ສະພາຄວາມໝັ້ນຄົງອົງການສະຫະປະຊາຊາດ ໄດ້ຮັບຮອງເອົາ
ຄຳຖະແຫລງສະບັບນຶ່ງຂອງປະທານ ທີ່ສະໜັບສະໜຸນການຢຸດຍິງ
ເພື່ອມະນຸດສະທຳໂດຍ “ທັນທີແລະບໍ່ມີເງື່ອນໄຂໃດໆທັງສິ້ນ”
ລະຫວ່າງ ອິສຣາແອລ ແລະ ກຸ່ມ Hamas.
ມາດຕາການດັ່ງກ່າວ ທີ່ໄດ້ມີການສະເໜີຂຶ້ນ ໃນຕອນເຊົ້າມືດ
ວັນຈັນມື້ນີ້ ຮຽກຮ້ອງໃຫ້ທັງສອງຝ່າຍຢູ່ໃນການຂັດແຍ້ງກັນນັ້ນ
ເອົາຫຼາຍໆບາດກ້າວ ເພື່ອໃຫ້ມີ “ການຢຸດຍິງ ທີ່ຢັ້ງຢືນແລະ
ໄດ້ຮັບການປະຕິບັດຕາມໂດຍເຕັມ.” ຄຳຖະແຫລງດັ່ງກ່າວ
ຍັງສະແດງອອກ ເຖິງຄວາມຈຳເປັນໃນການໃຫ້ການຊ່ອຍເຫຼືອ
ທາງດ້ານມະນຸດສະທຳ ໂດຍທັນທີແກ່ພວກປະຊາຊົນ ໃນເຂດ Gaza.
ການເຄື່ອນໄຫວດັ່ງກ່າວຂອງສະພາຄວາມໝັ້ນຄົງ ມີຂຶ້ນ
ຫຼັງຈາກທີ່ການຕົກລົງຢຸດຍິງກັນ ຫຼາຍໆຄັ້ງບໍ່ຢັ້ງຢືນ ນັບຕັ້ງ
ແຕ່ການປະທະກັນໄດ້ເກີດຂຶ້ນເກືອບ 3 ສັບປະດາມາແລ້ວນັ້ນ.
ເອກອັກຄະລັດຖະທູດປາແລສໄຕ ທ່ານ Riyad Mansour
ກ່າວວ່າທ່ານຫວັງວ່າ ຄຳຖະແຫລງທີ່ວ່ານີ້ ຈະນຳໄປສູ່ການ
ຢຸດຍິງທີ່ຍາວນານ ແຕ່ທ່ານໄດ້ຕຳນິຕິຕຽນ ສະພາຄວາມ
ໝັ້ນຄົງ ທີ່ບໍ່ໄດ້ເອົາບາດກ້າວ ທີ່ແຂງຂັນກ່ວານັ້ນ ແລະຮັບ
ຜ່ານຮ່າງຍັດຕິ ຕໍ່ຕ້ານ ອັນທີ່ທ່ານເອີ້ນວ່າ“ການບຸກລຸກ
ຂອງອິສຣາແອລນັ້ນ.”
ທ່ານ Mansour ເວົ້າວ່າ: “ພວກເຮົາໄດ້ຄາດຫວັງວ່າ ທາງສະພາຄວາມໝັ້ນຄົງຈະ
ຈັດການກັບບັນຫາເລື້ອງການສະໜອງການປົກປ້ອງຄຸ້ມຄອງໃຫ້ ແກ່ປະຊາຊົນຂອງ
ພວກເຮົາ ແລະບັນຫາຄວາມເປັນຫວ່ງອັນຊອບທຳຂອງປະຊາຊົນຂອງເຮົາໃນເຂດ
ກາຊານັ້ນ. ສະຖານະການທີ່ເປັນຢູ່ດຽວນີ້ ແມ່ນຈະປ່ອຍໃຫ້ເປັນແບບນີ້ຕໍ່ໄປບໍ່ໄດ້
ແລະການທີ່ຈະກັບຄືນໄປເປັນແບບເດີມ ກ່ອນການບຸກລຸກຂອງອິສຣາແອລນັ້ນ ກໍແມ່ນຈະປ່ອຍໃຫ້ ດຳເນີນສືບຕໍ່ໄປ ບໍ່ໄດ້ຄືກັນ.”
ເອກອັກຄະ ລັດຖະທູດອິສຣາແອລປະຈຳອົງການສະຫະປະ
ຊາຊາດ ທ່ານ Ron Prosor ກ່າວວ່າ ກຸ່ມ Hamas ໄດ້ຍິງ
ຈະຫລວດ 2,500 ລູກໃສ່ອິສຣາແອລ ແລະກ່າວຊ້ຳອີກວ່າ
ຖ້າຫາກອິສຣາແອລບໍ່ປະເຊີນກັບການຖືກໂຈມຕີ ໂດຍຈະ
ຫລວດແລ້ວ ອິສຣາແອລກໍບໍ່ມີຄວາມຈຳເປັນທີ່ຈະຕ້ອງໂຈມຕີ
ໂຕ້ຕອບຄືນ ເຊັ່ນກັນ.
ສປຊ ຮຽກຮ້ອງໃຫ້ມີ ການຢຸດຍິງ ຢູ່ເຂດ Gaza ໂດຍທັນທີ
