ຜູ້ນຳພວກຫົວແບ່ງແຍກດິນແດນນິຍົມຣັດເຊຍ ໃນຢູເຄຣນ
ກ່າວວ່າ ຕົນຈະບໍ່ຊຸກຍູ້ໃຫ້ມີການເຈລະຈາສັນຕິພາບຄັ້ງໃໝ່
ກັບລັດຖະບານຢູເຄຣນ ແລະປະຕິຍານແທນວ່າ ຈະເຂົ້າ
ຄວບຄຸມດິນແດນໃນພາກຕາເວັນອອກ ຂອງປະເທດຕື່ມອີກ.
ອົງການຂ່າວຕ່າງໆຂອງຣັດເຊຍ ໄດ້ອ້າງເຖິງຄຳເວົ້າ ຂອງ
ຫົວໜ້າຝ່າຍກະບົດ ທ່ານ Alexander Zakharchenko ທີ່
ມີຫ້ອງການຕັ້ງຢູ່ທີ່ເມືອງ Donetsk ໃນພາກຕາເວັນອອກ
ຂອງປະເທດ ທີ່ກ່າວໃນວັນສຸກມື້ນີ້ວ່າ ກອງກຳລັງຂອງຕົນ
ກຳລັງເປີດສາກການບຸກໂຈມຕີບັ້ນໃໝ່ເພື່ອ ຂະຫຍາຍເຂດ
ຄວບຄຸມຂອງພວກຕົນ.
ໃນວັນພະຫັດວານນີ້ ຢູ່ທີ່ເມືອງ Donetsk ຢ່າງນ້ອຍ 13 ຄົນໄດ້ຖືກຂ້າຕາຍ ໃນເວລາ
ລົດເມໂດຍສານໄຟຟ້າ ໄດ້ຖືກໃນອັນທີ່ປາກົດວ່າ ເປັນການໂຈມຕີດ້ວຍລູກປືນຄົກ ທີ່
ໄດ້ກໍ່ໃຫ້ເກີດມີການຖິ້ມໂທດໃສ່ກັນ ແລະກັນ ຈາກທັງສອງຝ່າຍ.
ຢູເຄຣນ ແລະຣັດເຊຍ ກ່າວຫາ ກັນແລະກັນ
ນາຍົກລັດຖະມົນຕີຢູເຄຣນ ທ່ານ Arseniy Yatsenyuk ໄດ້ອອກຖະແຫລງການສະບັບນຶ່ງ ຜ່ານທາງເວັບໄຊຂອງລັດຖະບານ ໂດຍຖິ້ມໂທດໃສ່ອັນທີ່ທ່ານເອີ້ນວ່າ “ພວກກໍ່ການຮ້າຍ ຣັດເຊຍ” ກ່ຽວກັບການໂຈມຕີ ຢູ່ໃນເມືອງ ທີ່ຕົກເປັນຈຸດສູນກາງຂອງບັນຫາຂັດແຍ້ງເປັນ ເວລາຫຼາຍເດືອນຜ່ານມາ ລະຫວ່າງກອງທະຫານລັດຖະບານ ແລະ ພວກຫົວແບ່ງແຍກດິນ ແດນນິຍົມຣັດເຊຍ ໃນພາກຕາເວັນອອກຂອງຢູເຄຣນ.
ທ່ານ Sergei Lavrov ລັດຖະມົນຕີຕ່າງປະເທດຣັດເຊຍ ກ່າວວ່າ ກອງກຳລັງຢູເຄຣນ
ເປັນຜູ້ຮັບຜິດຊອບ ໃນອັນທີ່ທ່ານເອີ້ນວ່າ “ອາຊະຍາກຳໂຫດຫ້ຽມ” ແລະ “ການທ້າ
ທາຍເກາະຜິດບໍ່ມີີຢາງອາຍ.”
ອົງການນິລະໂທດກຳສາກົນໄດ້ປະນາມໃນອັນທີ່ອົງການເອີ້ນວ່າ “ການສູນເສຍຊີວິດ
ຂອງພົນລະເຮືອນ ທີ່ໜ້າວິຕົກ.” ກຸ່ມປົກປ້ອງສິດທິມະນຸດ ທີ່ມີຫ້ອງການຢູ່ ນະຄອນ
ຫລວງ London ໄດ້ກ່າວຕື່ມອີກວ່າ “ຈະຕ້ອງມີການສືບສວນສອບສວນ ຢ່າງລະອຽດ
ບໍ່ເຂົ້າຂ້າງອອກຂາ ແລະ ເປັນອິດສະຫລະ ກ່ຽວກັບຄວາມເປັນໄປໄດ້ໃນການ
ລະເມີດ ຕໍ່ກົດໝາຍສົງຄາມ ໃນຄັ້ງນີ້ ໂດຍທັນທີ.”
