ລິ້ງ ສຳຫລັບເຂົ້າຫາ

ວັນສຸກ, ໒໙ ມີນາ ໒໐໒໔

​ການຟື້ນ​ຟູ ​ກິດຈະກຳ ນິວ​ເຄລຍ ຂອງພຽງຢາງ ລະເມີດຕໍ່ມະຕິ ສປຊ


ພາບຈາກ GeoEye ວະແດງໃຫ້ເຫັນ​ໂຮງ​ໄຟຟ້າ​ນິວ​ເຄລຍ Yongbyon ໃນ Yongbyon, ​ເກົາຫຼີ​ເໜືອ.
ພາບຈາກ GeoEye ວະແດງໃຫ້ເຫັນ​ໂຮງ​ໄຟຟ້າ​ນິວ​ເຄລຍ Yongbyon ໃນ Yongbyon, ​ເກົາຫຼີ​ເໜືອ.

ສະ​ຫະລັດ​ ໄດ້​ສະ​ແດງ​ຄວາມ​ເປັນ​ຫ່ວງ​ເປັນໃຍຄັ້ງ​ໃໝ່ກ່ຽວ​ກັບ​ເກົາຫຼີ​ເໜືອ ຫຼັງ​ຈາກ​ທີ່​ໄດ້​ມີ​ຮ່ອງຮອຍ​ວ່າ ພຽງ​ຢາງທຳ​ການຟື້ນ​ຟູ​ກິດຈະກຳ​ນິວ​ເຄລຍ ທີ່​ສາມາດ​ອຳນວຍ​ໃຫ້ເກົາຫຼີ​ເໜືອ ຜະລິດ​ທາດ plutonium ພຽງພໍ​ສຳ​ລັບ​ເຮັດ​ລະ​ເບີດປະລະມານູ​ໄດ້ນຶ່ງ​ລູກ ​ໃນແຕ່ລະ​ປີ.

ການ​ປະກາດ​ ​ໂດຍ​ສະ​ຖາ​ບັນ​ພະລັງງານ​ປະລະມານູ​ເກົາຫຼີ​ເໜືອ ​ໃນ​ການ​ຕອບ​ຄຳ​ຖາມ ຢ່າງ​ເປັນ​ລາຍ​ລັກ​ອັກສອນ​ຂອງອົງການ​ຂ່າວ Kyodo ຂອງ​ຍີ່ປຸ່ນນັ້ນ ​ໃຫ້ການ​ຢືນຢັນ​ຕໍ່​ອັນ​ທີ່​ປະ ຊາ​ຄົມ​ສືບ​ລັບ ພວກ​ນັກວິຊາການ ​ແລະ​ພວກ​ນັກວິ​ເຄາະ​ໄດ້​ກ່າວ​ມາ​ເປັນ​ເວລາ​ຫຼາຍໆ​ເດືອນ​ແລ້ວ​ວ່າ ພຽງ​ຢາງ​ໄດ້ປະຕິບັດ​ຕາມ​ຄຳ​ປະຕິ​ຍານ​ຂອງຕົນ​ ທີ່ຈະ​ຮື້​ຟື້ນກິດຈະ ກຳ ​ຕ່າງໆ​ຢູ່​ໂຮງ​ໄຟຟ້າ​ນິວ​ເຄລຍ Yongbyon ຄືນ​ອີກ.

“ຖ້າ​ຫາກ​ວ່າ​ລາຍ​ງານເຫຼົ່າ​ນີ້​ເປັນ​ທີ່​ຖືກຕ້ອງ ​ແນ່​ອນມັນ​ເປັນ​ການລະ​ເມີດຢ່າງ​ຈະ​ແຈ້ງຕໍ່ ມະຕິ​ຕ່າງໆຂອງ​ສະພາ​ຄວາມ​ໝັ້ນຄົງ ອົງການ​ສະຫະ​ປະຊາ​ຊາດ ທີ່​ໄດ້​ຫ້າມ​ບໍ່​ໃຫ້​ດຳ​ເນີນກິດຈະ ກຳດັ່ງກ່າວ​,​” ນັ້ນຄື​ຄຳ​ເວົ້າຂອງ​ທ່ານ Mark Toner ຮອງ​ໂຄສົກ​ກະຊວງ​ການ​ຕ່າງປະ​ເທດ ​ສະຫະລັດ ທີ່ໄດ້​ຕອບ​ຄຳ​ຖາມ​ຂອງ VOA.

ການ​ຢືນຢັນ​ທີ່​ວ່າ​ນີ້ ບໍ່​ໄດ້​ເປັນ​ເລື້ອງ​ໜ້າປະຫຼາດ​ໃຈ​ ແລະ​ຕົ້ນຕໍ ແລ້ວ​ກໍ​ແມ່ນ​ເພື່ອ​ໃຫ້​ໄດ້​ຮັບຄວາມ​ສົນ​ໃຈ ​ໃນ​ຂະນະ​ທີ່​ເກົາຫຼີ​ເໜືອ “ມີ​ຄວາມ​ຈຳ​ເປັນ​ທີ່​ຈະ​ເພີ້​ມທະວີ​ຄວາມ​ເຄັ່ງ​ຕຶງ​ແລະ​ວິ​ກິດ​ການ​ຂຶ້ນ​,” ນັ້ນຄື​ຄຳ​ເວົ້າຂອງທ່ານ​ນາງ Kongdan “Kathy” Oh ນັກຊ່ຽວຊານ​ອາວຸ​ໂສ​ຝ່າຍ​ເອ​ເຊຍ ຈາກ​ສະ​ຖາ​ບັນວິໄຈດ້ານປ້ອງ​ກັນປະ​ເທດ ທີ່​ເມືອງ Alexandria, ລັດ Virginia.

ຜູ້ນຳເກົາຫຼີ​ເໜືອ ທ່ານ Kim Jong Un ​ເພື່ອ​ສ້າງ​ຄະ​ແນນ​ນິຍົມ​ພາຍ​ໃນປະ​ເທດ ​ແລະ​ຄວາມກ່ຽວ​ພັນກັບນາໆ​ຊາດ​ແລ້ວ ​ແມ່ນ​ຕ້ອງການ​ຢາກ​ຈະ​ບອກ​ທັງ​ໂລກ​ວ່າ “​ໃຫ້​ຄວາມເຄົາ​ລົບຢຳ​ເກງ ​ແລະ​ປະພຶດ​ກັບ​ຂ້ອຍ​ໃນ​ຖານະ​ຜູ້ນຳ​ດ້ານ​ນິວ​ເຄລຍ,” ທີ່​ທ່ານ​ນາງ Oh ຜູ້​ຊຶ່ງ​ໄດ້​ລາຍ​ງານ​ເປັນ​ປະຈຳ ໃຫ້​ກັບ​ເຈົ້າ​ໜ້າ​ທີ່​ລັດຖະບານ​ສະຫະລັດນັ້ນ ​ໄດ້​ບອກ​ກັບ VOA.

​ອ່ານ​ຂ່າວ​ນີ້​ເພີ້​ມຕື່ມ​ເປັນ​ພາສາ​ອັງກິດ

XS
SM
MD
LG