ຂ້າຫຼວງໃຫຍ່ເພື່ອສິດທິມະນຸດຂອງອົງການສະຫະປະຊາຊາດ ກ່າວໃນວັນອັງຄານວານນີ້ວ່າ ຄວາມອຶດຢາກທີ່ກຳລັງແຜ່ລາມຢູ່ໃນເຂດ ກາຊາ ເປັນຜົນມາຈາກການຈຳກັດການເຂົ້າ ແລະແຈກຢາຍເຄື່ອງຊ່ວຍເຫຼືອດ້ານມະນຸດສະທຳຂອງອິສຣາແອລ ແລະທ່ານກ່າວເຕືອນວ່າ ສິ່ງນີ້ອາດທຽບເທົ່າກັບອາດຊະຍາກຳສົງຄາມ.
ທ່ານ ໂວລເກີ ເທີກ (Volker Türk) ກ່າວໃນຖະແຫຼງການ ວ່າ “ຂອບເຂດຂອງຂໍ້ຈຳກັດໃນການເຂົ້າໄປເຂດກາຊາ ພ້ອມກັບພຶດຕະກຳທີ່ອິສຣາແອລ ຍັງສືບຕໍ່ປະຕິບັດໃນການສູ້ລົບ ອາດທຽບເທົ່າກັບການນຳໃຊ້ຄວາມອຶດຫີວເປັນວິທີການເຮັດສົງຄາມ, ເຊິ່ງແມ່ນ ອາດຊະຍາກຳສົງຄາມ”.
ຄໍາເຫັນຂອງທ່ານ ມີຂຶ້ນນຶ່ງມື້ຫລັງຈາກລາຍງານທີ່ໄດ້ຮັບການສະໜັບສະໜຸນຈາກສະຫະປະຊາຊາດ ໄດ້ລະບຸວ່າ ຊາວປາແລັດສະໄຕນ໌ 1.1 ລ້ານຄົນໃນເຂດກາຊາ ກຳລັງປະເຊີນກັບຄວາມອຶດຢາກຢ່າງຮ້າຍແຮງ. ບົດລາຍງານການແບ່ງປະເພດຄວາມໝັ້ນຄົງທາງດ້ານອາຫານແບບຄົບວົງຈອນ ຫຼື IPC ລະບຸວ່າ ຄວາມອຶດຢາກສາມາດເກີດຂື້ນໄດ້ທຸກເວລາ ໃນອີກບໍ່ເທົ່າໃດອາທິດທີ່ຈະມາເຖິງ, ໂດຍ ປະຊາຊົນ ປະມານ 210,000 ຄົນ ໃນພາກເຫນືອຂອງ ເຂດກາຊາ ຈະປະເຊີນກັບໄພອັນຕະລາຍທີ່ຮ້າຍແຮງທີ່ສຸດ.
"ອິສຣາແອລ, ໃນຖານະເປັນຜູ້ມີອໍານາດທີ່ເຂົ້າຍຶດຄອງ, ມີພັນທະທີ່ຈະຕ້ອງຮັບປະກັນວ່າ ມີການສະຫນອງສະບຽງອາຫານ ແລະການປິ່ນປົວທາງການແພດ ໃຫ້ແກ່ປະຊາກອນ ໃຫ້ສອດຄ່ອງກັບຄວາມຕ້ອງການຂອງພວກເຂົາເຈົ້າ ແລະເພື່ອອໍານວຍຄວາມສະດວກໃນການເຮັດວຽກຂອງອົງການຈັດຕັ້ງດ້ານມະນຸດສະທໍາ ເພື່ອໃຫ້ການຊ່ວຍເຫຼືອດັ່ງກ່າວ," ທ່ານຂ້າຫຼວງໃຫຍ່ ກ່າວ.
ທ່ານກ່າວວ່າ ອິສຣາແອລ ຍັງຕ້ອງຮັບປະກັນ ອີກວ່າ ຊາວກາຊາ ສາມາດເຂົ້າເຖິງການຊ່ວຍເຫລືອໄດ້ຢ່າງປອດໄພ ແລະ ມີກຽດສັກສີ.
ຟໍຣັມສະແດງຄວາມຄິດເຫັນ