ້ ໄດ້ຮ່ວມກັນເຕືອນ ພວກຫົວຮຸນແຮງຮູຕີໃນເຢເມນ ກ່ຽວກັບຜົນທີ່ຈະຕິດຕາມມາ ເຊິ່ງບໍ່ໄດ້ລະບຸໄວ້, ເວັ້ນແຕ່ວ່າ ພວກເຂົາຈະຍຸຕິການໂຈມຕີຕໍ່ກຳປັ່ນບັນທຸກສິນຄ້າ ທີ່ແລ່ນຜ່ານຂົງເຂດທະເລແດງ.
"ຂໍໃຫ້ຂໍ້ຄວາມຂອງພວກເຮົາໃນປັດຈຸບັນນີ້ ເປັນອັນແຈ່ມແຈ້ງ, ພວກເຮົາຂໍຮຽກ ຮ້ອງໃຫ້ຍຸຕິການໂຈມຕີທີ່ຜິດກົດຫມາຍເຫຼົ່ານີ້ໃນທັນທີ ພ້ອມທັງປ່ອຍຂະບວນເຮືອ ແລະບັນດາລູກເຮືອ ທີ່ຖືກກັກຂັງຢ່າງຜິດກົດຫມາຍນັ້ນ", ອີງຕາມການກ່າວໃນຖະແຫຼງການຂອງປະເທດຕ່າງໆ ທີ່ນໍາອອກເຜີຍແຜ່ໂດຍທໍານຽບຂາວ.
ທັງ 12 ປະເທດກ່າວວ່າ "ພວກຫົວຮຸນແຮງຮູຕີ ຈະຮັບຜິດຊອບຕໍ່ຜົນທີ່ເກີດຂຶ້ນຖ້າພວກເຂົາຍັງສືບຕໍ່ຂົ່ມຂູ່ຕໍ່ຊີວິດ, ຕໍ່ລະບົບເສດຖະກິດຂອງໂລກ ແລະການລັ່ງໄຫຼໄປມາຂອງການຄ້າເສລີ ໃນຂົນສົ່ງທາງນໍ້າ ທີ່ສໍາຄັນຂອງພາກພື້ນນີ້.
ຜູ້ລົງນາມໃນຖະແຫຼງການດັ່ງກ່າວລວມມີ ອັງກິດ, ເຊິ່ງໃນວັນຈັນແລ້ວນີ້ ໄດ້ອອກຄໍາເຕືອນຂອງຕົນ ຕໍ່ພວກຫົວຮຸນແຮງຮູຕີ ກ່ຽວກັບ "ການດໍາເນີນການໂດຍກົງ," ເຊັ່ນດຽວກັບ ອອສເຕຣເລຍ, ການາດາ, ເຢຍຣະມັນ ແລະຍີ່ປຸ່ນ.
