ສາຍການບິນ China, ແລະສາຍການບິນ China Southern ຈະກາຍມາເປັນສາຍການບິນທີ 2 ແລະທີ 3 ຂອງຈີນ ທີ່ໃຊ້ເຮືອບິນໂດຍສານ COMAC C919 ຂອງຈີນ ເມື່ອເຮືອບິນລໍາທໍາອິດຂອງພວກເຂົາເຈົ້າ ໄດ້ຮັບການສົ່ງມອບ ໃນວັນພຸດມື້ນີ້, ໂທລະພາບສູນກາງຂອງລັດຖະບານຈີນກ່າວ.
ຜູ້ຜະລິດເຮືອບິນຈີນ COMAC ກໍາລັງພະຍາຍາມບຸກເຂົ້າໄປໃນຕະຫຼາດເຮືອບິນໂດຍສານທີ່ຄອບງໍາໂດຍບັນດາຜູ້ຜະລິດ Airbus ຫຼື AIR.PA ຈາກຕາເວັນຕົກ, ແລະບໍລິສັດ Boeing ຫຼື BA.N ທີ່ໄດ້ຮັບຄວາມກົດດັນຈາກການ ຂາດເຂີນເຮືອບິນ ລວມທັງວິກິດການດ້ານຄວາມປອດໄພຂອງບໍລິສັດ Boeing.
ເຮືອບິນ C919 ໄດ້ເຂົ້າໃຫ້ບໍລິການພາຍໃນປະເທດກັບບໍລິສັດສາຍການບິນ China Eastern ຕັ້ງແຕ່ເດືອນພຶດສະພາຂອງປີແລ້ວນີ້, ເຊິ່ງໃຫ້ບໍລິການພາຍໃນປະເທດຈໍານວນທັງໝົດ 7 ລໍາ.
ລັດວິສາຫະກິດຂະໜາດໃຫຍ່ 3 ບໍລິສັດຂອງຈີນ ໄດ້ສັ່ງຊື້ເຮືອບິນ C919 100 ລຳ, ແລະບໍລິສັດການບິນ COMAC ກ່າວວ່າ ໂດຍລວມແລ້ວມີການສັ່ງຊື້ຫຼາຍກວ່າ 1,000 ລຳ.
ສາຍການບິນ China Southern, ໃນອາທິດທີ່ຜ່ານມາກ່າວໃນສື່ສັງຄົມ ເຫວີຍໂບ (Weibo) ວ່າ ເຮືອບິນ C919 ລໍາທໍາອິດ ຈະຖືກລວມເຂົ້າໃນຝູງບິນຂອງຕົນໃນວັນພຸດມື້ນີ້.
ເຮືອບິນ C919 ບັນຈຸຜູ້ໂດຍສານໄດ້ຮອດ 192 ຄົນ ແລະຢູ່ໃນປະເພດທີ່ຄ້າຍຄືກັນກັບເຮືອບິນ Boeing 737 MAX ແລະ ເຮືອບິນ Airbus A320neo.
ໃນປີນີ້, ບໍລິສັດສາຍການບິນ COMAC ໄດ້ເພີ້ມແຜນການຂາຍ ແລະການຜະລິດ ລວມທັງດໍາເນີນການຕະຫຼາດເຮືອບິນ C919 ຢູ່ຕ່າງປະເທດ, ໂດຍສະເພາະ ລະຫວ່າງພາກພື້ນເອເຊຍຕາເວັນອອກສຽງໃຕ້ ແລະຍັງລວມຕະຫຼາດການບິນທີ່ເພີ້ມຂຶ້ນຂອງ ຊາອຸດີ ອາຣາເບຍ ອີກດ້ວຍ.
ພວກເຂົາເຈົ້າຍັງດໍາເນີນການພັດທະນາການອອກແບບເຮືອບິນທີ່ມີລໍາໂຕກວ້າງເຊັ່ນກັນ.
ໃນເດືອນແລ້ວນີ້ ຕະຫຼາດຫຼັກຊັບ ຊົງຕ່າຍ (Zhongtai) ກ່າວໂດຍຄາດວ່າ ບໍລິສັດການບິນ COMAC ຈະສາມາດຜະລິດເຮືອບິນໄດ້ 100 ລໍາຕໍ່ປີ ພາຍໃນປະມານ ປີ 2030, ແລະຈະມີການຜະລິດເຮືອບິນໄດ້ທັງໝົດກາຍຈໍານວນ 1,000 ລໍາໃນປີ 2035.
