ເລຂາທິການໃຫຍ່ ອົງການສະຫະປະຊາຊາດ ທ່ານ ແອນໂຕນີໂອ ກູເຕເຣັສ ໄດ້ເລີ່ມການຢ້ຽມຢາມປະເທດ ປາກິສຖານ ສາມວັນໃນວັນອາທິດວານນີ້ ດ້ວຍການຮຽກຮ້ອງປະຊາຄົມນານາຊາດ ໃຫ້ສະໜັບສະໜູນປະເທດຕ່າງໆທີ່ສືບຕໍ່ຮັບເອົາອົບພະຍົບຫຼາຍລ້ານຄົນຈາກປະເທດ ອັຟການິສຖານ ທີ່ຖືກທຳລາຍໂດຍສົງຄາມ.
ທ່ານ ກູເຕເຣັສ ໄດ້ເດີນທາງໄປນະຄອນຫຼວງ ອິສລາມາບັດ ສຳລັບການປະຊຸມກັບບັນດາຜູ້ນຳ ປາກິສຖານ ແລະ ເພື່ອກ່າວຄຳປາໄສທີ່ສຳຄັນໃນກອງປະຊຸມໃຫຍ່ສາກົນໃນວັນຈັນມື້ນີ້ ເພື່ອເປັນຂີດໝາຍການສະໜັບສະໜູນສີ່ທົດສະວັດຂອງ ປາກິສຖານ ສຳລັບອົບພະຍົບ ອັຟການິສຖານ.
ໃນການກ່າວຄຳປາໄສທີ່ກອງປະຊຸມຖະແຫຼງຂ່າວໃນນະຄອນຫຼວງຂອງ ປາກິສຖານ ນັ້ນ, ທ່ານ ກູເຕເຣັສ ໄດ້ກ່າວວ່າ ເຖິງແມ່ນຈະມີສິ່ງທ້າທາຍຕ່າງໆຂອງເຂົາເຈົ້າເອງ ແລະ ການສະໜັບສະໜູນທີ່ຈຳກັດຈາກປະຊາຄົມສາກົນກໍຕາມ, ປາກິສຖານ ໄດ້ຊ່ວຍສະໜອງທີ່ພັກອາໄສໃຫ້ອົບພະຍົບ ອັຟການິສຖານ ມາເປັນເວລາ 40 ປີແລ້ວ, ເຮັດໃຫ້ເຂົາເຈົ້າເປັນຜູ້ຕ້ອນຮັບອົບພະຍົບທີ່ໃຫຍ່ທີ່ສຸດເປັນອັນດັບສອງຂອງໂລກ.
ທ່ານ ແອນໂຕນີໂອ ກູເຕເຣັສ ໄດ້ກ່າວວ່າ “ຂ້າພະເຈົ້າຢາກຂໍກ່າວຢືນຢັນອີກຄັ້ງນຶ່ງວ່າ ການແກ້ໄຂບັນຫາແບບຍືນຍົງທີ່ດີກວ່າສຳລັບອົບພະຍົບ ໄດ້ເປັນການອາສາສະໝັກນຳສົ່ງເຂົາເຈົ້າໄປບ່ອນທີ່ປອດໄພ ແລະ ຢ່າງມີກຽດສັກສີຫາປະເທດບ້ານເກີດຂອງເຂົາເຈົ້າ ແລະ ນີ້ກໍແມ່ນຄວາມຈິງສຳລັບອົບພະຍົບ ອັຟການິສຖານ. ຜ່ານການສະໜັບສະໜູນຂອງເຂົາເຈົ້າຕໍ່ຂະບວນການສັນຕິພາບທີ່ກຳລັງດຳເນີນຢູ່ ແລະ ການສ້າງຂໍ້ຕົກລົງໃນພາກພື້ນທີ່ຈຳເປັນນັ້ນ, ປາກິສຖານ ໄດ້ສືບຕໍ່ເອົາບົດບາດທີ່ສຳຄັນໃນການບັນລຸໂອກາດຄັ້ງປະຫວັດສາດສຳລັບຂະບວນການສັນຕິພາບນີ້. ອົງການສະຫະປະຊາຊາດ ຍັງຄົງໃຫ້ຄຳໝັ້ນສັນຍາທີ່ຈະສະໜັບສະໜູນຂະບວນການສັນຕິພາບທີ່ກວມລວມ ແລະ ນຳໜ້າໂດຍ ອັຟການິສຖານ ທີ່ສົ່ງເສີມສິດທິມະນຸດສຳລັບປະຊາຊົນທຸກຄົນ ແລະ ການນຳໜ້າໄປສູ່ສັນຕິພາບທີ່ຍືນຍົງໃນ ອັຟການິສຖານ.”
ອົງການສະຫະປະຊາຊາດຄາດວ່າ ປະຊາຊົນ ອັຟການິສຖານ ປະມານ ສີ່ລ້ານຫົກແສນຄົນ, ລວມທັງ ສອງລ້ານເຈັດແສນຄົນທີ່ລົງທະບຽນເປັນອົບພະຍົບນັ້ນ, ຍັງອາໄສຢູ່ນອກ ອັຟການິສຖານ. ປະມານ 90 ເປີເຊັນແມ່ນອາໄສຢູ່ໃນປະເທດ ປາກິສຖານ ແລະ ອີຣ່ານ.
