ເລຂາທິການໃຫຍ່ ອົງການສະຫະປະຊາຊາດ ທ່ານ Ban Ki-moon ໄດ້ເຕືອນ ໃນ ວັນອັງຄານວານນີ້ ວ່າ ບໍ່ມີສົນທິສັນຍາໃດໆ ທີ່ຈະປ້ອງກັນການໂຈມຕີດ້ວຍອາວຸດເຊື້ອໂຣກ ແລະໂລກເຮົາແມ່ນຍັງບໍ່ທັນກຽມພ້ອມຢ່າງເປັນການພຽງພໍ ທີ່ຈະຮັບມືກັບອາວຸດດັ່ງກ່າວເທື່ອ.
ໃນການກ່າວຖະແຫລງຕໍ່ສະພາຄວາມໝັ້ນຄົງ ທີ່ນະຄອນ New York ທ່ານ Ban ໄດ້ກ່າວວ່າ ໃນຂະນະທີ່ ອົງການຈັດຕັ້ງຫຼາຍຝ່າຍ ໄດ້ມີຢູ່ແລ້ວ ເພື່ອກວດສອບວ່າ ບັນດາປະເທດຕ່າງໆ ບໍ່ໄດ້ພັດທະນາອາວຸດ ເຄມີ ແລະ ອາວຸດນິວເຄລຍ ແຕ່ບໍ່ມີ ກົນໄກອັນໃດເລີຍທີ່ມີຢູ່ສຳລັບກວດ ສອບອາວຸດເຊື້ອໂຣກ.
ທ່ານ Ban ໄດ້ກ່າວຕໍ່ສະພາດັ່ງກ່າວ ວ່າ “ຜົນກະທົບ ແລະຜົນທີ່ຈະຕິດຕາມມາ ໃນ ການໂຈມຕີດ້ວຍອາວຸດເຊື້ອໂຣກ ຕໍ່ເປົ້າໝາຍທີ່ເປັນພົນລະເຮືອນນັ້ນ ອາດຈະຮ້າຍແຮງເກີນກວ່າການໂຈມຕີດ້ວຍອາວຸດເຄມີ ຫຼືກຳມັນຕະລັງສີດ້ວຍຊ້ຳ.”
ທ່ານໄດ້ກ່າວຕື່ມວ່າ ການລະບາດທີ່ຮ້າຍແຮງ ຂອງ Ebola ຢູ່ອາ ຟຣິກາເມື່ອບໍ່ດົນມານີ້ ພະຍາດລະບົບຫາຍໃຈອັກເສບຈາກພາກຕາ ເວັນອອກກາງ ຫຼື MERS ແລະ ໄຂ້ໝາກ ເຫຼືອງ ຫຼື yellow fever ໄດ້ເຮັດໃຫ້ທ່ານ “ມີຄວາມເປັນຫ່ວງທີ່ສຸດ.”
ທ່ານໄດ້ຮຽກຮ້ອງ ໃຫ້ສະພາຄວາມໝັ້ນຄົງ ຊອກຫາຊ່ອງທາງເພື່ອສ້າງຄວາມເຂັ້ມແຂງ ໃຫ້ແກ່ມະຕິ 1540 ຂອງສະຫະປະຊາຊາດ ຊຶ່ງໄດ້ຈັດຕັ້ງຂຶ້ນເພື່ອປ້ອງກັນບໍ່ໃຫ້ ອາວຸດ ທີ່ມີອະນຸພາບຮ້າຍແຮງຕົກໄປຢູ່ໃນກຳມືຂອງ “ພວກຄົນນອກກົດໝາຍ ທີ່ບໍ່ມີປະເທດ” ອັນເປັນຄຳສັບດ້ານການທູດ ທີ່ໃຊ້ສຳລັບພວກກໍ່ການຮ້າຍ.
ແຕ່ ທ່ານ Ban ໄດ້ຍອມຮັບວ່າ ຄວາມກ້າວໜ້າດ້ານເທັກໂນໂລຈີ ໄດ້ເຮັດໃຫ້ການຜະລິດ ແລະ ການນຳໃຊ້ອາວຸດ ທີ່ມີອະນຸພາບຮ້າຍແຮງນັ້ນ ງ່າຍຂຶ້ນ.
ທ່ານກ່າວວ່າ “ພວກກໍ່ການຮ້າຍ ທີ່ແນເປົ້າໝາຍເພື່ອເຂັ່ນຂ້າ ພົນລະເຮືອນເປັນຈຳ ນວນຫຼວງຫຼາຍນັ້ນ ແມ່ນພວມຊອກຫາອາວຸດເຄມີ, ອາວຸດເຊື້ອໂຣກ ແລະ ອາວຸດ ນິວເຄລຍ ຢ່າງບໍ່ລົດລະ.”
