ຫ້ອງການພະຍາກອນອາກາດຂອງອອສເຕຣເລຍ ກ່າວວ່າ
ລົມພາຍຸ cyclone ຂະໜາດໃຫຍ່ສອງຫົວ ໄດ້ພັດເຂົ້າຖະຫລົ່ມ
ພາກເໜືອຂອງອອສເຕຣເລຍ ໃນວັນສຸກມື້ນີ້ ຊຶ່ງເປັນເທື່ອທຳອິດ
ຂອງປະເທດ.
ຫ້ອງການອຸຕຸນິຍົມວິທະຍາ ກ່າວວ່າ ອັນນີ້ແມ່ນເປັນເທື່ອທຳອິດ
ທີ່ມີພາຍຸໄຊໂຄລນເຂດຮ້ອນ ທີ່ຮ້າຍແຮງສອງຫົວໄດ້ພັດເຂົ້າ
ຖະຫລົ່ມອອສເຕຣເລຍ ພາຍໃນໄລຍະເວລາ 24 ຊົ່ວໂມງ.
ໄຊໂຄຣນ Lam ພັດເຂົ້າຖະຫລົ່ມສ່ວນນຶ່ງຂອງເຂດ Northern
Territory ທີ່ມີຜູ້ຄົນອາໄສຢູ່ຢ່າງກະຈັດກະຈາຍ ຫຼັງຈາກນັ້ນ ບໍ່ເທົ່າໃດຊົ່ວໂມງຕໍ່ມາ
ໄຊໂຄຣນ Marcia ທີ່ມີກຳລັງແຮງກວ່າຫົວທຳອິດກໍໄດ້ພັດ ເຂົ້າປະທະເມືອງນ້ອຍ
ຫຼາຍແຫ່ງ ຕາມແຄມຝັ່ງທະເລທາງພາກຕາເວັນອອກຂອງລັດ Queensland ດ້ວຍ
ລົມທີ່ມີຄວາມແຮງເຖິງ 285 ກິໂລແມັດຕໍ່ໍຊົວໂມງ.
ຜູ້ປົກຄອງລັດ Queensland ທ່ານນາງ Annastacia Palaszczuk ໄດ້ເຕືອນ
ປະຊາຊົນໃນວັນພະຫັດວານນີ້ໃຫ້ຕຽມພ້ອມຮັບມືກັບ “ປະສົບພະການ ທີ່ເຈັບປວດ
ແລະ ເປັນຕາຢ້ານກົວ” ຂະນະທີ່ ໄຊໂຄລນ Marcia ພັດຖະລົ່ມພື້ນທີ່ດັ່ງກ່າວ.
ທ່ານນາງ Palaszczuk ໄດ້ເຕືອນວ່າ “ນີ້ແມ່ນໄຊໂຄລນ ທີ່ຮ້າຍແຮງຫຼາຍ. ພວກເຮົາ
ຢາກໃຫ້ໝົດທຸກຄົນ ມີຄວາມລະມັດລະວັງ ເຮັດທຸກໆຢ່າງເທົ່າທີ່ຕົນຈະເຮັດໄດ້.”
ບັນດານັກພະຍາກອນອາກາດ ກ່າວວ່າ ໄຊໂຄລນ Marcia ເປັນລົມພາຍຸຮ້າຍແຮງ
ປະເພດທີ 5 ຊຶ່ງເປັນລະດັບທີ່ເປັນອັນຕະລາຍທີ່ສຸດ ໃນຂະນະທີ່ໄຊໂຄລນ Lam ຖືກ
ຈັດໃຫ້ຢູ່ໃນປະເພດທີ 4.
