ຄະນະກຳມະການຂອງອົງການສະຫະປະຊາຊາດ ໄດ້ໃຫ້ການອະນຸມັດຕໍ່ຮ່າງຍັດຕິນຶ່ງໃນວັນອັງຄານວານນີ້ ປະນາມການຍຶດຄອງເຂດໄຄຣເມຍຂອງຣັດເຊຍ ແລະກ່າວຢ້ຳວ່າ ຕົນບໍ່ຮັບຮູ້ການປະກາດຂອງຣັດເຊຍ ທີ່ຮວມເອົາເຂດໄຄຣເມຍ ໄປຈາກຢູເຄຣນ.
ຮ່າງຍັດຕິດັ່ງກ່າວ ໄດ້ຖືກຮັບຮອງເອົາດ້ວຍຄະແນນສຽງ 73 ຕໍ່ 23 ແລະມີ 76 ປະເທດບໍ່ອອກສຽງ. ເປັນທີ່ຄາດກັນວ່າ ຮ່າງຍັດຕິສະບັບນີ້ຈະມີການຮັບຜ່ານໂດຍກອງປະຊຸມຄົບຄະນະຂອງສະມັດຊາໃຫຍ່ສະຫະປະຊາຊາດໃນເດືອນໜ້າ.
ຮ່າງຍັດຕິສະບັບນີ້ ຮຽກຮ້ອງໃຫ້ຣັດເຊຍ ປະຕິບັດຕາມພັນທະນາໆຊາດຂອງຕົນໃນຖາ ນະທີ່ເປັນມະຫາອຳນາດຍຶດຄອງ ໃຫ້ເອົາທຸກບາດກ້າວ ທີ່ຈຳເປັນ ເພື່ອຍຸຕິໃນທັນທີ ຕໍ່ ການລະເມີດສິດທິ ຂອງປະຊາຊົນ ໃນເຂດໄຄຣເມຍ ປ່ອຍໃນທັນທີ ພວກທີ່ຖືກຈັບກຸມໂດຍຜິດກົດໝາຍ ແລະຄ້ຳປະກັນ ແບບບໍ່ໃຫ້ມີການລົບກວນຕໍ່ການກວດກາ ແລະພະ ນັກງານຂອງຄະນະສິ້ງຊອມສິດທິມະນຸດ.
ເຈົ້າໜ້າທີ່ກະຊວງການຕ່າງປະເທດຣັດເຊຍ ທ່ານ Anatoly Viktorov ໄດ້ປະຕິເສດບໍ່ຮັບຮູ້ຮ່າງຍັດຕິສະບັບນີ້ ໂດຍຖືວ່າ ເປັນການກະທຳຂອງຝ່າຍດຽວແລະມີຈຸດປະສົງທາງການເມືອງ.
ທ່ານກ່າວວ່າ “ມັນບໍ່ໄດ້ເອົາຫົວຊາຢ່າງສິ້ນເຊີງ ຕໍ່ຜົນກະທົບໃນທາງລົບ ທີ່ການກະທຳຂອງເຈົ້າໜ້າທີ່ຢູເຄຣນ ມີຕໍ່ປະຊາຊົນໃນເຂດໄຄຣເມຍ.”
ເອກອັກຄະລັດຖະທູດສະຫະລັດ ປະຈຳອົງການສະຫະປະຊາຊາດ ທ່ານນາງ Saman- tha Power ກ່າວວ່າ ການລະເມີດສິດທິມະນຸດໃນເຂດໄຄຣເມຍ “ແມ່ນບໍ່ມີຢາງອາຍທີ່ແທ້ໆ”.