ພັນທະມິດ ສະຫະລັດ ໃນເຂດເອເຊຍຕາເວັນອອກ ໄດ້ສະແດງຄວາມຍິນດີຕໍ່ການຂະ ຫຍາຍມາດຕະການລົງທີ່ໜັກກວ່າເກົ່າຕໍ່ ເກົາຫຼີເໜືອ ໂດຍສະພາຄວາມໝັ້ນຄົງ ອົງການ ສະຫະປະຊາຊາດ ໃນວັນພະຫັດມື້ນີ້, ແຕ່ບາງປະເທດຢູ່ໃນພາກພື້ນໄດ້ຫວັງວ່າ ມາດຕະ ການລົງໂທດໃໝ່ພວກນີ້ ຈະຍັບຢັ້ງລັດຖະບານຂອງທ່ານ Kim Jong Un ໄດ້.
ນາຍົກລັດຖະມົນຕີ ຍີ່ປຸ່ນ ທ່ານ Shinzo Abe ໄດ້ອອກຖະແຫຼງການສະໜັບສະໜູນມະ ຕິໃໝ່ຂອງສະພາ ໂດຍກ່າວວ່າ ມັນ “ໄດ້ສະທ້ອນໃຫ້ເຫັນເຖິງຄວາມຕັ້ງໃຈຂອງປະຊາ ຄົມນານາຊາດ ທີ່ຈະເອົາມາດຕະ ການອັນໜັກແໜ້ນ ທີ່ມັນມີຂອບເຂດແຕກຕ່າງຈາກ ຄັ້ງທີ່ຜ່ານມາໂດຍຊິ້ນເຊີງ.”
ລັດຖະບານ ເກົາຫຼີໃຕ້ ໄດ້ຮຽກຮ້ອງໃຫ້ ເກົາຫຼີເໜືອ ເອົາໃຈໃສ່ກັບຄຳເຕືອນຂອງປະຊາ ຄົມນານາຊາດ ເພື່ອຢຸດໂຄງການນິວເຄລຍຂອງພວກເຂົາເຈົ້າ ຫຼືບໍ່ກໍຈະປະເຊີນໜ້າກັບ ຜົນທີ່ຕິດຕາມມາ.
ໂຄສົກກະຊວງການຕ່າງປະເທດ ທ່ານ Cho June-hyuck ໄດ້ກ່າວວ່າ “ພວກເຂົາເຈົ້າ ຈະບໍ່ພຽງແຕ່ປະເຊີນໜ້າ ກັບຄວາມຫຍຸ້ງຍາກທາງເສດຖະກິດ ແລະ ຖືກໂດດດ່ຽວທາງ ການທູດເພີ່ມເຕີມເທົ່ານັ້ນ, ແຕ່ພວກເຂົາເຈົ້າຍັງຈະໝົດສິດ ແລະ ອຳນາດພິເສດຂອງ ພວກເຂົາເຈົ້າ ໃນຖານະເປັນສະມາຊິກຂອງອົງການສະຫະປະຊາຊາດ ອີກດ້ວຍ.”
ນອກນັ້ນ ລັດຖະບານ ເກົາຫຼີໃຕ້ ກໍຍັງໄດ້ປະກາດວ່າ ພວກເຂົ້າເຈົ້າຈະວາງມາດຕະການ ລົງໂທດຝ່າຍດຽວເພີ່ມເຕີມເຊັ່ນກັນ.
ສະພາຄວາມໝັ້ນຄົງ ໄດ້ວາງມາດຕະການລົງໂທດທີ່ຮ້າຍແຮງຍິ່ງຂຶ້ນກວ່າເກົາຫຼາຍຮອບ, ໂດຍແນເປົ້າໃສ່ ເກົາຫຼີເໜືອ ນັບຕັ້ງແຕ່ປີ 2006 ເປັນຕົ້ນມາ. ບັນດານັກການທູດໄດ້ກ່າວ ວ່າ ມາດຕະການເຫຼົ່ານີ້ໄດ້ເຮັດໃຫ້ການເດີນໜ້າໄປສູ່ການມີອາວຸດນິວເຄລຍຢູ່ໃນຄວາມຄອບຄອງ ຂອງເກົາຫຼີເໜືອ ຊ້າລົງກວ່າເກົ່າ, ແຕ່ຈົນເຖິງດຽວນີ້ ມັນຍັງບໍ່ສາມາດທີ່ຈະຊັກ ຊວນໃຫ້ ເກົາຫຼີເໜືອ ປະຖິ້ມໂຄງການ ອາວຸດນິວເຄລຍຂອງພວກເຂົາເຈົ້າ.
ມາດຕະການລົງໂທດທາງເສດຖະກິດຮອບໃໝ່ນີ້, ແມ່ນເພື່ອໃສ່ໂທດ ເກົາຫຼີເໜືອ ໃນ ການທົດລອງລະເບີດນິວເຄລຍຄັ້ງທີ 5 ທີ່ໄດ້ດຳເນີນຂຶ້ນໃນວັນທີ 9 ກັນຍາທີ່ຜ່ານມາ, ເຊິ່ງໄດ້ຮັບການສະໜຸບສະໜູນຢ່າງ ເປັນເອກະສັນຈາກບັນດາສະມາຊິກສະພາຄວາມ ໝັ້ນຄົງ 15 ປະເທດທີ່ລວມມີ ຈີນ ແລະ ຣັດເຊຍ ເຊິ່ງເປັນພັນທະມິດສຳຄັນຂອງ ເກົາຫຼີ ເໜືອ ດ້ວຍ.
