ກອງທັບຂອງ ຢູເຄຣນ ໄດ້ກ່າວໃນວັນພະຫັດມື້ນີ້ວ່າກອງກຳລັງ ຣັດເຊຍ ໄດ້ທຳການໂຈມຕີເມື່ອຂ້າມຄືນທີ່ຜ່ານມາດ້ວຍລູກສອນໄຟ 19 ລູກ ແລະ ໂດຣນ 32 ລຳ ທີ່ຖືກຍິງໂດຍກົງໃສ່ບໍລິເວນຕ່າງໆທົ່ວ ຢູເຄຣນ, ໃນຂະນະທີ່ ຣັດເຊຍ ໄດ້ລາຍງານການໂຈມຕີດ້ວຍໂດຣນທາງອາກາດ ແລະ ທາງທະເລໂດຍ ຢູເຄຣນ.
ກອງທັບອາກາດ ຢູເຄຣນ ໄດ້ກ່າວວ່າລະບົບປ້ອງກັນອາກາດຂອງປະເທດໄດ້ຍິງໂດຣນຕົກທັງໝົດ 32 ລຳ, ພ້ອມກັບລູກສອນໄຟ 7 ລູກ.
ທ່ານ ເຊີຮີ ລີແຊັກ, ຜູ້ປົກຄອງພາກພື້ນ ດນິບໂປຣເປຕຣອບ ໃນພາກກາງຂອງ ຢູເຄຣນ, ໄດ້ກ່າວວ່າໂດຣນ 7 ລຳແມ່ນຖືກຍິງຕົກຢູ່ທີ່ນັ້ນ, ດ້ວຍຊາກຫັກພັງໄດ້ສ້າງຄວາມເສຍຫາຍຕໍ່ເຮືອນຫຼັງນຶ່ງ ແລະ ສາຍໄຟຟ້າ.
ການສະກັດກັ້ນລູກສອນໄຟ ແລະ ໂດຣນ ກໍຍັງໄດ້ເກີດຂຶ້ນຢູ່ທ້ອງຟ້າຂອງພາກພື້ນ ເຊີກາຊີ, ເຄີສັນ, ຄແມລນິດສກີ, ຄີໂຣໂວຣາດ, ກີຢິບ, ໂອເດຊາ, ວິນນິດເຊຍ ແລະ ຊາໂປຣິສເຊຍ.
ກະຊວງປ້ອງກັນປະເທດຂອງ ຣັດເຊຍ ໄດ້ກ່າວວ່າພວກເຂົາໄດ້ທຳລາຍໂດຣນທາງອາກາດຂອງ ຢູເຄຣນ 5 ລຳຢູ່ພາກພື້ນ ຄຣາສໂນດາ ທາງພາກຕາເວັນຕົກສຽງໃຕ້ຂອງປະເທດ.
ລະບົບປ້ອງກັນອາກາດຂອງ ຣັດເຊຍ ຍັງໄດ້ຍິງລູກສອນໄຟຍຸດທະວິທີຕົກ 8 ລູກຢູ່ເໜືອທະເລ ອາຊອຟ ແລະ ໂດຣນ 8 ລຳໃກ້ກັບແຫຼມ ໄຄຣເມຍ ທີ່ຖືກຄວບຄຸມໂດຍ ຣັດເຊຍ. ໂດຣນທາງທະເລສອງລຳຂອງ ຢູເຄຣນ ທີ່ມຸ່ງໜ້າໄປສູ່ແຫຼມ ໄຄຣເມຍ ແມ່ນຖືກທຳລາຍໃນທະເລດຳ, ອີງຕາມການກ່າວຂອງກະຊວງປ້ອງກັນປະເທດ ຣັດເຊຍ.
ປະທານາທິບໍດີ ຢູເຄຣນ ທ່ານ ໂວໂລດີເມຍ ເຊເລັນສກີ ໄດ້ກ່າວໃນຂໍ້ຄວາມທາງວິດີໂອເມື່ອແລງວັນພຸດວານນີ້ວ່າ ເກືອບ 100 ປະເທດ ແລະ ອົງການຈັດຕັ້ງສາກົນແມ່ນມີກຳນົດທີ່ຈະເຂົ້າຮ່ວມໃນກອງປະຊຸມໃຫຍ່ສັນຕິພາບ ທີ່ຈະຖືກຈັດຂຶ້ນກາງເດືອນມິຖຸນາໃນປະເທດ ສວິດເຊີແລນ.
ທ່ານ ເຊເລັນສກີ ໄດ້ກ່າວວ່າລັດຖະບານຂອງທ່ານໄດ້ພົບການສະໜັບສະໜູນສຳລັບຄວາມພະຍາຍາມດັ່ງກ່າວ ເຖິງແມ່ນຈະມີສິ່ງທີ່ທ່ານອະທິບາຍດັ່ງກັບ ການພະຍາຍາມຂອງ ຣັດເຊຍ ເພື່ອຫຼົ້ມກອງປະຊຸມນັ້ນກໍຕາມ.
ຟໍຣັມສະແດງຄວາມຄິດເຫັນ