ອົງການຊວ່ຍເຫຼືອ ຂອງສະຫະປະຊາຊາດ ປະຈຳອັຟການິສຖານ
ຫຼື UNAMA ໄດ້ປະກາດ ໃນວັນພຸດມື້ນີ້ ຢູ່ທີ່ນະຄອນຫຼວງກາບູລ
ວ່າ ຈຳນວນພົນລະເຮືອນທີ່ເສຍຊີວິດ ແລະ ໄດ້ຮັບບາດເຈັບ ໃນ
ການສູ້ລົບກັນ ຢູ່ໃນອັຟການິສຖານ ປີນີ້ ແມ່ນຄາດຄະເນວ່າ ຈະ
ເທົ່າກັບ ຫຼື ເກີນກວ່າ ຈຳນວນການເສຍຊີວິດ ທີ່ຮ້າຍແຮງທີ່ສຸດ
ຂອງປີ ທີ່ປະເທດໄດ້ບັນທຶກໄວ້.
ອີງຕາມອົງການ UNAMA ແລ້ວ “ບົດລາຍງານກາງປີ 2015
ກ່ຽວກັບ ການປົກປ້ອງພົນລະເຮືອນ ໃນການສູ້ລົບ” ຫຼື
2015 Midyear Report on Protection of Civilians in
Armed Conflict, ແມ່ນວ່າ ມີພົນລະເຮືອນ 4,921 ຄົນເສຍຊີວິດ
ແລະ ໄດ້ຮັບບາດເຈັບ ທີ່ຖືກບັນທຶກໄວ້ ໃນເຄິ່ງປີທຳອິດຂອງ 2015. 1,592 ຄົນເສຍຊີວິດ ແລະ 3,329 ຄົນໄດ້ຮັບບາດເຈັບ ອັນເປັນຕົວເລກທີ່ ເພີ້ມຂຶ້ນໃນອັດຕາ 1 ເປີເຊັນ ຂອງ
ຈຳນວນ ທັງໝົດຂອງຜູ້ເຄາະຮ້າຍ ເມື່ອປຽບທຽບໃສ່ຊ່ວງເວລາດຽວກັນນີ້ ໃນປີ 2014 ຊຶ່ງ
ເປັນປີ ທີ່ມີການເສຍຊີວິດຫຼາຍທີ່ສຸດ ເປັນປະຫວັດການ ສຳຫລັບພົນລະເຮືອນ.
ບົດລາຍງານກ່າວວ່າ 90 ເປີເຊັນ ຂອງພົນລະເຮືອນຜູ້ເຄາະຮ້າຍ ເປັນຜົນມາຈາກການ
ຕໍ່ສູ້ກັນທາງພາກພື້ນດິນ ລວມດ້ວຍ “ລະເບີດທີ່ປະດິດຂຶ້ນມາດ້ວຍວັດຖຸທີ່ມີຢູ່, ການ
ໂຈມຕີທີ່ຊັບຊ້ອນ ແລະ ການໂຈມຕີສະຫລະຊີບ ແລະ ການສັງຫານແບບມີເປົ້າໝາຍ.”
ບົດລາຍງານຍັງໄດ້ ໃຫ້ເຫດຜົນວ່າ 70 ເປີເຊັນ ຂອງພົນລະເຮືອນຜູ້ເຄາະຮ້າຍ ແມ່ນເກີດ
ຈາກກອງກຳລັງຕໍ່ຕ້ານລັດຖະບານ ຊຶ່ງໄດ້ຫລຸດລົງພຽງເລັກນ້ອຍ ຈາກປີ 2014. ການ
ສັງຫານແບບມີເປົ້າໝາຍ ຕໍ່ ພົນລະເຮືອນ ທີ່ສົງໄສວ່າ ສະໜັບສະໜູນລັດຖະບານນັ້ນ
ເປັນເຫດຜົນ ອັນດັບໜຶ່ງໃນການເສຍຊີວິດ.
ພົນລະເຮືອທີ່ເສຍຊີວິດ ແລະ ບາດເຈັບ ຍ້ອນກອງກຳລັງທີ່ສະໜັບ ສະໜູນລັດຖະບານ
ແມ່ນປະກອບເປັນ 16 ເປີເຊັນ ຂອງຈຳນວນ ພົນລະເຮືອນຜູ້ເຄາະຮ້າຍທັງໝົດ ແລະ15
ເປີເຊັນ ເປັນຍ້ອນກຳລັງຮັກສາຄວາມໝັ້ນຄົງແຫ່ງຊາດ ແລະ ພວກທະຫານບ້ານ ທີ່
ສະໜັບສະໜູນ ລັດຖະບານ ແລະ 1 ເປີເຊັນ ແມ່ນເປັນຍ້ອນອົງການ NATO ແລະ
ກອງກຳລັງສະຫະລັດ. ຜູ້ເຄາະຮ້າຍ ຈາກກອງກຳລັງສະໜັບສະໜູນລັດຖະບານນັ້ນ
ແມ່ນເພີ້ມຂຶ້ນ 60 ເປີເຊັນ ໃນລະຍະດຽວກັນ ກັບປີແລ້ວນີ້.