ລັດຖະບານປາກິດສະຖານ ກ່າວຊົມເຊີຍ ການພົບເຫັນ ຂອງຄະນະກຳມາທິການ ອົງການສະຫະປະຊາຊາດ ທີ່ຮັບຜິດຊອບ ກ່ຍວກັບການສືບສວນ ເບິ່ງການຄາດຕະກຳ ມື້ລາງນາຍົກລັດຖະມຸນຕີປາກິດສະຖານ ທ່ານນາງ BENAZIR BHUTTO ໃນ ປີ 2007 ທີ່ກ່າວວ່າ ການຄາດຕະກຳທ່ານນາງ ສາມາດປ້ອງກັນ ບໍ່ໃຫ້ເກີດຂຶ້ນໄດ້. ໂຄສົກຂອງ ສາມີໝ້າຍ ມື້ລາງທ່ານນາງ BHUTTO ຄືປະທານາທິບໍດີ ປາກິດສະຖານ ໃນປັດຈຸບັນ ທ່ານ ASIF ALI ZARDARI ກ່າວໃນວັນພະຫັດ ວານນີ້ວ່າ ລາຍງານ ທີ່ມີການຄາດຄະເນກັນໄວ້ ຢ່າງສູງນັ້ນ ໄດ້ພິສູດໃຫ້ເຫັນ ໃນອັນທີ່ ພັກປະຊາຊົນ ປາກິດສະຖານ ເຊື່ອໝັ້ນທີ່ວ່າ ລັດຖະບານ ຂອງອະດີດ ປະທານາທິບໍດີ PERVEZ MUSHARAF ເປັນຜູ້ຮັບຜິດຊອບ ຕໍ່ການທີ່ບໍ່ໃຫ້ ຄວາມຄຸ້ມຄອງ ໃນເລື່ອງຄວາມປອດໄພ ແກ່ທ່ານນາງ BHUTTO. ສ່ວນຜູ້ຊ່ອຍ ປະທານາທິດີປາກິດສະຖານ ອີກຄົນນຶ່ງກ່າວວ່າ ລາຍງານໃໝ່ສະບັບນີ້ ຈະນຳໄປສູ່ ການສືບສວນ ທີ່ເໝາະສົມຂອງຕຳຫລວດ ແລະການຟ້ອງຮ້ອງ ຢູ່ໃນສານ. ລາຍງານ 65 ໜ້າ ທີ່ນຳອອກເຜີຍແຜ່ ໃນວັນພະຫັດວານນີ້ ໄດ້ຕຳໜິລັດຖະບານກາງ ຂອງປາກິດສະຖານ ແລະລັດຖະບານ ແຄວ້ນປັນຈາບ ທີ່ບໍ່ໄດ້ໃຫ້ ການປົກປ້ອງຄຸ້ມຄອງພຽງພໍ ຕໍ່ທ່ານນາງ BHUTTO. ລາຍງານເວົ້າວ່າ ການເອົາມາຕະການ ແລະບໍ່ໄດ້ດຳເນີນການ ຂອງຕຳຫລວດ ທີ່ນະຄອນ ຣາວັນປິນດີ ບ່ອນທີ່ການໂຈມຕີ ໄດ້ມີຂຶ້ນໃນວັນທີ 27 ທັນວາປີ 2007 ນັ້ນ ແມ່ນໄດ້ສ້າງ ຄວາມເສຍຫາຍແບບ ທີ່ບໍ່ສາມາດແກ້ໄຂໄດ້ ສຳລັບການສືບສວນ.
ວັນເສົາ, ໒໗ ກໍລະກົດ ໒໐໒໔