ຈໍແດນ ໄດ້ແຈກຢາຍຮ່າງຍັດຕິຂອງສະພາຄວາມໝັ້ນຄົງອົງການ
ສະຫະປະຊາຊາດໃນແລງ ວັນພຸດວານນີ້ ທີ່ຈະຍົກເລີກການຂາຍ
ອາວຸດໃຫ້ແກ່ລັດຖະບານລີເບຍ ດຳເນີນງານເພື່ອຍຸດຕິບໍ່ໃຫ້ມີ
ການສົ່ງອາວຸດໄປໃຫ້ພວກກະບົດ ແລະຊຸກຍູ້ໃຫ້ລັດຖະບານລີເບຍ
ທີ່ນາໆຊາດຮັບຮູ້ ກັບຄືນໄປສູ່ນະຄອນຫຼວງ Tripoli.
ສະພາຄວາມໝັ້ນຄົງອົງການສະຫະປະຊາຊາດ ໄດ້ພົບປະກັນກ່ອນໜ້ານີ້ ເພື່ອປຶກສາຫາລືສຸກເສີນ ກ່ຽວກັບສະຖານະການໃນລີເບຍ ບ່ອນທີ່ພວກທະຫານບ້ານ ແລະສອງລັດຖະບານທີ່ຕັ້ງຂຶ້ນມາແຂ່ງກັນ ພາໃຫ້ປະເທດດັ່ງກ່າວບໍ່ມີສະຖຽນລະພາບ ມາໂດຍຕະຫລອດ ຫຼັງຈາກທີ່ໄດ້ໂຄ່ນລົ້ມ ມື້ລາງຈອມຜະເດັດການ Moammar Gadhafi. ການພົບປະກັນທີ່ວ່ານີ້
ມີຂຶ້ນບໍ່ເທົ່າໃດມື້ ຫຼັງຈາກພວກຫົວຮຸນແຮງກຸ່ມລັດອີສລາມ ໄດ້ນຳວີດີໂອອອກເຜີຍແຜ່
ທີ່ສະແດງໃຫ້ວ່າ ໄດ້ມີການຕັດຫົວຊາວອີຈິບ 21 ຄົນ ທີ່ນັບຖືສາສະໜາຄຣິສ ຊຶ່ງໄດ້ຖືກລັກພາຕົວໄປໃນລີເບຍນັ້ນ.
ລັດຖະມົນຕີການຕ່າງປະ ເທດຂອງລີເບຍ ທ່ານ Mohammed al-Dairi ເອີ້ນ ສະຖານະການໃນລີເບຍວ່າ “ຮ້າຍແຮງ” ແລະໄດ້ກ່າວຕໍ່ສະພາຄວາມໝັ້ນຄົງວ່າ ໂລກມີຄວາມຮັບຜິດ
ຊອບຕໍ່ການປົກປັກຮັກສາສັນຕິພາບ ແລະສະຖຽນລະພາບ ຢູ່ໃນປະເທດດັ່ງກ່າວ.
