ກອງທັບຢູເຄຣນກ່າວໃນວັນຈັນມື້ນີ້ວ່າ ຣັດເຊຍໄດ້ທໍາການໂຈມຕີປະເທດຂອງຕົນໃນຕອນກາງຄືນດ້ວຍເຮືອບິນບໍ່ມີຄົນຂັບ 7 ລຳ ແລະລູກສອນໄຟນຳວິຖີອີກ 3 ລູກ.
ກອງທັບອາກາດຢູເຄຣນກ່າວວ່າ ກອງກໍາລັງປ້ອງກັນທາງອາກາດຂອງຕົນໄດ້ຍິງເຮືອບິນບໍ່ມີຄົນຂັບ 5 ລຳຕົກ, ໂດຍການສະກັດກັ້ນທັງໝົດເກີດຂຶ້ນຢູ່ບໍລິເວນພາກພື້ນ ໂອເດຊາ ທີ່ຕັ້ງຢູ່ທາງພາກໃຕ້ຂອງຢູເຄຣນ.
ທ່ານໂອເລ ຄິບເປີ້, ຜູ້ປົກຄອງພາກພື້ນໂອເດຊາກ່າວໃນເທເລກຣາມວ່າ ການໂຈມຕີທາງອາກາດ ໄດ້ທໍາລາຍອາຄານສາງເກັບເຄື່ອງ ແລະເຄື່ອງຈັກດ້ານການກະສິກໍາ ພ້ອມດ້ວຍເຄື່ອງຂອງອື່ນໆ.
ທ່ານ ຄິບເປີ້ ກ່າວວ່າ ບໍ່ມີລາຍງານກ່ຽວກັບການບາດເຈັບໃດໆ.
ການໂຈມຕີຄັ້ງລ່າສຸດ ມີຂຶ້ນໃນຂະນະທີ່ສະພາສູງສະຫະລັດຄາດວ່າ ຈະໃຫ້ການອະນຸມັດຕໍ່ຮ່າງກົດໝາຍໃນອາທິດນີ້ ເຊິ່ງລວມມີການຊ່ວຍເຫຼືອຈໍານວນ 60 ຕື້ໂດລາໃຫ້ແກ່ຢູເຄຣນ.
ມາດຕະການດັ່ງກ່າວ ແມ່ນໄດ້ຮັບການຜ່ານຢູ່ໃນສະພາຕໍ່າຂອງສະຫະລັດແລ້ວ ແລະໄດ້ຮັບການສະໜັບສະໜູນຈາກປະທານາທິບໍດີ ທ່ານໂຈ ໄບເດັນ ອີກດ້ວຍ.
ປະທານາທິບໍດີຢູເຄຣນ ທ່ານໂວໂລດີເມຍ ເຊເລັນສກີ ກ່າວຢູ່ຄຳປາໄສໃນຕອນກາງຄືນວັນອາທິດວານນີ້ຂອງທ່ານວ່າ ຊຸດການຊ່ວຍເຫຼືອດັ່ງກ່າວລວມມີ “ອຸປະກອນຕ່າງໆທີ່ບັນດານັກລົບແນວໜ້າຂອງພວກເຮົາຄາດຫວັງຫຼາຍທີ່ສຸດ.”
ທ່ານ ເຊເລັນສກີ ກ່າວວ່າ ໄລຍະເວລາລະຫວ່າງການຜ່ານຮ່າງກົດໝາຍ ແລະການຊ່ວຍເຫຼືອດ້ານການທະຫານ ກໍາລັງກ້າວເຂົ້າສູ່ກຳມືຂອງທະຫານຢູເຄຣນ “ມີຄວາມເປັນໄປໄດ້ວ່າ ໃນເວລາອັນໃກ້ນີ້.”
ຟໍຣັມສະແດງຄວາມຄິດເຫັນ