ມີ 2 ຄົນໄດ້ຖືກຍິງຕາຍ ທີ່ມະຫາວິທະຍາໄລແຄລີຟໍເນຍ ໃນນະຄອນ Los Angeles ຫຼື UCLA ໃນວັນພຸດວານນີ້ ຊຶ່ງໄດ້ພາໃຫ້ເຈົ້າໜ້າທີ່ຫ້າມບໍ່ໃຫ້ມີ ການເຂົ້າອອກຢູ່ໃນເຂດມະຫາວິທະຍາໄລດັ່ງກ່າວເປັນການຊົ່ວຄາວ.
ຜູ້ບັນຊາການຕຳຫຼວດໃນນະຄອນ Los Angeles ທ່ານ Charlie Beck ກ່າວວ່າ ການຍິງກັນດັ່ງກ່າວນີ້ ເປັນການຄາດຕະກຳແບບຂ້າຕົວຕາຍ. ທ່ານ ກ່າວເຖິງຜູ້ເຄາະຮ້າຍທັງສອງຄົນວ່າ ເປັນຊາຍສະກັນ.
ເຈົ້າໜ້າທີ່ຄົນນຶ່ງ ກ່າວຕໍ່ໜັງສືພິມ Los Angeles Times ວ່າ ອີງຕາມລັກສະນະທ່າທາງຂອງຜູ້ຕາຍແລ້ວ ຕຳຫຼວດເຊື່ອວ່າ ອາຈານສອນຄົນນຶ່ງໄດ້ຖືກຍິງ ໂດຍໜຸ່ມນ້ອຍຄົນນຶ່ງ ທີ່ອາດຈະເປັນນັກຮຽນ ແລ້ວຫລັງຈາກນັ້ນກໍຍິງໂຕ ລາວເອງ.
ການຍິງກັນທີ່ວ່ານີ້ ເກີດຂຶ້ນຢູ່ໃນຫ້ອງການນ້ອຍໆແຫ່ງນຶ່ງທີ່ຕຶກອາຄານວິສະວະກຳ. ຜູ້ບັນ ຊາການຕຳຫຼວດກ່າວວ່າ ເຈົ້າໜ້າທີ່ໄດ້ພົບປືນ ພ້ອມກັບອັນທີ່ອາດຈະເປັນຈົດໝາຍລາຕາຍ. ຕຳຫຼວດບໍ່ໄດ້ລະບຸຊື່ພວກຜູ້ຊາຍທີ່ພົວພັນນຳ ການຍິງກັນໃນຄັ້ງນີ້.
ມະຫາວິທະຍາໄລ UCLA ຕັ້ງຢູ່ທີ່ຄຸ້ມ Westwood ໃນນະຄອນ Los Angeles ແລະມີພວກນັກສຶກສາທີ່ເຂົ້າຮຽນຢູ່ຫລາຍກວ່າ 40,000 ຄົນ. ການຍິງກັນທີ່ວ່ານີ້ ເກີດຂຶ້ນໃນອາ ທິດກ່ອນການສອບເສັງຂັ້ນສຸດທ້າຍ ທີ່ຈະມີຂຶ້ນຢູ່ ທີ່ມະຫາວິທະຍາໄລດັ່ງກ່າວ.
