ຢູເຄຣນກ່າວວ່າ ຕົນຈະບໍ່ອະນຸຍາດໃຫ້ຂະບວນລົດຂົນສົ່ງ
280 ຄັນ ທີ່ນຳເອົາ ການຊ່ວຍເຫລືອດ້ານມະນຸດສະທຳ
ຈາກຣັດເຊຍ ເຂົ້າໄປໃນປະເທດຂອງຕົນ.
ເຈົ້າໜ້າທີ່ຢູເຄຣນກ່າວໃນວັນອັງຄານມື້ນີ້ວ່າ ການຊ່ວຍ
ເຫລືອດັ່ງກ່າວຈະໄດ້ຮັບ ການປະຕິເສດກໍຍ້ອນວ່າ ບໍ່ໄດ້
ຮັບການປະສານງານຈາກສະພາກາແດງແລະອາດຈະ
ໃຊ້ເປັນຂໍ້ອ້າງໂດຍຣັດເຊຍເພື່ອສົ່ງທະຫານເຂົ້າໄປໃນ
ເຂດຄວບຄຸມຂອງພວກແບ່ງແຍກດິນແດນນັ້ນ.
ໂທລະພາບຣັດເຊຍລາຍງານໃນວັນອັງຄານມື້ນີ້ວ່າ ການ
ໃຫ້ຄວາມຊ່ວຍເຫລືອດັ່ງກ່າວມີຂຶ້ນ ໂດຍໄດ້ຮັບຄວາມຮ່ວມມືຈາກຄະນະກຳມະການ
ສະພາກາແດງ ສາກົນ.
ແຕ່ໃນຖະແຫລງການສະບັບນຶ່ງ ທີ່ນຳອອກເຜີຍແຜ່່ໃນວັນຈັນວານນີ້ ສະພາກາແດງ
ເວົ້າວ່າ ບໍ່ມີຂໍ້ຕົກລົງໃດໆ ກັບຣັດເຊຍ ໃນການເຂົ້າຮ່ວມການປະຕິບັດງານ ເວລານີ້
ແລະກ່າວຕື່ມວ່າ “ລາຍລະອຽດຕ່າງໆ ຕ້ອງໄດ້ມີການໃຫ້ຄວາມແຈ່ມແຈ້ງເພີ້ມຕື່ມ"
ກ່ອນທີ່ການປະຕິບັດງານຈະດຳເນີນຕໍ່ໄປ.
ມີລາຍງານວ່າ ຫລາຍພັນຄົນ ຢູ່ໃນເຂດພາກຕາເວັນອອກຂອງຢູເຄຣນ ທີ່ປາກພາສາ
ຣັດເຊຍ ຂາດນໍ້າ ດື່ມ ຢາປົວພະຍາດ ແລະໄຟຟ້າໃຊ້ ໃນຂະນະທີ່ກຳລັງຢູເຄຣນ ພວມທຳ
ການສູ້ລົບກັບພວກແບ່ງແຍກດິນແດນນິຍົມຣັດເຊຍ ທີ່ພະຍາ ຍາມຈະສ້າງຕັ້ງເຂດປົກ
ຄອງຕົນເອງຂຶ້ນ ໃກ້ກັບຊາຍແດນຂອງຣັດເຊຍ.
ພາບຫຼ້າສຸດ ຈາກ ຢູເຄຣນ
ການປະກາດໃຫ້ການຊ່ວຍເຫລືອບັນເທົາທຸກຂອງຣັດເຊຍ ໄດ້ກໍ່ໃຫ້ເກີດມີການ ສະແດງ
ຄວາມເຫັນຢ່າງລະມັດລະວັງ ຈາກລັດຖະບານປະເທດຕາເວັນຕົກ ທີ່ໄດ້ເຕືອນມົສກູ ບໍ່
ໃຫ້ໃຊ້ການຊ່ວຍເຫລືອດ້ານມະນຸດສະທໍາ ເປັນຂໍ້ແກ້ຕົວເພື່ອ ທຳການລຸກລານທາງ
ທະຫານ.
ໃນຕອນເຊົ້າວັນຈັນວານນີ້ ປະທານາທິບໍດີສະຫະລັດ ທ່ານ Barack Obama ແລະຄູ່
ຕຳແໜ່ງຝ່າຍຢູເຄຣນທ່ານ Petro Proshenko ໄດ້ໂອ້ລົມກັນທາງໂທ ລະສັບ ແລະ
ໄດ້ ເຫັນດີນຳກັນວ່າ ການມີໜ້າໃດໆກໍຕາມຂອງຣັດເຊຍ ຢູ່ໃນ ຢູເຄຣນໂດຍປາດສະຈາກການເຫັນດີຂອງ Kyiv ນັ້ນ ຈະເປັນການລະເມີດຕໍ່ກົດ ໝາຍສາກົນ.
ເວັບໄຊທ໌ຂອງປະທານາທິບໍດີຢູເຄຣນ ຕໍ່ມາໄດ້ກ່າວວ່າ ແຜນການປະຕິບັດງານໃຫ້
ຄວາມຊ່ວຍເຫລືອ ໄດ້ຮຽກຮ້ອງໃຫ້ມີການເຂົ້າຮ່ວມ ຂອງສະຫະພາບຢູໂຣບ ຣັດເຊຍ
ເຢຍຣະມັນ ແລະ “ປະເທດພາຄີອື່ນໆ.”