ອົງການຄວບຄຸມຢາເສບຕິດແລະອາດຊະຍາກຳຂອງ
ສະຫະປະຊາຊາດ ຫຼື UNODC ກ່າວວ່າ ການຜະລິດ
ຝິ່ນໃນເຂດເອເຊຍຕາເວັນອອກສຽງໃຕ້ ໄດ້ ເພີ່ມຂຶ້ນ
ໃນຮອບປີຜ່ານມາ ຂະນະທີ່ຄວາມທຸກຍາກໄດ້ບັງຄັບໃຫ້
ພວກພໍ່ໄຮ່ຊາວສວນ ຫັນມາປູກພືດທີ່ໃຫ້ຜົນຕອບແທນ
ງາມດັ່ງກ່າວຫຼາຍຂຶ້ນ ທີ່ໃຊ້ສຳລັບຜະລິດເປັນເຮໂຣອີນ ໃນການຄ້າຂາຍຢາເສບຕິດ
ທີ່ຜິດກົດໝາຍນັ້ນ.
ໃນການສຳຫຼວດປະຈຳປີທີ່ພິມເຜີຍແຜ່ໃນມື້ວັນຈັນວານນີ້ ອົງການດັ່ງກ່າວ ຂອງສະຫະ
ປະຊາຊາດເວົ້າວ່າ ເນື້ອທີ່ໆໃຊ້ໃນການປູກຝິ່ນຢູ່ໃນເຂດເອເຊຍ ຕາເວັນອອກສຽງໃຕ້
ໄດ້ເພີ່ມຂຶ້ນ 22% ໃນປີນີ້ ສົມທຽບໃສ່ປີ 2009.
ການສຳຫຼວດທີ່ວ່ານີ້ແມ່ນໄດ້ກວມເອົາ 3 ປະເທດປູກຝິ່ນລາຍໃຫຍ່ຢູ່ໃນຂົງເຂດ ກໍຄື
ສປປ ລາວ ມຽນມາ ແລະໄທ.
ອົງການ UNODC ກ່າວວ່າ ການຜະລິດ
ຝິ່ນຂອງມຽນມາ ຊຶ່ງປະກອບເປັນ 5%
ຂອງໂລກໃນປີ 2009 ໄດ້ເພີ່ມຂຶ້ນເປັນ
14% ໃນປີນີ້ ຍ້ອນວ່າພວກ ພໍ່ໄຮ່ຊາວ
ສວນຂອງມຽນມາ ໄດ້ພາກັນຫັນມາປູກຝິ່ນ
ຫຼາຍຂຶ້ນ.
ລາຍງານເວົ້າວ່າ ການປູກຝິ່ນຂອງມຽນມາໄດ້ເພີ່ມຂຶ້ນ 20% ໃນປີນີ້ ເປັນ 38,100
ເຮັກຕາ ຂະນະທີ່ຜົນຜະລິດຝິ່ນໄດ້ເພີ່ມຂຶ້ນ 76% ເປັນ 580 ໂຕນ. ມຽນມາທີ່ປົກຄອງ
ໂດຍລັດຖະບານທະຫານເປັນປະເທດທີ່ປູກຝິ່ນຫຼາຍເປັນອັນ ດັບ 2 ຂອງໂລກ
ຮອງຈາກອັຟການິສຖານ.
ອົງການ UNODC ເວົ້າວ່າ ການປູກແລະຜະລິດຝິ່ນຢູ່ ສປປ ລາວແລະໄທ ກໍເພີ່ມ
ເຊັ່ນກັນເຖິງແມ່ນລະດັບຂອງການປູກຝິ່ນຢູ່ໃນປະເທດທັງສອງຍັງຕໍ່າກ່ວາມຽນມາຫຼາຍ.
UNODC ກ່າວວ່າ ສະບຽງອາຫານທີ່ຫຼຸດນ້ອຍຖອຍລົງໃນເຂດຫ່າງໄກຂອງ ມຽນມາ
ແລະ ສປປ ລາວ ໄດ້ບັງຄັບໃຫ້ພວກພໍ່ໄຮ່ຊາວສວນຈຳນວນຫຼວງຫຼາຍ ຫັນມາປູກຝິ່ນ
ເພື່ອເປັນພືດທີ່ສ້າງລາຍໄດ້ ເພື່ອນຳໄປຊື້ອາຫານການກິນ ແລະ ວ່າການຜະລິດອາຫານ
ການກິນຢູ່ໃນເຂດດັ່ງກ່າວໄດ້ຫຼຸດລົງ ສ່ວນນຶ່ງກໍແມ່ນ ເປັນຍ້ອນການຕັດໄມ້ທຳລາຍປ່າ ຊຶ່ງເປັນສາເຫດໃຫ້ດິນເກັບນໍ້າໄວ້ບໍ່ໄດ້ສຳລັບ ການປູກຝັງ.
