ປະທານາທິບໍດີຢູເຄຣນ ທ່ານ Petro Poroshenko ກ່າວໃນວັນພະຫັດວານນີ້ວ່າ ປະທາ ນາທິບໍດີທີ່ໄດ້ຮັບເລືອກໃໝ່ຂອງສະຫະລັດ ທ່ານ Donald Trump ໄດ້ຖາມກ່ຽວກັບການຮຸກຮານຂອງຣັດເຊຍ ການປະກາດຮວມເອົາເຂດໄຄຣເມຍເຂົ້າເປັນດິນແດນຂອງຕົນ ລະ ຫວ່າງການໂອ້ລົມທາງໂທລະສັບຂອງພວກທ່ານ.
ໃນການກ່າວ ທີ່ກອງປະຊຸມຖະແຫຼງຂ່າວຮ່ວມ ທີ່ນະຄອນບຣັສເຊີລ ກັບປະທານສະພາ ຢູໂຣບ ທ່ານ Donald Tusk ແລະ ປະທານກຳມາທິການຢູໂຣບ ທ່ານ Jean-Claude Juncker ນັ້ນ ທ່ານ Poroshenko ເວົ້າວ່າ ທ່ານໄດ້ມີ “ໂອກາດໃຫ້ການອະທິບາຍຢ່າງລະອຽດຕໍ່ທ່ານ Trump ກ່ຽວກັບສະຖານະການຫລ້າສຸດ ໃນພາກຕາເວັນອອກ ຂອງປະເທດຂ້າພະເຈົ້າແລະເຂດໄຄຣເມຍ.”
ນອກນັ້ນ ປະທານາທິບໍດີຢູເຄຣນຍັງກ່າວວ່າ “ປະເທດຂອງທ່ານໄດ້ຮັບການສະໜັບສະ ໜຸນຢ່າງແຂງຂັນ ຈາກທັງສອງພັກການເມືອງ ຢູ່ໃນສະຫະລັດ ໃນລັດຖະສະພາ ໃນໝູ່ພວກນັກການເມືຶອງອາເມຣິກັນ ທັງພັກຣີພັບບລີກັນ ແລະ ພັກເດໂມແຄຣັດ ແລະພວກເຮົາບໍ່ຄາດວ່າ ຈະມີການປ່ຽນແປງທີ່ສຳຄັນໃດໆໃນການໃຫ້ຄວາມສະໜັບສະໜຸນຂອງທັງສອງພັກ.”
ການໃຫ້ຄວາມເຫັນຂອງທ່ານ Trump ໃນລະຫວ່າງການໂຄສະນາຫາສຽງເພື່ອສະໝັກເປັນປະທານາທິບໍດີ ສະຫະລັດນັ້ນ ໄດ້ພາໃຫ້ມີຄວາມຢ້ານກົວວ່າ ຖ້າຫາກທ່ານຊະນະ ທ່ານອາດຈະອຽງໄປສູ່ການປັບປຸງຄວາມສຳພັນກັບຣັດເຊຍຊຶ່ງຈະສ້າງຄວາມເສຍຫາຍໃຫ້ແກ່ຢູເຄຣນ. ທ່ານໄດ້ກ່າວຍົກຍ້ອງ ການນຳພາ ຂອງປະທານາທິບໍດີຣັດເຊຍ ທ່ານ Vladimir Putin ແລະໄດ້ຕ້ອງຕິ ຜູ້ສະໝັກເປັນປະທານາທິບໍດີ ຂອງພັກເດໂມແຄຣັດ ທ່ານນາງ Hillary Clinton ທີ່ໄດ້ເວົ້າບໍ່ດີກ່ຽວກັບທ່ານ Putin.
ຫລາຍມື້ ຫລັງຈາກທີ່ທ່ານ Trump ໄດ້ຮັບໄຊຊະນະແລ້ວ ວັງເຄຣັມລິນ ກ່າວວ່າ ທ່ານແລະປະທານາທິບໍດີ Putin ໄດ້ຕົກລົງກັນ ໃນລະຫວ່າງການໂອ້ລົມທາງໂທລະສັບວ່າ ຄວາມສຳພັນລະຫວ່າງສະຫະລັດ ກັບຣັດເຊຍ ແມ່ນຍັງບໍ່ທັນເປັນທີ່ “ພໍອົກພໍໃຈເທື່ອ” ແລະວ່າ ພວກທ່ານຈະດຳເນີນງານຮ່ວມກັນ ເພື່ອປັບປຸງຄວາມສຳພັນດັ່ງກ່າວ.
ໃນການໃຫ້ຄວາມເຫັນ ລະຫວ່າງການໂອ້ລົມທາງໂທລະສັບດຽວກັນນີ້ ຫ້ອງການຂອງທ່ານ Trump ຍັງກ່າວວ່າ ທ່ານ Putin ໄດ້ໂທລະສັບມາສະແດງຄວາມດີໃຈ ແລະ ປະ ທານາທິບໍດີ ທີ່ໄດ້ຮັບເລືອກໃໝ່ ຂອງສະຫະລັດ ໃຫ້ຂໍ້ສັງເກດຕໍ່ປະທານາທິບໍດີ Putin ວ່າ ທ່ານຫວັງເປັນທີ່ສຸດວ່າ ຈະມີຄວາມສຳພັນທີ່ເຂັ້ມແຂງແລະຍືນຍົງກັບຣັດເຊຍແລະປະຊາຊົນຊາວຣັດເຊຍນຳດ້ວຍ.
