ອົງການອົບພະຍົບຂອງສະຫະປະຊາຊາດ ກ່າວວ່າ ມີພວກ
ອົບພະຍົບຫຼາຍກວ່າ 1 ລ້ານຄົນ ໄດ້ເດີນທາງຂ້າມທະເລ
ເຂົ້າໄປໃນສະຫະພາບຢູໂຣບ ນັບຕັ້ງແຕ່ຕົ້ນປີ 2015 ເປັນ
ຕົ້ນມາ ປຽບທຽບໃສ່ 216,000 ຄົນ ໃນປີກ່ອນນັ້ນ.
ອົງການຂ້າຫລວງໃຫຍ່ ດ້ານອົບພະຍົບຂອງສະຫະປະຊາ
ຊາດ ຫລື UNHCR ໄດ້ກ່າວໃນວັນພຸດມື້ນີ້ ວ່າ ຫຼາຍກວ່າ
80 ເປີເຊັນຂອງຊາວອົບພະຍົບ ທີ່ໄດ້ນັບຄັ້ງຫຼ້າສຸດມີ
1,000,573 ຄົນ ໄດ້ຂຶ້ນຝັ່ງທີ່ປະເທດກຣິສ ໂດຍສ່ວນໃຫຍ່
ແລ້ວ ແມ່ນທີ່ເກາະ Lesbos.
ສ່ວນໃຫຍ່ຂອງພວກອົບພະຍົບ 844,000 ຄົນ ທີ່ໄດ້ຂຶ້ນຝັ່ງຢູ່ກຣິສ ແມ່ນມາຈາກປະເທດ
ເທີກີ. ສ່ວນຈຸອື່ນໆນັ້ນ ໄດ້ເດີນທາງຂ້າມທະເລ Mediterranean ຈາກປະເທດລີເບຍ
ແລະ ໄດ້ຂຶ້ນຝັ່ງຢູ່ປະເທດອີຕາລີ.
ອົງການດັ່ງກ່າວຂອງສະຫະປະຊາຊາດຍັງເວົ້າອີກວ່າ ປະມານເຄິ່ງໜຶ່ງຂອງ ພວກອົບພະຍົບ
ແມ່ນໜີອອກມາຈາກຊີເຣຍ ແລະ ອີກ 21 ເປີ ເຊັນນັ້ນ ແມ່ນມາຈາກອັຟການິສຖານ.
ອົງການ UNHCR ກ່າວຕໍ່ໄປວ່າ ພວກອົບພະຍົບໄດ້ສ່ຽງຊີວິດ ແລະ ສ່ຽງໄພຂຶ້ນເຮືອບັນທຸກ
ທີ່ບໍ່ໝັ້ນຄົງ ເພາະວ່າ ພວກເຂົາເຈົ້າ “ໝົດຄວາມຫວັງ” ເພື່ອທີ່ຈະໄປເຖິງທະວີບຢູໂຣບ
ໃນການສະແຫວງຫາການປົກປ້ອງຈາກສົງຄາມ, ຄວາມຮຸນແຮງ ແລະ ການປາບປາມ
ທາງການເມືອງ ພ້ອມກັນກັບຄວາມທຸກຍາກ ທາງດ້ານເສດຖະກິດ.
ຢ່າງໜ້ອຍມີຊາວອົບພະຍົບ 3,735 ຄົນ ທີ່ໄດ້ເດີນທາງຂ້າມທະເລ Mediterranean ໄປ
ຍັງທະວີບຢູໂຣບ ໄດ້ເສຍຊີວິດ ຫຼື ຫາຍສາບສູນໄປ ໃນປີ 2015.
