ລິ້ງ ສຳຫລັບເຂົ້າຫາ

ວັນອັງຄານ, ໑໖ ກໍລະກົດ ໒໐໒໔

ສະຫະລັດ ສະເຫຼີມສະຫຼອງວັນ Juneteenth ທີເປັນວັນພັກແຫ່ງຊາດ ເປັນປີທີສາມຂອງສະຫະລັດ


ແຟ້ມຮູບ-ນາງມິເກຍ ເຄນ ຈາກນະຄອນຊີອາໂຕ້ ຖ່າຍຮູບຕົນເອງຕໍ່ໜ້າຂໍ້ຄວາມ 'ຄວາມສະເໝີພາບຢ່າງແທ້ຈິງ,' ເຊິ່ງເປັນຈຸດທີ່ພົນຕີຂອງສະຫະພາບ ປະກາດອອກຄໍາສັ່ງໃນປີ 1865 ທີ່ນໍາໄປສູ່ການປົດປ່ອຍທາດໃນລັດເທັກຊັສ, ໃນລະຫວ່າງການສະເຫຼີມສະຫຼອງວັນພັກ Juneteenth ໃນເມືອງ Galveston, ລັດເທັກຊັສ, ວັນທີ 19 ມິຖຸນາ 2023.
ແຟ້ມຮູບ-ນາງມິເກຍ ເຄນ ຈາກນະຄອນຊີອາໂຕ້ ຖ່າຍຮູບຕົນເອງຕໍ່ໜ້າຂໍ້ຄວາມ 'ຄວາມສະເໝີພາບຢ່າງແທ້ຈິງ,' ເຊິ່ງເປັນຈຸດທີ່ພົນຕີຂອງສະຫະພາບ ປະກາດອອກຄໍາສັ່ງໃນປີ 1865 ທີ່ນໍາໄປສູ່ການປົດປ່ອຍທາດໃນລັດເທັກຊັສ, ໃນລະຫວ່າງການສະເຫຼີມສະຫຼອງວັນພັກ Juneteenth ໃນເມືອງ Galveston, ລັດເທັກຊັສ, ວັນທີ 19 ມິຖຸນາ 2023.

ໃນວັນ​ພຸດມື້ນີ້ ແມ່ນວັນ Juneteenth ໄດ້ຖືກ​ກໍານົດເປັນ​ວັນ​ບຸນ​ປະຈໍາປີຄັ້ງ​ທີ​ສາມຢູ່​ໃນ ​ສະ​ຫະ​ລັດ, ເຊິ່ງເປັນ​ວັນ​ພັກ​ຂອງ​ລັດ​ຖະ​ບານ​ກາງ ເພື່ອລະລຶກ​ເຖິງ​ການ​ປົດ​ຂ້າທາດຂອງ​ຄົນ​ຜິວ​ດຳ ​ໃນຊ່ວງ​ປີ 1865 ຂອງໄລຍະ​ທ້າຍ​ສົງ​ຄາມ​ກາງ​ເມືອງຂອງສະຫະລັດ.

ຊື່ຂອງວັນພັກ ແມ່ນມາຈາກວັນທີ 19 ມິຖຸນາ ປີ 1865, ໃນເວລາທີ່ພົນຕີຂອງກອງທັບສະຫະລັດ ທ່ານກໍຣ໌ດອນ ແກຣັງເຈີ (Gordon Granger) ໄດ້ນຳທັບເຂົ້າໄປໃນເມືອງ ກາລເວສຕັນ (Galveston), ລັດເທັກຊັສ ແລະແຈ້ງໃຫ້ຂ້າທາດປະມານ 250,000 ຄົນວ່າ ພວກເຂົາໄດ້ຮັບການປົດປ່ອຍ ລຸນຫຼັງສົງຄາມ 4 ປີ ລະຫວ່າງກອງທັບຂອງສະຫະພາບສະຫະລັດທາງພາກເໜືອທີ່ໄດ້ຮັບໄຊຊະນະ ແລະບັນດາລັດສະຫະພັນຢູ່ທາງພາກໃຕ້.

ຄໍາສັ່ງຂອງ ພົນຕີ ແກຣັງເຈີ ໄດ້ບັງຄັບໃຊ້ ການປະກາດປົດປ່ອຍ ທີ່ເອີ້ນວ່າ Emancipation Proclamation ທີ່ໄດ້ລົງນາມ ໃນວັນທີ 1 ມັງກອນ ປີ 1863 ໂດຍປະທານາທິບໍດີ ໃນເວລານັ້ນ ຄື ທ່ານ ເອບຣາແຮມ ລິນຄອນ (Abraham Lincoln) ທີ່ໄດ້ໃຫ້ອິດສະຫຼະພາບແກ່ຄົນຜິວດໍາທີ່ເປັນຂ້າທາດຫຼາຍກວ່າ 3 ລ້ານຄົນ ໃນທົ່ວສະຫະພັນ ແຕ່ບໍ່ມີຜົນບັງຄັບໃຊ້ຢ່າງແທ້ຈິງຈົນເຖິງຊ່ວງສິ້ນສຸດລົງຂອງສົງຄາມ ເມື່ອບັນດາລັດສະຫະພັນ ໄດ້ທໍາການຍອມຈໍານົນ.

ຊຸມຊົນຄົນຜິວດຳ ໄດ້ຮັບການລະນຶກເຖິງວັນທີ່ເປັນການສິ້ນສຸດຂອງການເປັນຂ້າທາດ ໂດຍການສະເຫຼີມສະຫຼອງແບບສ່ວນໂຕ ໃນຕະຫຼອດໄລຍະສັດຕະວັດຕໍ່ມາ. ການ​ປະຕິບັດ​ຢ່າງ​ເປັນ​ທາງ​ການຂອງວັນ Juneteenth ຄັ້ງທໍາອິດມີຂຶ້ນໃນ​ປີ 1980, ​ເມື່ອ​ລັດ ເທັກຊັສ ໄດ້ທໍາການປະກາດ​ວ່າ ​ເປັນ​ວັນ​ພັກ​ທາງສັງຄົມ. ຊຸມຊົນອື່ນໆໃນທົ່ວສະຫະລັດ ກໍຄ່ອຍໆເລີ້ມຮັບຮອງເອົາການສະເຫຼີມສະຫຼອງວັນດັ່ງກ່າວ ເປັນວັນພັກປະຈໍາປີຂອງສາທາລະນະ, ແລະໃນທີ່ສຸດ, ປັດຈຸບັນນີ້ ກໍໄດ້ເຮັດໃຫ້ທັງຫມົດ 50 ລັດ ແລະຂົງເຂດ District of Columbia ພາກັນຮັບຮູ້ວັນດັ່ງກ່າວ.

ອ່ານຂ່າວນີ້ເປັນພາສາອັງກິດ

ຟໍຣັມສະແດງຄວາມຄິດເຫັນ

XS
SM
MD
LG