ກໍາມາທິການເສດຖະກິດຂອງອົງການສະຫະປະຊາຊາດ ສໍາລັບພາກພື້ນເອເຊຍປາຊິຟິກ ຫລື UNESCAP ກ່າວວ່າ ການສົ່ງອອກຊຶ່ງ ເປັນຕົວຂັບດັນການຈະເລີນເຕີບໂຕ ທີ່ເຄີຍມີມາແຕ່ປະວັດສາດຂອງຂົງເຂດນັ້ນ ກໍາ ລັງຊັກຊ້າລົງ ຍ້ອນສະພາວະວິກິດການໜີ້ສິນຂອງບັນດາ ປະເທດທີ່ໃຊ້ເງິນຢູໂຣ ບວກກັບຄວາມບໍ່ແນ່ນອນຕ່າງໆຢູ່ໃນສະຫະລັດ.
ຄະນະກໍາມາທິການ UNESCAP ໄດ້ລົດການຄາດຄະເນການເຕີບໂຕຂອງຂົງເຂດເອເຊຍ ປາຊິຟິກ ລົງມາເປັນ 6.5 ເປີເຊັນ ສໍາລັບປີ 2012 ນີ້ ຈາກ 7.0 ເປີເຊັນຂອງປີຜ່ານມາ.
ທ່ານນາງ ນໍລີນ ເຮເຊີ ເລຂາທິ
ການບໍລິຫານ UNESCAP
ກ່າວວ່າ ຍ້ອນການເຕີບໂຕຊັກ
ຊ້າລົງກວ່າເກົ່ານັ້ນ ຈໍາເປັນຕ້ອງ
ມີຕົວຂັບດັນເສດຖະກິດແນວ
ໃໝ່ ໃນທ່າມກາງສະພາບການ
ທີ່ບໍ່ແນ່ນອນຫລາຍຂຶ້ນເລື້ອຍໆ
ຂອງໂລກນັ້ນ ຊຶ່ງທ່ານນາງກ່າວວ່າ:
“ພວກເຮົາຈໍາເປັນຕ້ອງຊອກຫາຕົວຂັບດັນແນວໃໝ່ ເພາະວ່າຕົວ ແບບເກົ່າຂອງການພັດທະນານັ້ນໃຊ້ການບໍ່ໄດ້ອີກຕໍ່ໄປແລ້ວ. ສະນັ້ນ ໃນແງ່ຂອງຕົວແບບອັນໃໝ່ນີ້ ພວກເຮົາຕ້ອງ ຫາທາງແກ້ໄຂບັນຫາຕ່າງໆຂອງການລົດຄວາມທຸກຈົນລົງ ບັນຫາຂອງຄວາມແຕກ ໂຕນກັນໃນຂົງເຂດຂອງພວກເຮົາ ເພື່ອຈະຫັນເຫສີ່ງເຫລົ່ານີ້ຄືນໃຫ້ເປັນຕົວຂັບດັນການເຕີບໂຕແນວໃໝ່”
ໃນຄໍາປາໄສໄຂກອງປະຊຸມລະດັບລັດຖະມົນຕີຂອງ UNESCAP ທີ່ ບາງກອກໃນອາທິດແລ້ວນີ້ ທ່ານນາງ ເຮເຊີ ໄດ້ບອກບັນດາຜູ້ແທນຈາກ 62 ປະເທດ ວ່າ ການເຕີບໂຕຂອງຂົງເຂດເອເຊຍປາຊິຟິກໃນໄລຍະຫຼາຍສິບປີຜ່ານມາບໍ່ນານນີ້ ແມ່ນໄດ້ມີຂຶ້ນບົນຄວາມເສຍຫາຍຂອງລະບົບນິເວດວິທະຍາ ແລະຄວາມບໍ່ເທົ່າທຽມກັນໃນສັງຄົມທີ່ເພີ່ມທະວີຂຶ້ນໄປນັບມື້.
ທ່ານ ສຸຣະພົງ ໂຕວິຈັກໃຊກຸນ ລັດຖະມົນຕີການຕ່າງປະເທດ ໄທ ບອກຄະນະກໍາມາທິການ UNESCAP ວ່າ ມັນເປັນເວລາອັນເໝາະສົມແລ້ວ ສໍາລັບຫາທາງແກ້ໄຂບັນຫາເຫລົ່ານີ້ ຕໍ່ໜ້າສິ່ງທ້າທາຍຕ່າງໆນານາຂອງເສດຖະກິດໂລກໃນປັດຈຸບັນ. ທ່ານກ່າວຕໍ່ໄປວ່າ:
“ພວກເຮົາເຊື່ອວ່າ ພະລັງຂັບດັນເພື່ອຄວາມສາມາດຢູ່ລອດແລະຄວາມຈະເລີນຮຸ່ງເຮືອງ ແມ່ນຂຶ້ນຢູ່ກັບການຮ່ວມມືທີ່ໃກ້ຊິດກັນ ຄືພວກເຮົາແຕ່ລະ ຄົນສາມາດປະກອບສ່ວນເຂົ້າໃນສະຖຽນລະພາບ ແລະຄວາມຈະເລີນ ຮຸ່ງເຮືອງຂອງຂົງເຂດ ໂດຍການລວມຕົວເຂົ້າກັນທາງດ້ານເສດຖະກິດ ໃນລະດັບຂົງເຂດ ໃຫ້ໃກ້ຊິດຂຶ້ນ. ນີ້ແມ່ນຈະອໍານວຍໃຫ້ຂົງເຂດຂອງພວກເຮົາມີສັກກະຍາພາບທາງດ້ານເສດຖະກິດແລະສັງຄົມຢ່າງມະຫາສານ.”
ສະມາຄົມອາຊ່ຽນ ທີ່ປະກອບດ້ວຍ 10 ປະເທດສະມາຊິກນັ້ນ ກໍາລັງເຄື່ອນໄຫວໄປສູ່ການເປັນຕະຫລາດດຽວກັນ ພາຍໃນ ປີ 2015 ຊຶ່ງ ຈະເປັນການເປີດກວ້າງຊາຍແດນຂອງບັນດາປະເທດສະມາຊິກ ໃຫ້ແກ່ ການຄ້າ ແລະປະຊາຊົນຂອງກັນແລະກັນ ໃນລະດັບທີ່ບໍ່ເຄີຍມີມາກ່ອນ.
ທ່ານ Tommy Koh ເອກອັກຄະລັດຖະທູດທົ່ວໄປປະຈໍາກະຊວງຕ່າງປະເທດສິງຄະໂປ ກ່າວວ່າ ການລວມຕົວເຂົ້າກັນດ້ານເສດຖະກິດ ແມ່ນຈະເພີ່ມໜ້າວຽກແລະສະວັດດີການແກ່ມະ ນຸດຫຼາຍຂຶ້ນ. ທ່ານ Koh ກ່າວວ່າ ລະບົບຕະຫລາດດຽວຂອງສະມາຄົມອາຊ່ຽນ ແມ່ນຈະຊ່ວຍໃຫ້ສາມາດຮັບມືກັບການທ້າທາຍຂອງຈີນ ແລະອິດທິພົນຂອງອິນເດຍ ທີ່ເພີ່ມຂຶ້ນນັບມື້ ຢູ່ໃນຂົງເຂດນັ້ນໄດ້ ຊຶ່ງທ່ານຊີ້ແຈງວ່າ:
“ຍົກຕົວຢ່າງ: 10 ເສດຖະກິດຂອງອາຊ່ຽນ ແມ່ນບໍ່ສາມາດທີ່ຈະແຂ່ງຂັນ ກັບຈີນ ຫຼືອິນເດຍ ຕາມລໍາພັງປະເທດດຽວໄດ້. ແຕ່ວ່າ ຖ້າຫາກພວກເຮົາ ສາມາດລວມຕົວເຂົ້າກັນເປັນນຶ່ງດຽວໄດ້ ພວກເຮົາກໍຈະມີປະຊາຊົນທີ່ເຊຶ່ອມໂຍງຂ້າມແດນ 600 ລ້ານຄົນດ້ວຍກັນ ໂດຍຈະ
ມີຜົນຜະລິດລວມ ຈໍານວນມະຫາສານ ໃນມູນຄ່າເຖິງ 1800 ຕື້ໂດລາ. ພວກເຮົາກໍຈະຢູ່ໃນສະຖານະ ພາບທີ່ດີຂຶ້ນ ເພື່ອແຂ່ງຂັນກັບອີນເດຍ ແລະຈີນ.”
ແຕ່ ທ່ານ Koh ກ່າວອີກວ່າ ຍັງມີຄວາມເປັນຫ່ວງຫຼາຍຢ່າງຢູ່ ກ່ຽວກັບຜົນກະທົບຂອງ
ການຖອຍຫຼັງຂອງພວກປະເທດໃຊ້ເງິນຢູໂຣ ແລະທ່ານຮຽກຮ້ອງໃຫ້ບັນດາຜູ້ວາງນະໂຍ
ບາຍຂອງ ອີຢູ ເລັ່ງຫາທາງແກ້ໄຂບັນຫາໃຫ້ໄດ້ໂດຍໄວ ຍ້ອນໄພຄຸກຄາມທີ່ເພີ່ມຂື້ນນັບມື້
ຂອງຜົນກະທົບຕໍ່ເສດຖະກິດໂລກນັ້ນ. ທ່ານ Koh ກ່າວວ່າ ສະພາວະຖອຍຫຼັງຂອງເຂດ
ໃຊ້ເງິນຢູໂຣ ອາດຈະສົ່ງຜົນໃຫ້ອັດຕາການເຕີບໂຕຂອງເສດຖະກິດເອເຊຍຕົກຕໍ່າລົງເຖິງ
2 ເປີເຊັນ ກໍໄດ້.
ຄະນະກໍາມາທິການ UNESCAP ກ່າວໃນທີ່ສຸດວ່າ ຂົງເຂດເອເຊຍປາຊິຟິກແມ່ນຈໍາເປັນ
ຕ້ອງສົ່ງເສີມຊຸກຍູ້ໃຫ້ມີການເຊຶ່ອມໂຍງທາງການຄ້າແລະທຸລະກິດລະດັບພູມີພາກ ທີ່ປາດ
ສະຈາກເຂດແດນ ພ້ອມທັງການຮ່ວມມືດ້ານການເງິນ ແລະການຕອບໂຕ້ລະດັບຂົງເຂດ
ທີ່ມີການປະສານງານກັນເປັນຢ່າງດີ ຕໍ່ຄວາມສ່ຽງຕ່າງໆ ທີ່ເກີດຈາກໄພຄຸກຄາມທາງ
ສັງຄົມແລະສະພາບແວດລ້ອມນັ້ນ.
