ກອງປະຊຸມສະມັດຊາໃຫຍ່ອົງການສະຫະປະຊາຊາດ ໄດ້ຮັບ
ຜ່ານມະຕິ ຮຽກຮ້ອງໃຫ້ນຳເອົາເລື້ອງເກົາຫຼີເໜືອ ສະເໜີຂຶ້ນ
ສານອາຍາສາກົນຫຼື ICC ກ່ຽວກັບສະພາບການລະເມີດສິດ
ທິມະນຸດ ຂອງປະເທດດັ່ງກ່າວ.
ມະຕິທີ່ບໍ່ມີຂໍ້ຜູກມັດດັ່ງກ່າວ ໄດ້ຖືກຮັບຜ່ານ ໃນວັນພະຫັດ
ວານນີ້ ທີ່ຮຽກຮ້ອງໃຫ້ສະພາຄວາມໝັ້ນຄົງ ສະເໜີເລື້ອງການ
ກໍ່ໂທດກຳຕ້ານມະນຸດຊາດຂອງພຽງຢາງ ຕໍ່ ICC. ສະມັດຊາ
ໃຫຍ່ອົງການສະຫະປະຊາຊາດ ໄດ້ຮັບຜ່ານມະຕິນີ້ ດ້ວຍຄະ
ແນນ 116 ສຽງເຫັນດີ 20 ສຽງຄັດຄ້ານ ແລະ 53 ປະເທດ
ບໍ່ອອກສຽງ.
ສະພາຄວາມໝັ້ນຄົງ ຈະປຶກສາລືເລື້ອງສິດທິມະນຸດ ຂອງເກົາຫຼີເໜືອ ໃນວັນຈັນຈະມາ
ເຖິງນີ້. ແຕ່ເບິ່ງຊົງວ່າ ສະພາຄວາມໝັ້ນຄົງ ຈະບໍ່ນຳເອົາເລື້ອງເກົາຫຼີເໜືອ ສະເໜີຕໍ່ ICC ເພາະວ່າ ໃນເມື່ອຈີນ ຊຶ່ງເປັນພັນທະມິດ ທີ່ສຳຄັນຂອງເກົາຫຼີເໜືອ ມີທ່າທາງວ່າ ຈະໃຊ້ສິດຢັບຢັ້ງ ຕໍ່ການເຄື່ອນໄຫວດັ່ງກ່າວ.
ການກົດດັນໃຫ້ມີການລົງຄະແນນສຽງ ທີ່ສະພາຄວາມໝັ້ນຄົງນັ້ນ ຢ່າງໃດກໍຕາມ ອາດ
ຈະສ່ອງແສງໃຫ້ເຫັນ ເຖິງການລະເມີດສິດທິມະນຸດຕ່າງໆ ຂອງເກົາຫຼີເໜືອເພີ້ມຕື່ມຂຶ້ນອີກ ແລະຈະຕົກເປັນການກົດດັນ ທາງການເມືອງອັນໜັກໜ່ວງແກ່ປັກກິ່ງ.
ຮອງເອກອັກຄະລັດຖະທູດ ປະຈຳອົງການສະຫະປະຊາຊາດ ຂອງເກົາຫລີເໜືອ ທ່ານ
An Myong Hun ກ່າວໃນວັນພະຫັດວານນີ້ ວ່າ ພຽງຢາງ ປະຕິເສດຕໍ່ມະຕິດັ່ງກ່າວ ຊຶ່ງ
ທ່ານເອີ້ນວ່າ ເປັນ “ຜົນງານຂອງແຜນການໆເມືອງ ແລະ ການປະເຊີນໜ້າກັນ.”
ມະຕິດັ່ງກ່າວ ແມ່ນອິງຕາມລາຍງານ ຂອງຄະນະກຳມາທິການສອບສວນ ຂອງອົງການສະຫະປະຊາຊາດ ເມື່ອເດືອນກຸມພາຜ່ານມາ ທີ່ໄດ້ແຈ້ງ ລາຍລະອຽດຕ່າງໆ ເຖິງການ
ສັງຫານຢ່າງເປັນລະບົບ ການທໍລະມານ ການຂົ່ມຂືນສຳເລົາ ແລະ ການເຮັດໃຫ້ອຶດຫິວ
ຢ່າງກວ້າງຂວາງ ໃນເກົາຫຼີເໜືອ ມາເປັນເວລາຫຼາຍທົດສະວັດ. ລາຍງານກ່າວວ່າ ການ
ລະເມີດຕ່າງໆເຫຼົ່ານັ້ນ ແມ່ນ “ບໍ່ເຄີຍມີມາກ່ອນ” ຢູ່ໃນໂລກສະໄໝໃໝ່.
