ລູກສອນໄຟທີ່ຍິງໂດຍກອງທັບເຮືອຢູເຄຣນໄດ້ຍິງຖືກສາງນ້ຳມັນແຫ່ງນຶ່ງ ຢູ່ທີ່ທ່າກຳປັ່ນ ຄັຟຄາຊ (Kavkaz) ຂອງຣັດເຊຍ ໃນເຂດ ຄຣາສໂນດາ (Krasnodar) ໃນວັນສຸກມື້ນີ້, ກອງທັບຢູເຄຣນ ກ່າວຜ່ານທາງແອັບສົ່ງ ຂໍ້ຄວາມ Telegram, ອີງຕາມອົງການຂ່າວ ຣອຍເຕີສ໌.
ກອງທັບດັ່ງກ່າວ ໄດ້ລາຍງານການລະເບີດຢູ່ຈຸດດັ່ງກ່າວ ໃນຂະນະທີ່ຕົນກຳລັງ ກວດສອບຄວາມເສຍຫາຍຈາກການໂຈມຕີດ້ວຍລູກສອນໄຟ ເນັປຈູນ (Neptune) ທີ່ຜະລິດໂດຍຢູເຄຣນ.
ຖະແຫຼງການກ່າວວ່າ ເຮືອບິນບໍ່ມີຄົນຂັບຂອງຢູເຄຣນ ຍັງໄດ້ໂຈມຕີສາງເກັບ ນ້ຳມັນອີກແຫ່ງນຶ່ງໃນເຂດ ຄຣາສໂນດາ (Krasnodar).
ກອງທັບຢູເຄຣນກ່າວວ່າ “ລະບົບປ້ອງກັນທາງອາກາດທີ່ ‘ທັນສະໄໝ’ ແລະ ມີ’ປະສິດທິພາບ’ ຂອງຣັດເຊຍໄດ້ຮັບການພິສູດອີກຄັ້ງນຶ່ງແລ້ວວ່າ ບໍ່ມີປະສິດທິ ພາບໃນການຕໍ່ຕ້ານລູກສອນໄຟ ແລະ ລະບົບບໍ່ມີຄົນຂັບຂອງພວກເຮົາ ແລະບໍ່ສາມາດປ້ອງກັນບັນດາສະຖານທີ່ສຳຄັນທີ່ໃຊ້ໃນການຂົນສົ່ງ ແລະ ສະບຽງຂອງກອງທັບຣັດເຊຍ ໄດ້.
ກະຊວງປ້ອງກັນປະເທດຣັດເຊຍກ່າວໃນ Telegram ວ່າ ລະບົບປ້ອງກັນອາກາດຂອງຕົນໄດ້ທຳລາຍລູກສອນໄຟ 5 ລູກ ແລະເຮືອບິນບໍ່ມີຄົນຂັບ 29 ລຳ ທີ່ແນເປົ້າໃສ່ເຂດ ຄຣາສໂນດາ (Krasnodar).
ເຈົ້າໜ້າທີ່ທ້ອງຖິ່ນຂອງຣັດເຊຍ ກ່າວວ່າ ເສດຊິ້ນສ່ວນຂອງໂດຣນ ທີ່ຕົກລົງມາ ໄດ້ເຮັດໃຫ້ເກີດໄຟໄໝ້ສາງນ້ຳມັນແຫ່ງນຶ່ງໃນເມືອງ ເທັມຣີຢຸກ (Temryuk), ເຊິ່ງໄດ້ເຮັດໃຫ້ຖັງນໍ້າມັນຫຼາຍຖັງທີ່ເຕັມໄປດ້ວຍນ້ຳມັນເຊື້ອໄຟເສຍຫາຍ ແລະເຮັດໃຫ້ມີຜູ້ບາດເຈັບ 2 ຄົນ.
ຟໍຣັມສະແດງຄວາມຄິດເຫັນ