ສະມັດຊາໃຫຍ່ສະຫະປະຊາຊາດ ໄດ້ອະນຸມັດໃຫ້ຕັດງົບປະມານຂອງສະຫະປະຊາຊາດ
ອອກ 5% ສໍາລັບ 2 ປີຂ້າງໜ້າ ຊຶ່ງເປັນຂີດໝາຍໃນການຫລຸດລົງ ຂອງງົບປະມານ
ເປັນຄັ້ງທີສອງເທົ່ານັ້ນ ໃນຮອບ 50 ປີ.
ການເຄື່ອນໄຫວໃນວັນເສົາວານນີ້ ຂອງສະມັດຊາໃຫຍ່ສະຫະປະຊາຊາດໝາຍຄວາມວ່າ
ງົບປະມານໃນປັດຈຸບັນທີ່ມີ 5 ພັນ 410 ລ້ານໂດລານັ້ນ ຈະຖືກຫລຸດລົງໃຫ້ຍັງເຫລືອ 5
ພັນ 150 ລ້ານໂດລາ ສໍາລັບປີ 2012 ແລະ 2013.
ເລຂາທິການໃຫຍ່ສະຫະປະຊາຊາດ ທ່ານ ພັນ ກິມູນ ໄດ້ສະແດງຄວາມຊົມເຊີຍຕໍ່ສະມັດ
ຊາໃຫຍ່ ທີ່ຍິນດີຈະເອົາບາດກ້າວອັນເຂັ້ມງວດດັ່ງກ່າວ ຊຶ່ງທ່ານໄດ້ກ່າວວ່າ “ລັດຖະບານ
ແລະປະຊາຊົນຢູ່ທຸກບ່ອນກໍາລັງພົບຄວາມລໍາບາກ”. ທ່ານເວົ້າວ່າ ການນໍາໃຊ້ຊັບ
ພະຍາກອນທີ່ມີຢູ່ໃຫ້ເປັນປະໂຫຍດທີ່ສຸດ ແລະສືບຕໍ່ປະຕິບັດໜ້າທີ່ຕາມການມອບໝາຍ
ໃຫ້ຂອງອົງການຂອງໂລກດັ່ງກ່າວນີ້ ແມ່ນເປັນສິ່ງທີ່ດີທີ່ສຸດ.
ພ້ອມກັນນັ້ນ ທ່ານພັນ ຍັງໄດ້ສະເໜີມາດຕະການມັດທະຍັດຈໍານວນນຶ່ງ ຊຶ່ງລວມທັງການ
ຕັດຄ່າໃຊ້ຈ່າຍໃນການເດີນທາງ ເພື່ອນໍາໃຊ້ຊັບພະຍາກອນຂອງປະເທດສະມາຊິກສະຫະປະ
ຊາຊາດ 193 ປະເທດນັ້ນ ໃຫ້ເກີດປະໂຫຍດ ຫລາຍກວ່າເກົ່າ. ທ່ານຍັງໄດ້ໃຫ້ຄໍາໝັ້ນສັນຍາ
ຕໍ່ປະເທດສະມາຊິກສະຫະປະຊາຊາດວ່າ ຈະໝູນໃຊ້ຊັບພະຍາກອນຕ່າງໆ ໃຫ້ໄດ້ຜົນຫລາຍ
ທີ່ສຸດ ແລະຈະເຮັດໃຫ້ໄດ້ຕາມໜ້າທີ່ມອບໝາຍໃຫ້ “ຢ່າງມີປະສິດທິຜົນຫລາຍທີ່ສຸດ”.
