ອົງການແມ່ແລະເດັກຂອງສະຫະປະຊາຊາດ ກ່າວວ່າ ມີປະ
ມານ 100,000 ຄົນ ບໍ່ມີທີ່ຢູ່ອາໄສຍ້ອນບັນຫາຂັດແຍ້ງກັນ
ໃນເຢເມນໃນຂະນະທີ່ພວກເດັກນ້ອຍຍັງສືບຕໍ່ຖືກຂ້າຕາຍ
ເສຍອົງຄະແລະສ່ຽງຕໍ່ການຕິດແປດພະຍາດ.
ອົງການແມ່ແລະເດັກ ສະຫະປະຊາຊາດ ຫລື UNICEF ໄດ້
ອອກຖະແຫລງການສະບັບນຶ່ງກ່າວວ່າ ຢູ່ທົ່ວເຢເມນ ປະຊາ
ຊົນໄດ້ຫລົບໜີຈາກບ້ານເຮືອນເຂົາເຈົ້າ ເພື່ອຊອກຫາບ່ອນ
ຢູ່ທີ່ປອດໄພ ຊຶ່ງໄດ້ເພີ້ມຄວາມກົດດັນ ຕໍ່ໂຮງໝໍຕ່າງໆ ແລະ
ການບໍລິການອຶ່ນໆ.
ສປຊ ວ່າ ມີຜູ້ປະສົບ ໄພສົງຄາມ ຫຼາຍກວ່າ 1 ແສນຄົນ ໃນເຢເມນ
ຖະແຫລງການກ່າວວ່າ ການອົບພະຍົບຫລົບໄພຢູ່ພາຍໃນປະເທດ ໄດ້ເຮັດໃຫ້ສຸຂະພາບເດັກນ້ອຍຕົກຢູ່ໃນຄວາມສ່ຽງ ແລະລົບກວນການສຶກສາຂອງເຂົາເຈົ້າ. ອົງການ UNICEF ໄດ້ຮຽກຮ້ອງໃຫ້ເອົາໃຈໃສ່ເປັນພິເສດແລະໃຫ້ການປົກປ້ອງ ແກ່ບັນດາເດັກ
ນ້ອຍເຫລົ່ານີ້ ແລະຄອບຄົວຂອງເຂົາເຈົ້າ ເພື່ອໃຫ້ສອດຄ່ອງກັບກົດໝາຍມະນຸດສະທຳ
ສາກົນ.
ໃນວັນຈັນວານນີ້ ໄດ້ເກີດການປະທະກັນຢ່າງຮ້າຍແຮງ ຢູ່ໃນພາກໃຕ້ເຢເມນ ລະຫວ່າງ
ພວກກະບົດ Houthi ຂອງຊາວ Shi’ite ແລະກຳລັງຈົງຮັກພັກດີຕໍ່ ປະທານາທິບໍດີຂອງປະເທດ ໃນຂະນະທີ່ສະພາກາແດງ ປະເຊີນໜ້າກັບການຊັກຊ້າໃນການຈັດສົ່ງການຊ່ວຍ
ເຫຼືອຕ່າງໆ ທີ່ມີຄວາມຕ້ອງການຢ່າງຮິບດ່ວນນັ້ນ.
ພວກກະບົດ Houthi ໄດ້ພະຍາຍາມເສີ້ມກຳລັງໃຫ້ແກ່ທີ່ໝັ້ນຂອງເຂົ້າເຈົ້າຢ່າງເຕັມທີ່ ຢູ່ເມືອງທ່າ Aden ແລະຢູ່ພາກຕາເວັນຕົກຂອງເມືອງດັ່ງກ່າວ. ບັນດາຜູ້ເຫັນເຫດການກ່າວວ່າ ເຮືອລົບຕ່າງປະເທດ ໄດ້ຍິງໂຈມຕີເປົ້າໝາຍຕ່າງໆ ຢູ່ໃນ ແລະອ້ອມແອ້ມເມືອງ Aden ແລະກຳລັງປະສົມ ພາຍໃຕ້ການນຳພາຂອງ ຊາອຸດີ ກໍໂຈມຕີທາງອາກາດ ໃສ່ຖານທັບ
ແຫ່ງນຶ່ງຢູ່ທາງພາກເໜືອຂອງເມືອງ Aden ຊຶ່ງໄດ້ບັງຄັບໃຫ້ພວກນັກລົບ Houthi ແຕກ
ໜີໄປຈາກເຂດດັ່ງກ່າວ
ບັນດາເຮືອບິນລົບຂອງກຳລັງປະສົມ ຍັງໄດ້ປະຕິບັດງານໂຈມຕີທາງອາກາດ ທີ່ໃນນະຄອນຫລວງ Sana’a ໂດຍຖືກກອງບັນຊາກາຮັກສາຄວາມປອດໄພແລະ ຄ້າຍທະຫານ
ທີ່ໃຊ້ໂດຍພວກກະບົດ.
