ຫຼັງຈາກທີ່ມີການຄາດຄະເນມາຫຼາຍມື້ໃນຢູເຄຣນ, ປະທານາທິບໍດີ ໂວໂລດີເມຍ ເຊເລັນສກີ (Volodymyr Zelenskyy) ໃນວັນພະຫັດວານນີ້ ໄດ້ປົດນາຍພົນ ວາເລຣີ ຊາລຸສນີ (Valerii Zaluzhnyi), ຜູ້ບັນຊາການທະຫານສູງສຸດ ຂອງປະເທດ ຜູ້ທີ່ໄດ້ນຳພາການຕໍ່ສູ້ ຕ້ານການຮຸກຮານຂອງຣັດເຊຍ ເປັນເວລາ 2 ປີ, ແລະແຕ່ງຕັ້ງນາຍພົນ ໂອເລັກແຊນເດີ ຊີຣສະກີ (Oleksandr Syrskyi) ເຂົ້າຮັບຕຳແໜ່ງແທນທ່ານ.
ເນື່ອງຈາກສົງຄາມເບິ່ງຄືວ່າ ຈະມາຮອດທາງຕັນ, ທ່ານເຊເລັນກີ ກ່າວໃນຖະ ແຫຼງການວ່າທ່ານໄດ້ພົບກັບ ທ່ານ ຊາລຸສນີ (Zaluzhnyi), ເຊິ່ງບາງຄົນເບິ່ງວ່າເປັນວິລະຊົນແຫ່ງຊາດໃນການປົກປ້ອງຢູເຄຣນ, ແລະຂອບໃຈທ່ານ ສໍາລັບການນໍາພາການສູ້ລົບ ກັບກອງກຳລັງຂອງມົສກູ ໃນຂະນະທີ່ ນັກວິເຄາະທາງທະຫານຫຼາຍຄົນຄິດວ່າ ຢູເຄຣນຈະຖືກຮຸກຮານຢ່າງໄວວາ.
ແນວໃດກໍຕາມ, ທ່ານເຊເລັນສກີ ກ່າວວ່າ ມັນເຖິງເວລາແລ້ວ ທີ່ຈະຕ້ອງປ່ຽນ ແປງຜູ້ນໍາພາຂອງກອງທັບ.
ທ່ານ ເຊເລັນສກີ ກ່າວໃນເວທີສື່ສັງຄົມ X ເຊິ່ງໃນເມື່ອກ່ອນເອີ້ນ ທວີຕເຕີ ວ່າ "ຕອນນີ້ແມ່ນເວລາສຳລັບການປ່ຽນແປງໃໝ່."
"ພວກເຮົາໄດ້ປຶກສາຫາລືກ່ຽວກັບ ການປ່ຽນແປງໃຫມ່ທີ່ກອງທັບຢູເຄຣນຕ້ອງ ການ. ພວກເຮົາຍັງໄດ້ປຶກສາຫາລືວ່າ ໃຜແນ່ທີ່ຈະສາມາດເປັນສ່ວນນຶ່ງຂອງການນຳພາໃໝ່ ຂອງກອງທັບຢູເຄຣນ," ທ່ານກ່າວ.
ຟໍຣັມສະແດງຄວາມຄິດເຫັນ