ກອງທັບຢູເຄຣນລາຍງານໃນວັນຈັນມື້ນີ້ວ່າ ໄດ້ຍິງເຮືອບິນບໍ່ມີຄົນຂັບ 17 ລໍາ ໃນຈຳນວນ 22 ລຳ ຕົກ ທີ່ຣັດເຊຍ ໄດ້ສົ່ງຂຶ້ນ ໃນການໂຈມຕີຊ່ວງຂ້າມຄືນ ທີ່ແນເປົ້າໃສ່ເຂດຕ່າງໆ ໃນທົ່ວປະເທດ.
ກອງທັບອາກາດຢູເຄຣນກ່າວວ່າ ການໂຈມຕີຂອງຣັດເຊຍ ຍັງລວມທັງລູກສອນໄຟ 5 ລູກ ທີ່ແນເປົ້າໃສ່ເຂດ ຄາກີຟ (Kharkiv) ທີ່ຕັ້ງຢູ່ຕາມແນວຊາຍແດນຢູເຄຣນ-ຣັດເຊຍ ແລະລູກສອນໄຟອີກສອງລູກ ທີ່ແນເປົ້າໃສ່ເຂດ ຊູມີ (Sumy) ທີ່ຢູ່ໃກ້ຄຽງ.
ເຮືອບິນບໍ່ມີຄົນຂັບດັ່ງກ່າວ ໄດ້ແຜ່ຂະຫຍາຍໄປຢ່າງກວ້າງຂວາງ, ໂດຍກອງທັບຢູເຄຣນ ກ່າວວ່າ ການຂັດຂວາງຂອງຕົນ ໄດ້ເກີດຂຶ້ນໃນເຂດ ກີຢິບ (Kyiv), ໂປລຕາວາ (Poltava), ຄະເມລນິສກີ (Khmelnytskyi), ເຊີກາຊີ (Cherkasy), ຄີໂຣໂວຣາດ (Kirovohrad), ດນິບໂປຣເປໂທຣບ (Dnipropetrovsk), ວິນນິດເຊຍ (Vinnytsia), ຊາໂປຣິສເຊຍ (Zaporizhzhya), ແລະ ຣີບນີ (Rivne).
ທ່ານ ເຊີຮີ ລີຊັກ (Serhiy Lysak) ຜູ້ປົກຄອງພາກພື້ນ ດນິບໂປຣເປໂທຣບ (Dnipropetrovsk) ລາຍງານວ່າ ມີຊາກຫັກພັງ ຕົກໃສ່ເທິງຫລັງຄາຂອງອາຄານທີ່ຢູ່ອາໄສແຫ່ງນຶ່ງ ແລະເຮັດໃຫ້ເກີດໄຟໄຫມ້.
ການໂຈມຕີດ້ວຍເຮືອບິນບໍ່ມີຄົນຂັບ ຍັງໄດ້ສ້າງຄວາມເສຍຫາຍ ໃຫ້ແກ່ຕຶກອາຄານທີ່ຢູ່ອາໄສ ແລະໂຮງງານອຸດສາຫະກຳໃນພາກພື້ນ ຄີໂຣໂວຣາດ (Kirovohrad), ອີງຕາມການກ່າວຂອງຜູ້ປົກຄອງພາກພື້ນ ທ່ານ ອັງດຣີ ເຣໂຄວິຊ (Andriy Raykovych).
ປະທານາທິບໍດີ ຣັດເຊຍ ທ່ານ ວລາດີເມຍ ປູຕິນ (Vladimir Putin) ກ່າວໃນວັນອາທິດວານນີ້ວ່າ ກອງກຳລັງຂອງທ່ານ ໄດ້ປຽບໃນສະໜາມລົບໃນຢູເຄຣນ ແລະ ມັນອາດຈະມີຄວາມຈຳເປັນສຳລັບກຳລັງຂອງຣັດເຊຍ ໃນການສ້າງເຂດກັນຊົນ ຢູ່ຊາຍແດນຢູເຄຣນ ເພື່ອປ້ອງກັນການໂຈມຕີໃສ່ດິນແດນຂອງຣັດເຊຍ.
ຄໍາເຫັນຂອງທ່ານ ປູຕິນ ມີຂຶ້ນຫຼັງຈາກການໂຈມຕີດ້ວຍເຮືອບິນບໍ່ມີຄົນຂັບຂອງຢູເຄຣນ ຄັ້ງຫລ້າສຸດ ໃສ່ໂຮງກັ່ນນ້ຳມັນຂອງຣັດເຊຍ ແລະ ທ່ານ ປູຕິນ ອ້າງວ່າ ໄດ້ຮັບຕໍາແໜ່ງໃນວາລະໃໝ່ ອີກ 6 ປີ ໃນການເລືອກຕັ້ງທີ່ບໍ່ໜ້າເຊື່ອຖືໃນລະດັບສາກົນ.
ປະທານາທິບໍດີຢູເຄຣນ ທ່ານ ໂວໂລດີເມຍ ເຊເລັນສກີ (Volodymyr Zelenskyy) ກ່າວໃນວັນອາທິດວານນີ້ວ່າ “ທຸກສິ່ງທຸກຢ່າງທີ່ຣັດເຊຍເຮັດຢູ່ໃນເຂດດິນແດນຂອງຢູເຄຣນແມ່ນອາດຊະຍາກຳ.”
ຟໍຣັມສະແດງຄວາມຄິດເຫັນ