ກອງປະຊຸມປະຈຳປີຂອງສະມັດຊາໃຫຍ່ອົງການສະຫະປະຊາຊາດ ໄດ້ໄຂຂຶ້ນແລ້ວ
ໃນວັນອັງຄານມື້ນີ້ ໂດຍມີບັນດາຜູ້ນໍາຈາກຫຼາຍກວ່າ 100 ປະເທດໃນໂລກມາຮ່ວມ
ເພື່ອປຶກສາຫາລືກ່ຽວກັບຫຼາຍໆບັນຫາໃນຂອບເຂດທີ່ກວ້າງຂວາງ ຮວມທັງການເປັນ
ປະເທດຂອງປາແລສຕາຍ ອານາຄົດຂອງລິເບຍໃນຍຸກຫຼັງ Gadhafi ແລະພວກໂຣກ
ທີ່ບໍ່ຕິດແປດຕ່າງໆ.
ໃນບັນດາບັນຫາທີ່ເດັ່ນນໍາໜ້າໝູ່ ກໍຄືຄຳຖາມກ່ຽວກັບການເຂົ້າເປັນສະມາຊິກອົງການ
ສະຫະປະຊາຊາດຂອງປະເທດປາແລສຕາຍ ແຕ່ນອກນັ້ນກໍຍັງຈະມີການສົນທະນາຫາລື
ກັນ ກ່ຽວກັບບັນຫາອື່ນໆອີກນໍາ ອັນຮວມທັງການມອບໂອນອໍານາດທາງການເມືອງໃນ
ລີເບຍ. ໃນອາທິດທີ່ແລ້ວນີ້ ສະພາຄວາມໝັ້ນຄົງຂອງອົງການສະຫະປະຊາຊາດ ໄດ້ລົງ
ມະຕິດ້ວຍຄະແນນສຽງຢ່າງຖ້ວມລົ້ນ ມອບບ່ອນນັ່ງທີ່ເຄີຍເປັນຂອງລິເບຍໃນສະມັດຊາ
ໃຫຍ່ສະຫະປະຊາຊາດນັ້ນໃຫ້ແກ່ສະພາປົກຄອງໄລຍະຂ້າມຜ່ານແຫ່ງຊາດລີເບຍ ຊຶ່ງມີ
ຜົນເທົ່າກັບເປັນການຮັບຮູ້ ເຖິງການສິ້ນສຸດໃນການປົກຄອງຂອງ Gadhafi ນັ້ນ.
ປະທານາທິບໍດີສະຫະລັດ ທ່ານ Barack Obama ໄດ້ໄປເຖິງນະຄອນ New York
ໃນຕອນບ່າຍວັນຈັນວານນີ້ ພ້ອມກັບລາຍການພົບປະກັບບຸກຄົນສໍາຄັນຫລາຍໆທ່ານ.
ເປັນຕົ້ນ ທ່ານ Obama ມີແຜນທີ່ຈະພົບປະກັບຜູ້ນໍາຂອງສະພາປົກຄອງໄລຍະຂ້າມຜ່ານ
ແຫ່ງຊາດລິເບຍ (NTC) ທ່ານ Mustafa Abdel Jalil. ນອກນີ້ ທ່ານຍັງຈະພົບປະກັບ
ປະທານາທິບໍດີຂອງປະເທດທີ່ໃໝ່ທີ່ສຸດໃນໂລກ ຄືປະເທດ Sudan ໃຕ້ ທ່ານ Salva
Kiir. ຕໍ່ຈາກນັ້ນທ່ານ Obama ຍັງຈະພົບປະກັບນາຍົກລັດຖະມົນຕີອິສຣາແອລ ທ່ານ
Benjamin Netanyahu ແລະທ່ານ Obama ກໍກ່າວຄຳປາໄສຕໍ່ກອງປະຊຸມຊະມັດຊາ
ໃຫຍ່ໃນວັນພຸດ ມື້ອື່ນນີ້.
