ລັດຖະມົນຕີການຕ່າງປະເທດສະຫະລັດ ທ່ານ John Kerry ກ່າວວ່າ ທ່ານມີຄວາມຕື່ນຕົກໃຈແລະໂກດແຄ້ນເປັນທີ່ສຸດ ກ່ຽວກັບການໂຈມຕີທາງອາກາດ ໃສ່ໂຮງໝໍເດັກນ້ອຍ ທີ່ເມືອງ Aleppo ຊຶ່ງທ່ານໄດ້ຖິ້ມໂທດໂດຍກົງໃສ່ກຳລັງຂອງປະທານາທິບໍດີຊີເຣຍທ່ານ Bashar al-Assad.
ການໂຈມຕີທາງອາກາດດັ່ງກ່າວ ໄດ້ທຳລາຍໂຮງໝໍ ທີ່ໃຫ້ການສະໜັບສະໜຸນໂດຍອົງ ການແພດບໍ່ມີພົມແດນ. ມີພວກເດັກນ້ອຍແລະທ່ານໝໍ ບໍ່ຕ່ຳກວ່າ 20 ຄົນໄດ້ເສຍຊີວິດ ຮວມທັງທ່ານໝໍເດັກນ້ອຍຄົນສຸດທ້າຍ ທີ່ເຮັດວຽກຢູ່ໃນເຂດຄວບຄຸມ ຂອງພວກຕໍ່ຕ້ານລັດຖະບານ ໃນເມືອງ Aleppo.
ທ່ານ Kerry ກ່າວໃນວັນພະຫັດວານນີ້ວ່າ ປາກົດວ່ານີ້ແມ່ນການໂຈມຕີດ້ວຍຄວາມຕັ້ງ ໃຈຕໍ່ສະຖານທີ່ ທາງການແພດ ທີ່ຮູ້ກັນດີ ແລະປະຕິບັດຕາມປະຫວັດ ທີ່ໜ້າຕື່ນຕົກໃຈ ຂອງອຳນາດການປົກຄອງ Assad ໃນການໂຈມຕີສະຖານທີ່ທຳນອງນີ້ແລະພວກຮັບມື ກັບເຫດການສຸກເສີນ. ການໂຈມຕີເຫລົ່ານີ້ໄດ້ສັງຫານປະຊາຊົນທີ່ບໍ່ມີຄວາມຜິດຫຼາຍໆ ຮ້ອຍຄົນຢູ່ໃນຊີເຣຍ.
ການໂຈມຕີທາງອາກາດທີ່ວ່ານີ້ ແມ່ນເປັນສ່ວນນຶ່ງຂອງການໂຈມຕີແບບນອງເລືອດທີ່ເມືອງ Aleppo ໃນໄລຍະ 24 ຊົ່ວໂມງທີ່ເຮັດໃຫ້ 60 ກວ່າຄົນເສຍຊີວິດ ໃນການສູ້ລົບ ລະຫວ່າງກຳລັງລັດຖະບານຊີເຣຍ ແລະພວກຕໍ່ຕ້ານ.
ທູດພິເສດ ຂອງອົງການສະຫະປະຊາຊາດ ທ່ານ Staffan de Mistura ກ່າວວ່າ ການ ຢຸດຍິງໃນເດືອນກຸມພາທີ່ທ່ານໄດ້ຊ່ອຍໃນການເຈລະຈາໄກ່ເກ່ຍນັ້ນກຳລັງຕົກຢູ່ໃນອັນ ຕະລາຍແລະອາດຈະພັງທະລາຍລົງໄດ້ໃນທຸກເວລາ.
ທ່ານ Kerry ຮຽກຮ້ອງໃຫ້ຣັດເຊຍ ຊຶ່ງເປັນພັນທະມິດທີ່ສຳຄັນສຸດຂອງທ່ານ Assad ໃຊ້ອິດທິພົນຂອງຕົນກົດດັນໃຫ້ທ່ານ Assad ຢຸດເຊົາການບຸກໂຈມຕີ.
ທ່ານ Kerry ກ່າວວ່າ ຣັດເຊຍມີຄວາມຮັບຜິດຊອບຢ່າງຮີບດ່ວນເພື່ອກົດດັນໃຫ້ອຳນາດການປົກຄອງຊີເຣຍ ປະຕິບັດຕາມ ພັນທະຂອງຕົນ ພາຍໃຕ້ເງື່ອນໄຂ ຂອງມະຕິ 2254 ສະພາຄວາມໝັ້ນຄົງສະຫະປະຊາຊາດ ຮວມທັງໂດຍສະເພາະແລ້ວໃຫ້ຢຸດເຊົາໃນການ ໂຈມຕີຕໍ່ພົນລະເຮືອນ ສະຖານທີ່ການແພດ ແລະພວກຮັບມືກັບເຫດການສຸກເສີນ ແລະປະຕິບັດຕາມການຍຸຕິໃນການເປັນປໍລະປັກໂດຍເຕັມ.
ແຕ່ຂະນະດຽວກັນທ່ານ Mistura ກໍໄດ້ຮຽກຮ້ອງໃຫ້ທັງສະຫະລັດແລະຣັດເຊຍຊ່ວຍຟື້ນ ຟູການເຈລະຈາສັນຕິພາບ.
ທ່ານກ່າວ ໃນວັນພະຫັດວານນີ້ວ່າ ໃນໄລຍະ 48 ຊົ່ວໂມງ ຜ່ານມານີ້ ພວກເຮົາໄດ້ເຫັນການເສຍຊີວິດຂອງຊາວຊີເຣຍນຶ່ງຄົນໃນທຸກໆ 25 ນາທີແລະບາດເຈັບນຶ່ງຄົນໃນທຸກໆ 13 ນາທີ.
