ລາຍງານຂອງສື່ມວນຊົນ Uganda ກ່າວວ່າ ຟ້າຜ່າໄດ້ເອົາຊີວິດພວກເດັກນ້ອຍໄປ 18
ຄົນທີ່ໂຮງຮຽນປະຖົມແຫ່ງນຶ່ງໃນພາກຕາເວັນຕົກຂອງ Uganda ໃນວັນອັງຄານວານນີ້
ອັນເປັນເຫດຟ້າຜ່າຄັ້ງຫລ້າສຸດໃນຈໍານວນຟ້າຜ່າຫລາຍຄັ້ງທີ່ເກີດຕິດຕໍ່ກັນມາໃນປະເທດ
ດັ່ງກ່າວ.
ໝັງສືພິມທີ່ລັດເປັນເຈົ້າຂອງ The New Vision ກ່າວວ່າ ພວກເດັກນ້ອຍນັກຮຽນເຫລົ່າ
ນີ້ຕາຍໃນທັນທີໃນຂະນະທີ່ພວກເຂົາເຈົ້າພວມລໍຖ້າໃຫ້ພາຍຸຝົນເຊົາທີ່ໂຮງຮຽນປະຖົມ
Runyanya ໃນເມືອງ Kiryandongo ທາງທິດເໜືອຈາກນະຄອນຫລວງ Kampala
ນັ້ນ. ໜັງສືພິມສະບັບນີ້ຍັງກ່າວຕື່ມວ່າ ມີປະຊາຊົນຕືມອີກ 36 ຄົນໄດ້ຮັບບາດເຈັບຈາກ
ຟ້າຜ່າດັ່ງກ່າວ ທີ່ເກີດຂຶ້ນເວລາ 4:30 ຕອນບ່າຍຕາມເວລາໃນທ້ອງຖິ່ນ.
ນອກນັ້ນ ໜັງສືພິມສະບັບນີ້ຍັງແຈ້ງໃຫ້ຊາບຕື່ມວ່າ ເກີດຟ້າຜ່າໃນບ່ອນນຶ່ງອີກ ຊຶ່ງໄດ້
ເຮັດໃຫ້ພວກເດັກນ້ອຍ 37 ຄົນແລະນາຍຄູ 2 ຄົນໄດ້ຮັບບາດເຈັບທີ່ໂຮງຮຽນປະຖົມອີກ
ແຫ່ງນຶ່ງໃນເມືອງ Zombo ໃນພາກເໜືອຂອງປະເທດໃນວັນອັງຄານວານນີ້ເຊ່ນກັນ.
ລາຍງານເວົ້າວ່າ ຟ້າຜ່າຫລາຍຄັ້ງໄດ້ເອົາຊີວີດຜູ້ຄົນໄປໃນຈໍານວນຫລາຍກວ່າ 40 ຄົນ
ແລ້ວໃນ Uganda ໃນຫວ່າງບໍ່ເທົ່າໃດສັບປະດາຜ່ານມານີ້. ບັນດານັກຊ່ຽວຊານກ່າວ
ວ່າ ການຂາດສາຍລໍ້ຟ້າຫລືເຂັມກັນຟ້າຜ່າໃນຕຶກອາຄານຫລາຍແຫ່ງໃນ Uganda ອາດ
ຈະເປັນພາກສ່ວນນຶ່ງທີ່ພາໃຫ້ເກີດຄວາມເສຍຫາຍຢ່າງຫລວງຫລາຍຍ້ອນຟ້າຜ່າໃນປະ
ເທດດັ່ງກ່າວນັ້ນ.
