ຫ້ອງການສືບລັບຂອງ ຢູເຄຣນ ໄດ້ກ່າວໃນວັນອາທິດວານນີ້ວ່າການລະເບີດໃນເມືອງ ເມລິໂຕໂປລ ທີ່ຖືກຄວບຄຸມໂດຍ ຣັດເຊຍ ໄດ້ເຮັດໃຫ້ທະຫານ ຣັດເຊຍ 3 ຄົນເສຍຊີວິດ ໃນການໂຈມຕີທີ່ເຂົາເຈົ້າໄດ້ອະທິບາຍວ່າເປັນ “ການແກ້ແຄ້ນ” ໂດຍກຸ່ມໃຕ້ດິນໃນທ້ອງຖິ່ນ.
ການລະເບີດໄດ້ເກີດຂຶ້ນໃນລະຫວ່າງການປະຊຸມ ຂອງພວກເຈົ້າໜ້າທີ່ ຣັດເຊຍ ໃນເມືອງດັ່ງກ່າວເມື່ອວັນເສົາທີ່ຜ່ານມາ, ເຊິ່ງເປັນສູນກາງຂອງກອງກຳລັງ ຣັດເຊຍ ໃນພາກໃຕ້, ຫ້ອງການຢູ່ໃນກະຊວງປ້ອງກັນປະເທດ ໄດ້ກ່າວໃນຖະແຫຼງການສະບັບນຶ່ງ.
ເຂົາເຈົ້າໄດ້ກ່າວວ່າ “ການແກ້ແຄ້ນທີ່ວ່ານີ້, ຖືກດຳເນີນໂດຍພວກຕົວແທນຂອງກຸ່ມຕໍ່ຕ້ານໃນທ້ອງຖິ່ນ, ທີ່ໄດ້ເກີດຂຶ້ນໃນຫ້ອງການໃໝ່ ທີ່ຖືກຍຶດໂດຍຣັດເຊຍ.”
ມັນບໍ່ໄດ້ມີການກ່າວເຖິງເຫດການນັ້ນຈາກພວກເຈົ້າໜ້າທີ່ ຣັດເຊຍ. ອົງການຂ່າວ ຣອຍເຕີ ແມ່ນບໍ່ສາມາດທີ່ຈະຢືນຢັນຖະແຫຼງການຂອງ ຢູເຄຣນ.
ຖະແຫຼງການຂໍ້ມູນລັບໄດ້ກ່າວວ່າ ການປະຊຸມດັ່ງກ່າວ ຢູ່ກອງບັນຊາການທະຫານໃນທ້ອງຖິ່ນເມື່ອວັນເສົາທີ່ຜ່ານມາ ແມ່ນເຂົ້າຮ່ວມໂດຍພວກເຈົ້າໜ້າທີ່ຈາກກອງທະຫານຮັກສາດິນແດນ ແລະ ອົງການສືບລັບ FSB ຂອງ ຣັດເຊຍ.
