ລົມທີ່ຮຸນແຮງ ແລະຝົນທີ່ຕົກລົງມາຢ່າງໜັກໜ່ວງ ຂອງໄຕ້ຝຸ່ນ
ຣາມມະສູນ ໄດ້ສືບຕໍ່ສ້າງຄວາມເສຍຫາຍໄປຕາມເສ້ນທາງພັດ
ຜ່ານຂອງມັນ ເຮັດໃຫ້ 17 ຄົນເສຍຊີວິດໃນຈີນ ຫຼັງຈາກທີ່ໄດ້
ເອົາຊີວິດເກືອບ 100 ຄົນ ຢູ່ໃນຟີລິບປີນໄປແລ້ວ.
ພາຍຸຫົວນີ້ ໄດ້ເຮັດໃຫ້ 8 ຄົນເສຍຊີວິດ ຢູ່ໃນເກາະແຂວງໄຫ
ໜານ ຫລືໄຫຫລຳກ່ອນທີ່ ຈະພັດຂຶ້ນຝັ່ງຈີນແຜ່ນດິນໃຫຍ່
ບ່ອນທີ່ມັນໄດ້ເອົາຊີວິດ ອີກ 9 ຄົນ ຢູ່ແຂວງກວາງຊີ ອີງຕາມ
ລາຍງານຂອງສື່ຂ່າວທາງການຈີນ.
ຢ່າງນ້ອຍ 94 ຄົນໄດ້ເສຍຊີວິດ ແລະ ອີກ 6 ຄົນຍັງຫາຍສາບສູນໃນຟີລິບປີນ ຍ້ອນພາຍຸດັ່ງກ່າວ ຊຶ່ງໄດ້ທຳລາຍລະບົບສາຍສົ່ງໄຟຟ້າແກ່ ຫຼາຍລ້ານຄົວເຮືອນ ໃນນະຄອນຫລວງມານີລາອີກດ້ວຍ.
ໄຕ້ຝຸ່ນດັ່ງກ່າວ ໄດ້ຟື້ນຄວາມແຮງຄືນມາ ຂະນະທີ່ພັດຜ່ານທະເລຈີນໃຕ້ ແລະໄດ້ພັດຂຶ້ນ
ຝັ່ງຈີນ ໃນວັນສຸກທີ່ຜ່ານມາ ພ້ອມກັນກັບລົມທີ່ມີຄວາມແຮງກາຍ 200 ກິໂລແມັດຕໍ່ຊົ່ວ
ໂມງ ເຮັດໃຫ້ມັນເປັນພາຍຸທີ່ແຮງສຸດ ທີ່ໄດ້ຖະຫລົ່ມບໍລິເວນນັ້ນ ໃນຮອບ 41 ປີ.
ຄາດກັນວ່າຝົນຈະຕົກຢ່າງໜັກໜ່ວງ ໃນພາກເໜືອຂອງຈີນ ໃນຕົ້ນອາທິດນີ້.
ໃນຂະນະດຽວກັນ ພາຍຸຫົວໃໝ່ ຊື່ວ່າ Matmo ກໍອາດສາມາດນຳເອົາລົມແຮງ ແລະ ຝົນ
ເຂົ້າມາໃນເຂດດຽວກັນ ທີ່ຣາມມະສູນໄດ້ຖະຫຼົ່ມໄປແລ້ວນັ້ນ ອີກຮອບນຶ່ງ.
