ເລຂາທິການໃຫຍ່ສະຫະປະຊາດ ທ່ານແອນໂຕນີໂອ ກູເຕເຣັສ ໄດ້ຂໍຮ້ອງໃນວັນພຸດວານນີ້ ໃຫ້ຢຸດຕິການສູ້ລົບຢູ່ໃນຊູດານ ແລະ ການຊ່ວຍເຫຼືອຂອງນາໆຊາດ ໃຫ້ແກ່ຊາວຊູດານ ຊຶ່ງທ່ານກ່າວວ່າ ພວກເຂົາກໍາລັງປະເຊີນກັບໄພພິບັດດ້ານມະນຸດສະທໍາ.
"ການຊ່ວຍເຫຼືອຕ້ອງໄດ້ຮັບການອະນຸຍາດໃຫ້ເຂົ້າໄປໃນຊູດານ, ແລະພວກເຮົາຕ້ອງການການເຂົ້າເຖິງທີ່ປອດໄພແລະທັນທີທັນໃດ ເພື່ອໃຫ້ສາມາດແຈກຢາຍມັນໃຫ້ກັບຜູ້ທີ່ຕ້ອງການຫຼາຍທີ່ສຸດ," ທ່ານກູເຕເຣັສກ່າວໃນກອງປະຊຸມຖະແຫຼງ ຂ່າວ ທີ່ນະຄອນຫຼວງໄນໂຣບີ, ປະເທດ ເຄັນຢາ. "ພົນລະເຮືອນ ແລະໂຄງສ້າງພື້ນຖານຂອງພົນລະເຮືອນ ຕ້ອງໄດ້ຮັບການປົກປ້ອງ, ແລະພະນັກງານມະນຸດສະທໍາແລະຊັບສິນຂອງພວກເຂົາຕ້ອງໄດ້ຮັບການເຄົາລົບ."
ກະຊວງສາທາລະນະສຸກຊູດານກ່າວວ່າ ມີຜູ້ເສຍຊີວິດຫຼາຍກວ່າ 500 ຄົນ ແລະ ເກືອບ 5,000 ຄົນໄດ້ຮັບບາດເຈັບ ນັບຕັ້ງແຕ່ການສູ້ລົບກັນໄດ້ເລີ່ມຂຶ້ນໃນວັນທີ 15 ເມສານີ້, ໃນລະຫວ່າງການຕໍ່ສູ້ຍາດອຳນາດລະຫວ່າງຜູ້ນຳຂອງກອງທັບຊູດານ ແລະກອງກຳລັງທະຫານກອງໜູນເຄື່ອນທີ່ວ່ອງໄວ.
ໜ່ວຍງານຜູ້ລີ້ໄພຂອງສະຫະປະຊາຊາດ (IOM) ກ່າວໃນອາທິດນີ້ວ່າ ມີຢ່າງໜ້ອຍ 334,000 ຄົນໄດ້ຮັບການອົບພະຍົບພາຍໃນ ຈາກການສູ້ລົບກັນ, ນອກເໜືອໄປຈາກ 100,000 ຄົນທີ່ໄດ້ໜີອອກຈາກປະເທດແລ້ວ. ໜ່ວຍງານຜູ້ຍົກຍ້າຍຖິ່ນຖານຂອງສະຫະປະຊາຊາດໄດ້ເຕືອນວ່າ ການປະທະກັນອາດຈະເຮັດໃຫ້ມີຫລາຍກວ່າ 800,000 ຄົນ ຕ້ອງໜີອອກຈາກປະເທດທີ່ຕັ້ງຢູ່ທາງພາກຕາເວັນອອກສຽງເໜືອຂອງອາຟຣິກາ.
ຫຼາຍຄົນກຳລັງເດີນທາງໄປ 7 ປະເທດ ທີ່ມີຊາຍແດນຕິດກັບຊູດານ, ລວມທັງ ຊາດ (Chad), ຊູດານໃຕ້, ສາທາລະນະລັດອາຟຣິກາກາງ, ອີຈິບ ແລະເອທິໂອເປຍ.