ເຈົ້າໜ້າທີ່ຢູເຄຣນ ກ່າວໃນວັນພະຫັດມື້ນີ້ວ່າ ການໂຈມຕີດ້ວຍເຮືອບິນບໍ່ມີຄົນຂັບຂອງຣັດເຊຍ ໃນຊ່ວງຂ້າມຄືນ ໄດ້ສັງຫານຢ່າງໜ້ອຍ 4 ຄົນ ແລະເຮັດໃຫ້ມີຜູ້ໄດ້ຮັບບາດເຈັບອີກ 10 ຄົນ ໃນເມືອງ ຄາກີຟ ທາງພາກຕາເວັນອອກຂອງປະເທດ.
ເຈົ້າເມືອງຄາກີຟ ທ່ານ ອີກໍ ເທເຣຄອຟ (Igor Terekhov) ກ່າວວ່າ ເຮືອບິນບໍ່ມີຄົນຂັບ ໄດ້ໂຈມຕີຕຶກອາຄານຫຼາຍຫຼັງ.
ທ່ານ ໂອເລກ ຊີເນກູບອບວ໌ (Oleg Sinegubov), ຜູ້ປົກຄອງພາກພື້ນ ຄາກີຟ ກ່າວວ່າ ການໂຈມຕີຂອງຣັດເຊຍ ຍັງໄດ້ຖືກ ເມືອງ ໂລໂຊວາ (Lozova) ແລະ ເມືອງ ຊູຮຸຍຟ໌ (Chuhuiv) ອີກດ້ວຍ.
ກະຊວງປ້ອງກັນປະເທດຣັດເຊຍ ກ່າວໃນວັນພະຫັດມື້ນີ້ວ່າ ຕົນໄດ້ຂັດຂວາງການໂຈມຕີດ້ວຍເຮືອບິນບໍ່ມີຄົນຂັບຂອງຢູເຄຣນ ທີ່ແນເປົ້າໃສ່ສອງເຂດໃນພາກຕາເວັນຕົກຂອງຣັດເຊຍ.
ກະຊວງປ້ອງກັນປະເທດຣັດເຊຍກ່າວວ່າ, ການປ້ອງກັນທາງອາກາດຂອງຕົນໄດ້ຍິງໂດຣນ 3 ລຳຕົກຢູ່ເມືອງ ແບລໂກຣອດ (Belgorod), ເຊິ່ງມີຊາຍແດນຕິດກັບຢູເຄຣນ, ພ້ອມກັບເຮືອບິນບໍ່ມີຄົນຂັບ ອີກສອງລຳຢູ່ເຂດ ທູລາ (Tula).
ຢູເຄຣນ ແລະ ຟິນແລນ ໄດ້ລົງນາມໃນຂໍ້ຕົກລົງຄວາມໝັ້ນຄົງ ໄລຍະເວລາ 10 ປີ ໃນວັນພຸດວານນີ້.
ຂໍ້ຕົກລົງດັ່ງກ່າວເຮັດໃຫ້ຟິນແລນກາຍເປັນສະມາຊິກ ລຳດັບທີ່ 8 ຂອງອົງການເນໂຕ ໃນປີນີ້ ທີ່ເຫັນດີໃຫ້ການສະໜັບສະໜູນດ້ານຄວາມໝັ້ນຄົງ ແລະ ການປ້ອງກັນປະເທດໃນໄລຍະຍາວສຳລັບຢູເຄຣນ ໃນການຕໍ່ສູ້ຕ້ານຜູ້ຮຸກຮານຣັດເຊຍ.
ປະທານາທິບໍດີ ຟິນແລນ ທ່ານ ອາເລັກຊານເດີ ສຕູບ (Alexander Stubb) ກ່າວວ່າ ປະເທດຂອງທ່ານຍັງຈະສົ່ງເງິນຊ່ວຍເຫລືອດ້ານການທະຫານຕື່ມອີກ 203 ລ້ານໂດລາສະຫະລັດ ໃຫ້ແກ່ຢູເຄຣນ ຮວມທັງລະບົບປ້ອງກັນໄພທາງອາກາດ ແລະລູກປືນໃຫຍ່. ຈຳນວນການຊ່ວຍເຫຼືອທັງໝົດດັ່ງກ່າວເຮັດໃຫ້ການປະກອບສ່ວນທາງດ້ານການປ້ອງກັນປະເທດໂດຍລວມຂອງຟິນແລນ ມີມູນຄ່າເກືອບ 2.2 ຕື້ໂດລາສະຫະລັດໃນຊ່ວງສົງຄາມ.
ທ່ານ ສຕູບ (Stubb) ກ່າວໃນກອງປະຊຸມຖະແຫຼງຂ່າວຮ່ວມກັບປະທານາທິບໍດີຢູເຄຣນ ທ່ານ ໂວໂລດີເມຍ ເຊເລັນສກີ ວ່າ "ພວກເຮົາບໍ່ໄດ້ໃຫ້ການສະຫນັບສະຫນຸນທາງທະຫານນີ້ ພຽງແຕ່ຢູເຄຣນ ເພື່ອປ້ອງກັນຕົນເອງເທົ່ານັ້ນ, ພວກເຮົາໃຫ້ການສະຫນັບສະຫນູນທາງທະຫານນີ້ ເພື່ອໃຫ້ຢູເຄຣນຊະນະສົງຄາມຄັ້ງນີ້".
ຟໍຣັມສະແດງຄວາມຄິດເຫັນ