ສະພາຄວາມໝັ້ນຄົງອົງການສະປະຊາຊາດ ພວມພິຈາລະນາ
ຍັດຕິນຶ່ງກ່ຽວກັບເຢເມັນ ທີ່ຈະຊຸກຍູ້ໃຫ້ພວກກະບົດ Houthi
ນິກາຍ Shi’ite ສະຫລະອຳນາດ ແລ້ວປ່ອຍໂຕປະທານາທິບໍດີ
Abed Rabbo Mansour Haid ທີ່ຖືກຂັບໄລ່ອອກຈາກຕຳແໜ່ງ
ແລະຄະນະລັດຖະບານຂອງທ່ານ ແລະ ໃຫ້ເຂົ້າຮ່ວມການເຈລະ
ຈາສັນຕິພາບ ທີ່ສະຫະປະຊາຊາດນຳພານັ້ນ “ດ້ວຍສັດທາ
ແລະຄວາມສຸດຈະລິດໃຈ.”
ບັນດານັກການທູດ ກ່າວວ່າ ຍັດຕິດັ່ງກ່າວນັ້ນ ບໍ່ເຖິງຂັ້ນຮຽກ
ຮ້ອງໃຫ້ໃຊ້ ບົດບັນຍັດທີ 7 ຂອງກົດບັດສະຫະປະຊາຊາດ ທີ່
ອະນຸຍາດໃຫ້ໃຊ້ກຳລັງທະຫານໄດ້ນັ້ນ.
ນັບຕັ້ງແຕ່ໄດ້ຢຶດອຳນາດໃນຕົ້ນເດືອນນີ້ມາ ພວກ Houthi ໄດ້ຍຸບສະພາ ແລະ ຈັດຕັ້ງ
ອຳນາດປົກຄອງຂອງພວກເຂົາເອງຂຶ້ນມາ. ພວກ Houthi ກ່າວວ່າ ພວກເຂົາກຳລັງທຳ
ການ “ປະຕິວັດ” ຕໍ່ຕ້ານການສໍ້ລາດບັງຫລວງ ຂອງບັນດາເຈົ້າໜ້າທີ່ ແລະ ເສດຖະກິດ
ທີ່ລົ້ມແຫລວ. ປະທານາທິບໍດີ ແລະ ບັນດາລັດຖະມົນຕີຂອງທ່ານ ຍັງຢູ່ພາຍໃຕ້ການກັກ
ບໍລິເວນ ຢູ່ທີ່ບ້ານພັກຂອງພວກເຂົາເຈົ້າ.
ໃນວັນເສົາວານນີ້ ຊາວເຢເມັນຫຼາຍໝື່ນຄົນ ໄດ້ພາກັນອອກມາປະ ທ້ວງ ຕໍ່ຕ້ານການຢຶດ
ເອົາ ອຳນາດຂອງພວກມຸສລິມ Houthi ນິກາຍ Shi’ite ນັ້ນ. ຢູ່ທີ່ເມືອງ Ibb ທາງພາກກາງ ຂອງປະເທດ ພວກມືປືນ Houthi ໄດ້ຍິງໃສ່ພວກປະທ້ວງ ເຮັດໃຫ້ 4 ຄົນໄດ້ຮັບບາດເຈັບ.
