ພວກປະທ້ວງຫລາຍຮ້ອຍຄົນ ໄດ້ປະທະກັບຕໍາຫລວດຢູ່ໃນນະຄອນຫລວງກຽບຂອງ
ຢູເຄຣນ ລຸນຫລັງທີ່ລັດຖະສະພາຂອງປະເທດນັ້ນ ໄດ້ຮັບຮອງເອົາຮ່າງກົດໝາຍທີ່ເຮັດ
ໃຫ້ພາສາຣັດເຊຍ ເປັນພາສາກາງທີ່ໃຊ້ຢູ່ໃນໂຮງຮຽນ ແລະສະຖາບັນຕ່າງໆ ຂອງລັດ
ຖະບານ.
ການປະທະກັນໃນວັນພຸດວານນີ້ ແມ່ນເກີດຂຶ້ນຢູ່ນອກໂຮງການລັດຖະບານ ແຫ່ງນຶ່ງ
ຢູ່ໃຈກາງນະຄອນກຽບ ຊຶ່ງເປັນບ່ອນທີ່ປະທານາທິບໍດີ Viktor Yanukovich ຄາດໝາຍ
ຈະຈັດກອງປະຊຸມຖະແຫຼງຂ່າວ.
ຮ່າງກົດໝາຍດັ່ງກ່າວ ທີ່ປະທານາທິບໍດີຈະຕ້ອງໄດ້ເຊັນ ກ່ອນຈະກາຍເປັນ ກົດໝາຍ ໄດ້ ມີການຮັບຮອງໃນວັນອັງຄານທີ່ຜ່ານມາລຸນຫລັງທີ່ໄດ້ດຳເນີນການຜ່ານລັດຖະສະພາຢ່າງ
ຮີບດ່ວນ ຫລັງຈາກໄດ້ມີການສະເໜີ ທີ່ບໍ່ຄາດຝັນ ໂດຍບັນດາສະມາຊິກສະພາທີ່ສະໜັບ
ສະໜູນທ່ານ Yanukovich.
ຫລັງຈາກນັ້ນ ໂຄສົກປະຈໍາລັດຖະສະພາ ທ່ານ Volodymyr Lytvyn ໄດ້ປະກາດລາອອກ ໂດຍເວົ້າວ່າການລົງຄະແນນສຽງດັ່ງກ່າວນີ້ ແມ່ນ ເຮັດບໍ່ຖືກກົດໝາຍ.
ພວກຄັດຄ້ານຕໍ່ຮ່າງກົດໝາຍດັ່ງກ່າວເວົ້າວ່າ ຮ່າງກົດໝາຍສະບັບນີ້ເປັນໄພນາບຂູ່ຕໍ່ອະທິ
ປະໄຕຂອງປະເທດພາຍຫລັງທີ່ໄດ້ຮັບເອກະລາດຈາກສະຫະພາບໂຊຫວຽດມາເປັນເວລາ
20 ປີ ແລະຈະມີຜົນເຮັດໃຫ້ພາສາຢູເຄຣນສູນຫາຍໄປ.
ທ່ານ Yanukovich ໃນວັນພຸດວານນີ້ ໄດ້ຮຽກປະຊຸມດ່ວນກັບລັດຖະສະພາ ແລະຜູ້ນໍາຂອງ
ພັກຝ່າຍຕ່າງໆ. ທ່ານເວົ້າວ່າ ອາດຈະມີການຮຽກໃຫ້ ຈັດການເລືອກຕັ້ງລັດຖະສະພາຂຶ້ນ
ກ່ອນກໍານົດ ຖ້າຫາກວ່າ ວິກິດການກ່ຽວກັບການຮັບຜ່ານຮ່າງກົດໝາຍທີ່ມີຄວາມເຄັ່ງຕຶງ
ດັ່ງກ່າວ ຍັງສືບຕໍ່ດໍາເນີນໄປ.