ອົງການສະຫະປະຊາຊາດເຕືອນວ່າ ຈຳນວນຂອງພວກອົບພະຍົບຫຼົບໄພຢູ່ໃນທົ່ວໂລກໄດ້
ເພີ່ມຂຶ້ນຢ່າງຫຼວງຫຼາຍໃນຮອບທົດສະວັດຜ່ານມາຂະນະທີ່ບັນຫາຂັດແຍ້ງ ໄພພິບັດທຳມະ
ຊາດ ແລະການປ່ຽນແປງຂອງດິນຟ້າອາກາດ ໄດ້ບີບ ບັງຄັບໃຫ້ຜູ້ຄົນຕ້ອງຫຼົບໜີໄປຈາກ
ເຮືອນຊານບ້ານຊ່ອງຂອງພວກເຂົາເຈົ້າ.
ທ່ານ Antonio Guterres ຂ້າຫຼວງໃຫຍ່ໃນດ້ານອົບພະຍົບຂອງສະຫະປະຊາຊາດ ກ່າວ
ທີ່ສຳນັກງານໃຫຍ່ອົງການສະຫະປະຊາຊາດ ຢູ່ນະຄອນນິວຢອກໃນວັນພະຫັດວານນີ້ວ່າ
ໂລກໄດ້ສ້າງບັນຫາ ໃຫ້ມີການອົບພະຍົບຫຼົບໄພ ໄວກວ່າການຊອກຫາທາງແກ້ໄຂຕໍ່ບັນ
ຫາເຫຼົ່ານີ້. ທ່ານ Guterres ກ່າວຕື່ມວ່າທ່ານມອງເຫັນວ່າໂລກຂອງເຮົາມີຄວາມສາມາດ
ໜ້ອຍລົງນັບມື້ ໃນການຊອກຫາຊ່ອງທາງປ້ອງກັນ ແລະ ແກ້ໄຂບັນຫາຂັດແຍ້ງທາງການ
ເມືອງ.
ລາຍງານສະບັບນຶ່ງຂອງອົງການຂ້າຫຼວງໃຫຍ່ອົບພະຍົບສະຫະປະຊາຊາດທີ່ພິມເຜີຍແຜ່
ໃນວັນພະຫັດວານນີ້ເວົ້າວ່າ ມີ 43 ລ້ານຄົນຢູ່ໃນທົ່ວໂລກໄດ້ຖືກບັງຄັບ ໃຫ້ຫຼົບໜີອອກ
ຈາກເຮືອນຊານບ້ານຊ່ອງຂອງພວກເຂົາເຈົ້າຍ້ອນເຫດຜົນຫຼາຍໆຢ່າງຮວມທັງການເຕີບ
ໃຫຍ່ຂະຫຍາຍໂຕຂອງປະຊາກອນ ການຂາດແຄນອາຫານ ແລະນໍ້າດື່ມນໍ້າໃຊ້ ຕະຫຼອດ
ທັງການແຂ່ງຂັນ ເພື່ອຍາດແຍ່ງເອົາຊັບພະຍາກອນຕ່າງໆ. ລາຍງານແຈ້ງໃຫ້ຊາບຕື່ມວ່າ
80% ຂອງພວກອົບພະຍົບຫຼົບໄພເຫຼົ່ານີ້ແມ່ນອາໄສຢູ່ໃນປະເທດທີ່ກຳລັງພັດທະນາ.
ນອກນັ້ນແລ້ວ ລາຍງານຂອງອົງການຂ້າຫຼວງໃຫຍ່ໃນດ້ານອົບພະຍົບຂອງສະຫະປະ
ຊາຊາດຍັງເວົ້າວ່າ ໃນແຕ່ລະປີ ໄພພິບັດທຳມະຊາດຕ່າງໆໄດ້ເຮັດໃຫ້ປະຊາຊົນຫຼົບໜີ
ໄປຈາກບ່ອນຢູ່ຂອງພວກເຂົາເຈົ້າຫຼາຍກວ່າບັນຫາຂັດແຍ້ງ. ລາຍງານຂອງອົງການຂ້າ
ຫຼວງໃຫຍ່ໃນດ້ານອົບພະຍົບສະຫະປະຊາຊາດໄດ້ເຕືອນກ່ຽວກັບຊ່ອງຫວ່າງໃນການ
ໃຫ້ຄວາມຄຸ້ມຄອງຂອງນາໆຊາດຕໍ່ປະຊາຊົນທີ່ຫຼົບໜີໄປຈາກປະເທດຕ່າງໆຍ້ອນການ
ປ່ຽນແປງຂອງດິນຟ້າອາກາດ ໂດຍເວົ້າວ່າ ບໍ່ໄດ້ມີການພິຈາລະນາວ່າພວກເຂົາເຈົ້າເປັນ
ອົບພະຍົບ ພາຍໃຕ້ກົດ ໝາຍລະຫວ່າງປະເທດ.