ໄຕ້ຝຸ່ນໃຫຍ່ຫົວນຶ່ງ ໄດ້ນຳເອົາລົມແຮງແລະຝົນຕົກໜັກ ມາສູ່
ພາກໃຕ້ຂອງຈີນ ຊຶ່ງພາໃຫ້ມີການຍົກເລີກຖ້ຽວບິນ ແລະການ
ຍົກຍ້າຍຜູ້ຄົນ.
ໄຕ້ຝຸ່ນ Kalmaegi ໄດ້ພັດຖະຫຼົ່ມຂົງເຂດ ໃນເຊົ້າວັນອັງຄານ
ມື້ນີ້ ທີ່ເກາະ Hainan ຊຶ່ງເປັນແຂວງໃຕ້ສຸດຂອງຈີນ. ອົງການ
ຂ່າວຊິນຫົວ ຂອງທາງການຈີນ ກ່າວວ່າ ມີຖ້ຽວບິນຢ່າງນ້ອຍ
170ຖ້ຽວ ຖືກຍົກເລີກ ແລະໄດ້ມີການອົບພະຍົບຜູ້ຄົນເຖິງ
90 ພັນຄົນຈາກແຄມຝັ່ງທະເລ ທາງກ້ຳຕາເວັນອອກຂອງເກາະ
ດັ່ງກ່າວ.
ຢູ່ນອກຝັ່ງທະເລຂອງເເຂວງ Guangdong ທາງພາກໃຕ້ຂອງຈີນນັ້ນ ອົງການຊິນຫົວ ກ່າວວ່າ ວິກິດການສາມາດຫລີກລ່ຽງໄດ້ ເວລາເຮືອບິນເຮລິຄອບເຕີ ໄດ້ຊ່ອຍກູ້ໄພ ຊາວປະມົງຈີນ 12 ຄົນ ທີ່ເຮືອຂອງພວກເຂົາເຈົ້າ ໄດ້ເລີ້ມຈົມລົງ ຍ້ອນລົມແຮງຈາກໄຕ້ຝຸ່ນ Kalmaegi ນັ້ນ.
ກ່ອນໜ້ານີ້ ໄຕ້ຝຸ່ນດັ່ງກ່າວ ໄດ້ພັດຜ່ານຢູ່ທາງໃຕ້ຂອງເກາະຮົງກົງໜ້ອຍນຶ່ງ ທີ່ມີລົມເເຮງ ເຖິງ 160 ກິໂລແມັດຕໍ່ຊົ່ວໂມງ. ພາຍຸຫົວນີ້ ໄດ້ເຮັດໃຫ້ຖ້ຽວບິນ ມີຊັກຊ້າຢ່າງນ້ອຍ 500 ຖ້ຽວ ໃນສະໜາມບິນຮົງກົງ ແລະບັງຄັບໃຫ້ຕະຫຼາດຮຸ້ນໃນຮົງກົງ ປິດການຊື້ຂາຍລົງໃນ ຕອນເຊົ້າມື້ນີ້. ການຊື້ຂາຍຢູ່ທີ່ຕະຫຼາດຮຸ້ນ ໄດ້ເປີດຄືນ ເວລາເຈົ້າໜ້າທີ່ໄດ້ຫລຸດການ ເຕືອນກ່ຽວກັບຄວາມແຮງຂອງລົມພາຍຸໄຕ້ຝຸ່ນນີ້ລົງ.
ໄຕ້ຝຸ່ນ Kalmaegi ໄດ້ພັດຜ່ານ ຟິລິບປີນໃນວັນອາທິດແລ້ວນີ້ ທີ່ພາໃຫ້ເກີດດິນເຈື່ອນແລະນ້ຳຖ້ວມ ຢູ່ໃນເຂດຊົນນະບົດບາງແຫ່ງ.
ໄຕ້ຝຸ່ນດັ່ງກ່າວ ພວມມຸ່ງໜ້າສູ່ທິດ ຕາເວັນອອກສຽງເໜືອ ແລະຄາດວ່າຈະພັດເຂົ້າປະທະຫວຽດນາມ ໃນແລງວັນອັງຄານມື້ນີ້.
